Төрөөбүт төрүт тыл уонна сурук-бичик күнүн чэрчитинэн олунньу 13 күнүгэр Оҕо оройуоннааҕы бибилэтиэкэтигэр иккис төгүлүн ыытыллар «Мин сахабын» диэн уһуйаан бэлэмнэнии бөлөх иитиллээччилэрин икки ардыларыгар улуустааҕы олимпиада ыытылынна. Олимпиадаҕа ыраах Хаҕын, Чочу, Чинэкэ уонна Бүлүү к. уһуйааннарыттан барыта 18 оҕо кыттыыны ыллылар.
Олимпиада саҕаланыытыгар библиограф Мария Егоровна Егорова саха киһитэ үрдүк күүстэри кытта алтыһар бэлиэтин Аал уоту оттон, алаһа дьиэ хаһаайыныттан, Хатан Тэмиэрийэттэн бэттэх көрөн, мүчүк гынарыгар көрдөһөн арыылаах алаадьыннан айах тутан, кыынньар кымыһынан, үрүҥ сиэлинэн маанылаан көрдөһөр сиэрин оҕолор олуһун сэҥээрдилэр.
Тэрээһин сүрүн сыалынан оҕо сахалыы саҥаны истэн өйдүүр сатабылын, өбүгэ үгэһин билиитин, тобуллаҕас толкуйа, анаарыыта сайдарыгар, тылга интэриэһин тургутан көрүү буолла.
Күрэҕи Оҕо оройуоннааҕы бибилэтиэкэтин сэбиэдиссэйэ Владилена Владимировна Софронова иилээн-саҕалаан ыытта. Кыттааччылар 10 ойууттан турар сорудахтар, сөптөөх эппиэттэрин бэлиэтииллэрин курдук бэриллибит анал бланкалардаах сорудахтары толордулар. Дьүүллүүр сүбэ үлэтин кэмигэр оҕолор саха төрүт оонньууларынан үөрэ-көтө, астына оонньоотулар, алгыстаах алаадьыны астына амсайдылар.
Олимпиада кыттаачылара уопсай ылбыт баалларыттан быһааран, толору 10 баалы ылбыт биир бастыҥ Добун кыайыылаах аата ааттанна. Ол курдук кыайыылаах үрдүк аатын ылары ситиспит оҕоннон буолла «Бүлүүчээнэ» оҕо уһуйаанын иитиллээччитэ Эрсан Афанасьев. Бары кыттааччыларга туоһу суруктар, бэлэмнээбит уһуйаан иитээччилэригэр махтал суруктар туттарылыннылар.
Бэрт сэргэх тэрээһин оһуокайынан түмүктэннэ. Оһуокай тылын таһаарда «Аленушка» уһуйаан иитиллээччитэ Кирилл Макаров.
Кыттыыны ылбыт оҕо уһуйааннарыгар махтал тылларын этэн туран, кустук өҥнөөх, кымыс сыттаах саха мандар саҥата сүппэккэ, баар буола турдун диибит.
Мария Егоровна Егорова, Оҕо оройуоннааҕы бибилэтиэкэтин библиограба
