Муус устар 19 күнүгэр В. О. Каратаев аатынан Олонхо дьиэтигэр Саха Өрөспүүбүлүкэтин култууратын туйгуна, Бүлүүтээҕи И. М. Гоголев-Кындыл аатынан норуодунай театр тутаах артыыската Галина Спиридоновна Алексеева үбүлүөйдээх сааһыгар анаан «Илбис иэйии, айар талаан аартыгынан!» диэн айар киэһэтин тэрийдэ.
«Тыл – литература – театр» диэн быстыспат ситимнэр. Театр норуот үйэттэн үйэҕэ илдьэ кэлбит өлбөт-сүппэт айымньыларын, суолталаах суруйууларын киэҥ эйгэҕэ билиһиннэрэр, кэнэҕэски ыччакка тиэрдэр эппиэттээх үлэни толорор. Онтон айымньы дьоруойун олоҕун, хатыламмат дьылҕатын, тапталын, араас түһүүлэрин-тахсыыларын көрөөччүлэргэ толорон тиэрдээччи артыыстар буолаллар.
Галина Спиридоновна 1999 сылтан, үйэ чиэппэрин устата, сүрүн үлэтин таһынан театрга айымньылаахтык үлэлээн кэллэ. Кини үгүстүк көр-күлүү жанрыгар оонньуурун таһынан, трагедийнай, лирическай образтары кыайа–хото тутар. Ол курдук Максим Горькай «Васса Железнова» диэн айымньытыгар Вассаны, Англия улуу патриот дьахтара Кэт Марсдены, Кындыл Уйбаан «Хара кыталык» романыгар Хараанайы, Степан Ефремов «Ини бии» драматыгар Балбаараны, Харысхал «Сэрии тыйыс тыына» драматыгар Огдооччуйаны, Иван Егоров «Хобороос» поэматынан «Хобороос хотойдоро» испэктээххэ 5 оҕотун сүтэрбит Евдокия Малгинаны, Куорсуннаах «Аана дьылҕата» драматынан испэктээххэ Мария Оросинаны, Анемподист Софронов «Олох дьэбэрэтэ» драматынан испэктээххэ Алааппыйаны, онтон да атын улахан оруоллары чаҕылхайдык, итэҕэтиилээхтик оонньоон үгүс дьон биһирэбилин ылбыта. «Бастыҥ дьахтар оруола» диэн үрдүк анал ааты сүкпүтэ.
Н.И. Ылахова аатынан «Алгыс» национальнай культурнай киин тумус туттар үлэһитин айар дьоро киэһэтин сонуннук толкуйдаан бэлэмнээбит.
Ол курдук кэлбит дьон Отеллолаах Дездемонаны, граф Вронскайы, Анна Каренинаны, Рашеллаах Прохоры, Наденькалаах Гурийы, Баачыкалаах Суон Суоппуйаны уонна биллэн турар, Күндү Күлүүгү кытары Бүлүү куоратыгар айаҥҥа туруннулар… Төһө да кэм аастар, өрүү чугас, сүрэххэ сылдьар биллэр айымньылар аатырбыт персонажтарын чугастык көрөн бука бары дуоһуйа күллүлэр-үөрдүлэр.
Салгыы сыана бэтэрээнэ, үбүлүөйдээх Галина Спиридоновна «Сэлээппэ», «Ойбоҥҥо», «Эрэйдээх да быыбар», «Сор да сибээс» диэн кылгас сыаҥкаларга оонньоон көрөөөччүлэрин ытыстарын хабыллар тыаһынан айхалланна. Кини оруоллара бииртэн биир сонун, сэргэх, дьону тардар, умсугутар ураты тыыннаахтар. Кындыл Уйбаан «Хара кыталык» романыттан Хараанай эмээхсин монологун ааҕыытын толору саала иһийэн уйаннык ылынна. Экраҥҥа театр режиссера Маргарита Алексеевна Соколова «Бүөккэ» диэн испэктээҕинэн уһуллубут уус-уран киинэттэн быһа тардыыта көһүннэ. Манна артыыска сүрүн оруол (уол) эбэтин олус итэҕэтиилээхтик оонньоон дьон хараҕын уутун таһаарбытын бу да сырыыга уйадыйа көрдүбүт.
Истиҥ киэһэҕэ айар куттаах Далбар хотун бэйэтин сүгүрүйээччилэригэр аны биир кистэлэҥ талаана арылынна. Тыл ууһугар умсугуйар, тыл күүһүгэр итэҕэйэр буолан, бэйэтэ айарга холонорун сэгэтэн билиһиннэрдэ уонна «Ахтылҕан», «Кыайыы 75 сыла» диэн хоһооннорун ааҕан иһитиннэрдэ.
Ити курдук, айар үлэни аргыс оҥостон үлэни өрө туппут кэрэ киһи Бүлүүбүт куоратыгар биир бэлиэ, үтүө түгэни тосхойдо. Маннык сааскы кэрэ киэһэни сахабыт суруйааччылара Дмитрий Дыдаев, Сэмэн Данилов, Николай Чуор, Уйбаан Уххан, Наталья Михалева-Сайа, Саргылана Гольдерова хоһоонноро ситэрэн-хоторон, ыпсаран биэрдилэр. Ылбаҕай ырыа ылланна, ыччаттар дьиэрэҥкэй тэптилэр.
Сөбүлээн ааҕар бэйиэтим, суруйааччы Николай Чуор хоһоонун тыллара хайдах эрэ, бу киэһэҕэ анаммыт курдуктар. Галина Спиридоновнаҕа махтанан уонна бары үтүөнү баҕаран туран, ону салайдаҕым буоллун:
…Кэрэҕэ алтыһар үчүгэй даҕаны
Кэрэни кэрэхсиир оо, күндү даҕаны,
Кэрэттэн үөрэрбит дьикти да үчүгэй
Кэрэлиин ыллаһар дууһабар күөрэгэй.
Кэрэни кэрэхсиир үтүөкэн киһиэхэ
Күн өрүү сырдыктык, сылаастык мичээрдин,
Мэлдьитин, өрүүтүн сүрэххэр
Дууһаҕар күөрэгэй ыллаатын!
Луиза Кононова, киин бибилэтиэкэ кыраайы үөрэтиигэ кыл. бибилэтиэкэрэ
