Ийэ тыл, сурук-бичик күнүгэр, Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну, Бүлүү улууһугар уһулуччулаах государственнай уонна политическэй деятель Г.И.Чиряев, Арыылаах нэһилиэгэр Үбүлүөйдээх нэһилиэк сылларыгар аналлаах тэрилтэлэр икки ардыларыгар «Төрөөбүт тыл – түмэр түһүлгэтэ» интеллектуальнай шоу-күрэх буолан ааста.
Тыл – саха омук үтүмэн үйэлэргэ чочуйбут, чопчулаабыт өйдөбүлэ, өлөрү кыайбат өйө. Саха тылыгар норуоппут олоҕо, кута-сүрэ, майгыта-сигилитэ, өйө-санаата, иэйиитэ, философията барыта баар. Ийэ тыллаах буоламмыт көҥүл дуораhыйар, ыллыыр-туойар аналлаахпыт.
1996 сыллаахха Саха бастакы президенэ Михаил Ефимович Николаев уурааҕынан олунньу 13 күнэ сахалартан бастакы лингвист-учуонай Семен Андреевич Новгородов төрөөбүт күнүгэр сөп түбэһиннэрэн — Ийэ тыл күнүнэн бэлиэтэнэр.
Хас биирдии тэрилтэттэн түөртүү кыттааччы, биирдии жюри кытынна. Өрө тыҥааһыннаах күрэх түмүгүнэн «Кэскил» оҕо уһуйаан хамаандата бастакы миэстэни, иккис миэстэни кыра тэрилтэлэр хомуур хамаандалара, үһүс миэстэни театральнай оскуола хамаандата ыллылар. Оскуола алын сүһүөх оҕолоругар биктэриинэ ыытылынна.
Г. З. Колодезникова, Арыылаах модельнай бибилэтиэкэтин кыл. бибилэтиэкэрэ
