Олунньу 13 күнүгэр оройуоннааҕы оҕо библиотекатыгар Россияҕа норуоттар сомоҕолоһууларын сылынан, Төрөөбүт тыл уонна сурук-бичик күнүн дэкээдэтин чэрчитинэн оскуола иннинээҕи саастаах оҕолоругар, төрөппүттэргэ, уһуйааччыларга «Араас омук остуоруйатын төрөөбүт тылбытынан кэпсиибит» аһаҕас күрэх ыытылынна.
Тэрээһини иилээн-саҕалаан ыыттылар Н. И. Ылахова аатынан «Алгыс» НКК, оскуола иннинээҕи саастаах «Аленушка» оҕону сайыннарар киинэ уонна оҕо оройуоннааҕы библиотеката.
Күрэх сыалынан-соругунан оҕоҕо төрөөбүт тылынан саҥарар саҥатын, кэпсиир дьоҕурун сайыннарыы, остуоруйа нөҥүө сахалыы өйү-санааны, култуураны иҥэрии, оҕо, төрөппүт уонна уһуйааччы бииргэ айар, кэпсиир үлэлэрин кэҥэтэн бэйэ ыккардыгар истиҥ сыһыаны үөскэтии, остуоруйа кэрэ эйгэтин арыйыы, уһуйааччылар ийэ тылынан үлэлиир сатабылларын үрдэтии буолла.
Күрэххэ «Аленушка», «Кустук», «Бүлүүчээнэ», «Алмазик», «Биһикчээн», Хаҕын нэһилиэгиттэн уһуйааннар кытыннылар. Бары да ирдэбилгэ эппиэттиирдии бэлэмнэнэн, ох курдук оҥостон кэлэн, көрдөрөр-иһитиннэрэр матырыйаалы хото туһанан, дьоруойдар оруолларын табатык толороннор, айымньыга сыһыаннарын, дьоҕурдарын арыйаннар, күөн көрүстүлэр.
Күрэх кыайыылаахтарын ааттара ааттанан, кыайыы өрөгөйүн ситистилэр:
1 миэстэ – «Биһикчээн» оҕону сайыннарар киинтэн «Таал-таал эмээхсин» остуоруйаны толороннор, сал. Осипова Алена Егоровна, төрөппүт Иванова Мария Сергеевна, уһуйаан иитилээччитэ Аня Матвеева.
2 миэстэ – «Кустук» оҕо тылын сайыннарар уһуйаантан «Икки көҥөс эһэчээннэр» остуоруйаны толороннор, сал. Ионова Алина Ионовна, төрөппут Кырбасова Мария Александровна, уһуйаан иитилээччитэ Кырбасов Айтал.
3 миэстэ – «Алмазик» оҕону сайыннарар киинтэн «Кэҕэ» остуоруйаны толороннор, сал. Васильева Татьяна Ивановна, төрөппүт Спиридонова Анна Алексеевна, уһуйаан иитилээччитэ Спиридонова Алиса.
Бу тэрээһин сүрүн соругун толордо, бары кыттыбыт дьоммутугар махтанан туран Дьиэ кэргэҥҥэ суолталаан оҕоҕо сахалыы кинигэни аахтахха, кинигэҕэ тапталы ииттэххэ, билиини иҥэрдэххэ, сахалыы төрүт тылбытынан саҥардахпытына, төрүт тылбыт саха тыла – уйэлэр тухары баар буола туруо диэн эрэллээхпит.
Мария Егоровна Егорова,
Оҕо библиотекатын кылаабынай библиограба
