Төрөөбүт төрүт тыл уонна сурук-бичик күнүн чэрчитинэн олунньу 13 күнүгэр Оҕо оройуоннааҕы бибилэтиэкэтигэр үһүс төгүлүн «Мин сахабын» диэн уһуйаан бэлэмнэнии бөлөх иитиллээччилэрин икки ардыларыгар улуустааҕы олимпиада ыытылынна.
Олимпиадаҕа Хаҕын, Балаҕаччы, Халбаакы, Чочу, Бороҕон уонна Бүлүү к. уһуйааннарыттан барыта 18 оҕо кыттыыны ыллылар.
Олимпиада саҕаланыытыгар Аал уоту оттон, уот иччитин Хатан Тэмиэрийэни арыылаах алаадьыннан күндүлээн, кыынньар кымыһынан айах тутан, үрүҥ сиэлинэн маанылаан, библиограф Мария Егоровна Егорова алгыс сиэринэн-туомунан саҕалаата.
Олимпиада сүрүн сыалынан буолар оҕо сахалыы саҥаны истэн өйдүүр сатабылын, өбүгэ үгэһин билиитин, тобуллаҕас толкуйа, анаарыыта сайдарыгар, тылга интэриэһин тургутан көрүү.
Кыттааччылар анал эппиэттиир бланкаҕа, уопсайа 10 сорудахха үс ойууттан сөптөөх эппиэти бэлиэтээн, олимпиада сорудаҕын толордулар. Дьүүллүүр сүбэ үлэтин кэмигэр оҕолор саха төрүт оонньууларынан үөрэ-көтө оонньоотулар, алгыстаах алаадьыны астына амсайдылар. Дьүүллүүр сүбэ оҕолор эппиэттэрин бэрэбиэркэлээн, баалларын ааҕан түмүк маннык буолла.
Олимпиада кыттаачылара ким даҕыны толору 10 баалы ылбата. Онон бастакы миэстэҕэ ким да тиксибэтэ.
Иккис миэстэ 9 баалы ылан таҕыстылар:
Иванов Мичил, А. А. Миронов аатынан Мастаах оскуола уһуйаанын иитиллээччитэ;
Эверстова Кэрэли, Халбаакы «Кэнчээри» уһуйаан иитиллээччитэ;
Алексеева Алиса, Алексеева Камелия, Н. И. Афанасьев аатынан Бороҕон оскуола уһуйаанын иитиллээччилэрэ;
Шамаева Сайаана, Петрова Евангелина, «Туллукчаан» уһуйаан иитиллээччилэрэ;
Томская Динара, «Кустук» уһуйаан иитиллээччитэ;
Докторов Владислав, Хаҕын «Чэчир» уһуйаан иитиллээччитэ;
Үһүс миэстэҕэ 8 баалы ылан тигистилэр:
Максимов Ай-Уран, Слепцов Эрсан, «Аленушка» уһуйаан иитиллээччилэрэ;
Чабыева Альбина, «Куобахчаан» уһуйаан иитиллээччитэ;
Ионова Инесса, Сыдыбыл «Күнчээнэ» уһуйаан иитиллээччитэ;
Николаева Нарыйаана Куо, «Кустук» уһуйаан иитиллээччитэ;
Матвеева Анна, «Биһикчээн» уһуйаан иитиллээччитэ;
Филиппова Рената, Хаҕын «Чэчир» уһуйаан иитиллээччитэ.
Миэстэлэспит оҕолорго Добун суруктар, бары кыттааччыларга туоһу суруктар, бэлэмнээбит уһуйаан иитээччилэригэр махтал суруктар туттарылыннылар.
Бэрт сэргэх тэрээһин уопсай хаартыскаҕа түһүүннэн түмүктэннэ.
Кыттыыны ылбыт оҕо уһуйааннарыгар махтал тылларын этэн туран, оҕолорбутугар кыра саастарыттан төрүт култуурабытын, сахалыы сайдам тылбытын этигэр-хааныгар иҥэрэн, онон киэн туттар кэнчээри ыччаты иитэн таһаарыаҕыҥ.
САХА МАНДАР САҤАТА ХАҺАН ДА СҮППЭТИН, ӨРҮҮ БААР БУОЛА, САЙДА ТУРДУН!
В. В. Софронова, оҕо оройуоннай бибилэтиэкэтин кыл. бибилэтиэкэрэ
