Улуу бэйиэт, драматург, прозаик, бөлөһүөк, Бүлүү улууһун ытык киһитэ Иван Михайлович Гоголев-Кындыл төрөөбүтэ 95 үбүлүөйдээх сылын Бүлүү улууһугар түмүктүүр тэрээһин М. Н. Жирков аатынан Култуура дыбарыаһыгар ахсынньы 12 күнүгэр буолан ааста.
Бу күн, саха норуодунай бэйиэтэ, Саха АССР ускуустубаларын үтүөлээх үлэһитэ, Арассыыйа уонна Саха суруйааччыларын литературнай бириэмийэлэрин лауреата, «Хотугу сулус» Россия литературнай бириэмийэтин бастакы лауреата, Саха комсомолун аатынан бириэмийэ лауреата Иван Михайлович Гоголев-Кындыл сүдү талааныгар сүгүрүйээччилэр муһуннулар.
Дьокуускай куораттан тэрээһиҥҥэ кытта кэлбит ыҥырыылаах ыалдьыттары дьоро түһүлгэҕэ мустубут дьон ытыс дохсун тыаһынан көрүстүлэр :
– Иван Гоголев-Кындыл улахан кыыһын, П. А. Ойуунускай аатынан Саха академическай тыйаатырын сүрүн худуоһунньугун, Арассыыйа уонна Саха Өрөспүүбүлүкэтин ускуустубаларын үтүөлээх үлэһитин Лена Ивановна Гоголеваны,
– П. А. Ойуунускай аатынан Саха академическай тыйаатырын, Саха АССР үтүөлээх уонна норуодунай артыыскатын Зоя Петровна Багынанованы,
— М. К. Аммосов аатынан Хотугу Илиҥҥи федеральнай үнүбүрсүтүөт саха литературатын кафедратын сэбиэдиссэйин, филологическай наука дуоктарын, СӨ култууратын үтүөлээх үлэһитин, СӨ суруйааччыларын Сойууһун чилиэнин Валентина Григорьевна Семенованы,
— П. А. Ойуунускай аатынан Саха академическай тыйаатырын, СӨ үтүөлээх артыыскатын Елизавета Федотовна Потапованы.
Иван Гоголев-Кындыл төрөөбүтэ 95 үбүлүөйдээх сылыгар, үгүс өрүттээх айар үлэтин уонна олоҕун сырдатар улуус таһымнаах тэрээһиннэр ыытыллыбыттарын туһунан И. М. Гоголев-Кындыл аатынан Бүлүүтээҕи кииннэммит бибилитиэкэ дириэктэрэ Николай Николаевич Харлампьев билиһиннэрдэ.
Бүлүү улууһа (оройуона) МТ, Бүлүү куоратын, Чочу нэһилиэгин, Халбаакы нэһилиэгин дьаһалтатын ааттарыттан эҕэрдэлээн ыалдьыттарга сибэкки дьөрбөтүн, өйдөбүнньүк бэлэхтэри туттардылар.
Ыалдьыттар Бүлүү дьонугар-сэргэтигэр истиҥник махтанан, санааларын сайа этэн, баҕа санааларын тиэрдэн дьону астыннардылар. Ыалдьыттар, Иван Гоголев «Хара кыталык» айымньыта киинэ буолан тахсарыгар Бүлүү дьоно өйүөхтэрэ диэн эрэллэрин эттилэр.
Лена Гоголева бэйэтин үлэлэриттэн махтанан туран Бүлүү улууһун, куоратын, Халбаакы, Чочу нэһилиэктэрин дьаһалталарыгар, Киин библиотекаҕа хартыыналарын бэлэх уунна.
Зоя Багынанова, Елизавета Потапова Иван Гоголев-Кындыл хоһооннорун ааҕан дьон биһирэбилин ыллылар.
Саха литератураны үөрэтээччи Валентина Семенова, Бүлүү улууһуттан төрүттээх суруйааччылар И. Гоголев-Кындыл, Семен Маисов курдук дьону ааҕааччы киэҥ араҥатыгар киэҥник тарҕарга, үөрэтэргэ болҕомтону уурарга баҕа санаатын эттэ. Семен Маисов «Ийэм кэпсиир» айымньытынан киинэ уһулларыгар баҕа санаатын үллэһиннэ.
Биир дойдулаахпыт саха суруйааччыта Николай Иванович Иванов – Кындыл Уйбааҥҥа анабыл хоһоонун аахта Н. Г. Чернышевскай аатынан Бүлүүтээҕи профессиональнай-педагогичесай колледж методист-наставнига Евгений Романович Алексеев.
Түмүктүүр чааһыгар, Алена Павлова туруоруутугар, Кындыл Уйбаан олоҕун сырдатар «Илбис иэйии, айар талаан чыпчаала» дьүһүйүүнү дьон-сэргэ астына көрдүлэр .
Саха тыллаах баарын тухары Иван Гоголев-Кындыл албан аатын ааттата, суон сураҕын сураҕырда туруоҕуҥ!
М. Е. Егорова, Бүлүүтээҕи Оройуоннай оҕо бибилэтиэкэтин кыл. библиограба
Фото: Владилена Софронова
