Быйылгы «БИБЛИОНОЧЬ – 2024» Россияҕа Дьиэ кэргэн, Саха Өрөспүүбүлүкэтигэр Оҕо сылларын чэрчилэринэн «ДЬИЭ КЭРГЭНИНЭН ААҔАБЫТ» тэрээһин тула ыытылынна. Сылын ахсын ыытыллар акцияҕа кыттыһан И. М. Гоголев-Кындыл аатынан Бүлүүтээҕи бибилэтиэкэ муус устар 19 күнүгэр ааҕааччылары кинигэ тула түмэн, сэргэх тэрээһиннэри ыытта.
Бу күн бүтүн Россия библиотекалара 13 төгүлүн ырыалардаах, хомоҕой хоһооннордоох, хоһоону көҥүл ааҕар, квиз оонньуулардаах былаһааккаларга кубулуйдулар.
Библиотека баар – ааҕааччы баар буолан. Бэргэн этии баар: Биир кинигэ тыһыынча киһини үөрэтэр, эбэтэр Кинигэ көмөтө суох ӨЙ – кыната суох чыычаахха тэҥнээх диэн. Аан дойду дьоно олорон ааспыт олоҕо, билбит билиитэ, өйө-санаата барыта кинигэҕэ тиһиллибит.
Оҕо бибилэтиэкэтигэр оҕолорго, дьиэ кэргэттэргэ «Литературная радуга» викториналар ыытылыннылар.
Ньургуйаана Алексеевна Иванова кыра кыыһынаан «Куобахчаан» оҕо уһуйааныгар сылдьар Нарыйаанатынаан хас биирдии геройу күрүчүөгүнэн баайаннар – куукула оҥороннор, мустубут оҕолорго «ТЕРЕМОК» остуоруйаны көрдөрдүлэр, оҕолору олус астыннардылар.
Ыччат бибилэтиэкэтигэр «БИБЛИОНОЧЬ 2024» тэрээһини, И. Л. Кондаков аатынан Бүлүүтээҕи гимн 5 «б» кыл. үөрэнээччилэрэ «КИНИГЭНИ ААҔЫҤ» диэн Анастасия Егорова хоһоонунан арыйдылар.
Хайа баҕар киһи тугунан эмэ үлүһүйэ сылдьар, санааҕа баттатар дуу, эбэтэр үлүскэн үөрүүтүн үллэстэр кэмигэр дуу, таба тайаммыт хоһоонноро күүскэ дьайар суолталаахтар, киһи туругун ойуулуур, киһи дууһатын кылын таарыйар, өрүһүйэр, өрүкүтэр күүстээхтэр.
Биллэн туран хоһоон, поэма ааҕааччылардаах, сүгүрүйээччилэрдээх буолар. Төһөлөөх көлүөнэ дьон улуу нуучча суруйааччыларын Пушкины, Лермонтовы, Есенины уо.д.а, саха суруйааччыларын устар ууну сомоҕолообут, тыл эгэлгэ өҥнөрүн оонньоппут, сир симэҕин дыргыл сытын курдук – литература дууһата буолбут хоһооннордоох Өксөкүлээх Өлөксөй, Күннүк Уурастыырап, Петр Тобуруокап, Семен Данилов, Иван Гоголев-Кындыл, Михаил Тимофеев, Варвара Потапова уонна да үгүстэр хоһооннорун умсугуйа аахпыттара буолуой?
Степан Аржаков аатынан дьиэ кэргэҥҥэ иитиини өйүүр Бүлүүтээҕи кииниттэн Анна Игнатьева Н. Михалева-Сайа «Музейга», Максим Петров Борис Лихарев «Письмо солдата», сир симэхтэрэ кырачаанар Сайаана, Сайаан Шамаевтар, Сюзанна Петрова, Н. Чернышевскай аат. Бүлүүтээҕи профессиональнй-педагогическай колледж студеннара Глория Докторова М. Тимофеев «Умнубат оскуолам», Дьулус Федоров С. Есенин «Вот оно глупое счастье», Борис Васильев А. Пушкин «Во глубине сибирских руд», Антон Ноев СӨ гимнин, Сюзанна Петрова С. Кадашников «Летела с фронта похоронка» хоһооннору аахтылар.
Оҕо саастан хас эмэ көлүөнэ аптаах, алыптаах остуоруйалары ааҕан аҕай кэллэхпит. Остуоруйа барахсан мүччүргэннээх сырыылара толкуйдатан, муударай буоларга, үтүө холобурга, доҕордоһууга, өйдөһөргө, убаастаһарга, үөрэппиттэрэ буолуой? Бэркэ билэр остуоруйа дьоруойдара Хаар королева, Билбэтчэй, Муха-Цокотуха, Буратино, билиҥҥи олоххо балысханнык киирбит иностранка-Интернет ыалдьыттааннар, көрдөөх оонньуулары оонньотоннор, үҥкүүлэтэннэр мустубут оҕолор үөрдүлэр-көттүлэр.
Аахпыт кинигэ тугунан болҕомтону тарпытын, тугунан долгуппутун, ханна-хаһан, хайдах туох буолбутун, тугунан алыптаабытын – дьиэ кэргэҥҥэ кэпсэтэн ырытыһан, оҕоҕо интириэһи үөскэтии, ааҕыыга уһуйуу саҕаланар – Дьиэ кэргэнтэн!
Бу күн Оҕо бибилэтиэкэтэ ыытар араас тэрээһиннэригэр эҥкилэ суох кыттар, ааҕар, бэйэлэрин көрүүлэрин, билиилэрин санаа кынан үллэстэ Стручковтар, Ивановтар «Кинигэ алыбар, уйдаран» диэн дьиэ кэргэҥҥэ ааҕыы ураты суолтатын бэлиэтээннэр, ох курдук оҥостон, сөбүлүүр остуоруйаларын геройдарынан таҥнан кэлэннэр, киэҥ сэҥээриини ыллылар. Кэрэни сэргиир, хас биирдии киһини астыннарар, хараҕы сымнатар, күнүн ахсын араас тиһик тэрээһиннэргэ дьону үөрдэр «Аламай» сибэкки салонун үлэһитэ, тарбаҕар талааннаах, кинигэни ааҕарын олус сөбүлүүр Сардаана Николаевна Стручкова, кыыһа 1№-дээх начальнай оскуола 3 кылааһын үөрэнээччитэ Викториялыын тугу ааҕалларын кэпсээтилэр, онон сирдэтэн араас оҥоһуктары оҥорбуттарын көрдөрдүлэр. Виктория саамай сөбүлүүр, олус истиҥ, бэһиэлэй айымньыта Э. Успенскай «Приключения в Простоквашино» буоларынан, кот Матроскин көстүүмүн кэппиттэр.
Ньургуйаана Алексеевна Иванова – Г. С. Донской аат. 2№-дээх орто оскуола педагог- психолога, улахан дьиэ кэргэн истиҥ иһирэх ийэтэ. Бу намыын намчы сэбэрэлээх, холку эрээри, барыны бары үмүрүтэ тута охсор, кэрэни кэрэхсиир, оҕолорун кытта өрүү бииргэ буолар кэрэ киһи. Илииннэн оҥоһуу, уруһуй күрэхтэрэ, ааҕыы күрэҕэ буоллун: этэн, ыйытан саҕалаатыҥ да улгумнук сөп диэбитэ баар буолар. Бары сатабылын оҕолоругар туһаайар киһи. Ньургуйаана Ивановна черепаха Тортилла, Нарыйаана Василиса Прекрасная көстүүмүн тиктэн кэтэн кэлэннэр сөхтөрдүлэр. Оҕолоругар анаан араас теманнан кыра кинигэ оҥороллорун кэлбит дьоҥҥо көрдөрөн сиһилии кэпсээн, астыннарда.
Дьиэ кэргэн Стручковтар, Ивановтар ааҕыы оруола улаханын, оҕо көрүүтүгэр, сайдыытыгар дьиҥ суолтатын ыйдылар.
Бу икки Ийэлэр — оҕолоругар бииргэ тиһиллибит оҕуруо курдук олус ыкса ситимнээх, истиҥ, чугас сүбэһиттэрэ, көмөлөһөөччүлэрэ буолалларын киһи эрэ астына, сөҕө-махтайа көрөр. Бары Дьиэ кэргэн өрүү ситимнээх, бөҕө туруктаах, дьол-соргу аргыстаах, истиҥ иэйиилээх, дойдубутугар бэриниилээх буолуоҕуҥ диэн туран Михаил Тимофеев тылларыгар, Елена Олбутцева мелодиятыгар «Бүлүү вальса» ырыаннан эҕэрдэлээтэ СӨ культуратын туйгуна Августина Семенова.
Баян долгутар тыаһыттан, баян эйээрэр доҕуһуолуттан хайа саха киһитин сүрэҕэ эппэйэ үөрбэт буолуоҕай, эдэр сааска, кулууп кистэлэҥ кэтэһиилээх кэрэ киэһэлэрин санаан, аҕа көлүөнэ, орто саастаах дьон бары да олуһун долгуйарбыт. Өр сылларга ыһыахтарга «Үрүҥ түүн үҥкүүтэ» баянынан күрэҕи Киин бибилэтиэкэ элбэх дьонноох дьоро киэһэни ыытарын, ол кэрэ кэмнэри санаттылар М. Н. Жирков аат. Бүлүүтээҕи оҕо искусствотын оскуолатыттан «Бүлүү уоттара» ансамбль, баян кылааһын үөрэнээччилэрэ – 2023 с. Уфа к. ыытыллыбыт II-с норуоттар икки ардыларынааҕы баянистар күрэхтэрин Дипломаннара – Лиза Сосунова, Маша Волкова, Тимур Никифоров, Дархан Шамаев. Салайааччы СӨ культуратын үтүөлээх үлэһитэ, Бүлүү к. Өрөгөй ырыатын мелодиятын автора Алексей Васильев. Баян тыаһын дьикти алыбар ылларбыт, мустубут дьоҥҥо араас дойду музыкаларын оонньоон иһитиннэрдилэр. Ол курдук саха норуотун геройа Манчаарыны, казах омукка киэҥник биллэр «Иди вперед, назад не оглядывайся», киһи дууһатын ыраастыыр, көҥүл буоларга сирдиир индеецтэр «Полет Кондора», кэрэ кыыс уолу таптыы көрбүтүн, эргиллэн кэлэригэр эрэммитин кэпсиир «Амана Кукарена Ша-ла-ла», Кытайга киэҥник биһирэммит «Не уходи вечная любовь» уо.д.а оонньооннор көрөөччүлэр «браво» дохсун ытыс тыастарын бэлэхтээтилэр.
Улуус киин модельнай бибилэтиэкэтигэр Дьиэ кэргэнинэн «НАША ЧИТЮЩАЯ СЕМЬЯ» квест-оонньуу ыытылынна. 5 араас сорудахтан турар станцияларынан сорудахтары толордулар. Кыайыылаахтар ааттара ааттанна:
1миэстэ – Николаевтар;
2 миэстэ — Кычкиннар;
3 миэстэ – Ушницкайдар.
Олус умсугутуулаах, киһи сөҕө-махтайа көрөр баататтан куукула оҥоруутугар маастар-кылааһы иилээн саҕалаан ыытта М. Н. Жирков аат. Бүлүүтээҕи оҕо искусствотын оскуолатын уһуйааччыта Елизавета Маныкина.
Бүлүү к. олохтоохторун «Сундучок семейных реликвий» диэн дьиэ кэргэн төрүттэриттэн бэркэ сэрэнэн харыстаан, харайан кэлбит үйэлээх өйдөбүнньүктэрин быыстапката дьон болҕомтотун тарта.
Мария Максимова, ийэтэ Титарова Павла Титовна тутта сылдьыбыт малларын, былыргы сахалыы алпабыытынан суруллубут кинигэлэрин, дөкүмүөннэрин аҕалан көрдөрдө, сэһэргээтэ.
Мантан сайын хас ыал тэлгэһэтин киэргэтэр, киһи эрэ хараҕа сэргии көрөр, дууһата үөрэр кэрэ сибэкки рассадаларын атыыга туруордулар Римма Григорьева, Елизавета Маныкина.
Саха сиригэр эрэ буолбакка, бүтүн Россия регионнарын сэҥээриилэрин ылбыт «Айар» кинигэ кыһатын араас кинигэлэрин атыыта туруорулунна.
Мария Егорова, Оройуоннааҕы оҕо бибилэтиэкэтин кыл. библиограба
