Тоһуттар тымныылаах тохсунньу ый 18 күнүгэр саха норуодунай поэта, Саха АССР искусстволарын үтүөлээх деятелэ, Российскай Федерация култууратын үтүөлээх үлэһитэ, «Бочуот знага», «Доҕордоһуу» орденнар кавалердара, Россия литературатыгар «Хотугу сулус» бириэмийэ бастакы лауреата Иван Михайлович Гоголев-Кындыл Уйбаан төрөөбүтэ 96 сыла туолла.
Биир дойдулаахтара уран тыл улуу маастарын бэрт уһун тымныылар кэннилэриттэн сылаас, хаар кыыдамнаах өрөбүл күн Бүлүү куоратын киинигэр турар суруйааччы скверигэр кэлэн ахтан-санаан аастылар. Айар тыл алтан куолакала ааттаммыт ытык киһилэригэр махтал истиҥ тылларын анаатылар, хоһоон кытта аахтылар. Сүдү талааныгар сүгүрүйэн мэҥэ бэлиэтигэр сибэкки дьөрбөтүн уурдулар.
Онтон тохсунньу 19 күнүгэр улуус дьаһалтатыгар үлэ саҥа нэдиэлэтин арыйар сүбэ мунньах Иван Гоголев «Уу оҕуһун муоһугар суруктар» поэматыттан быһа тардыылары ааҕыыттан саҕаланна. Ааҕыыны Саха Өрөспүүбүлүкэтин үтүөлээх үлэһитэ Надежда Иванова санаа ымыыта оҥостубут толкуйунан, быһаччы кыттыытынан, улуус баһылыгын солбуйааччы Александр Комаров суруйааччы аатын сүгэр библиотека директора Николай Харлампьев, библиотекарь Луиза Кононова толордулар. Улуус, куорат тэрилтэлэрин салайааччыларыгар поэт саха омугун түҥ былыргытыттан күн бүгүнүгэр диэри ойуулуур ураты тутуллаах айымньыта үүммүт сылга саҥа толкуйдары, соруктары олоххо киллэрэллэригэр санаалары саҕалларыгар баҕарабыт!
Луиза Кононова, киин модельнай библиотека кыраайы үөрэтиигэ кылаабынай библиотекара
∗ Убаастабыллаах ааҕааччылар, Иван Михайлович Гоголев-Кындыл Уйбаан төрөөбүтэ 95 сылын түмүктүүр тэрээһиннэр тустарынан манна ааҕыҥ:
Егорова, Мария Егоровна. Кындыл Уйбаан: Ааппын ахтан ааһаарыҥ, таптыыр сахам тылынан…/ М. Е. Егорова. – Текст : электронный // Вилюйская библиотека : [сайт]. – 2025. – 15 дек. – URL: https://librvil.ru/2025/12/15/news15122025/ (дата обращения: 19.01.2026)
Куприянов, Николай Георгиевич. Бүлүүлэр Иван Гоголевынан киэн тутталлар, үтүө аатын өрө туталлар… / Николай Куприянов. – Текст : электронный // UlusMedia. Олох суола : [сетевое издание]. – 2025. – 12 дек. – URL: https://xn--80avakbauqq.xn--p1ai/b%d2%afl%d2%af%d2%afler-ivan-gogolevynan-kien-tuttallar-%d2%aft%d2%af%d3%a9-aatyn-%d3%a9r%d3%a9-tutallar/ (дата обращения: 19.01.2026)
