Оҕону иитии, идэҕэ бэринии үтүө холобура

Дьиэ кэргэн сылыгар анаан улуус, нэһилиэктэр библиотекаларыгар араас хайысхалаах  үлэ былааннаахтык тэриллэр. Киин библиотекаҕа муус устар 8 күнүгэр  олохторун ыччаты үөрэтиигэ-иитиигэ анаабыт учуутал дьиэ кэргэн Афанасий Николаевич уонна Татьяна Алексеевна Андреевтар тустарынан «Тулааһын дьоммут» диэн саҥа кинигэни билиһиннэрдибит.


Киһи эрэ кэрэхсиэх тупсаҕай оҥоһуулаах баай ис хоһоонноох кинигэни Андреевтар орто кыыстара учуутал идэлээх Саха Өрөспүүбүлүкэтин үөрэҕириитин туйгуна Ульяна Афанасьевна Васильева хомуйан, бэчээттэтэн дьоҥҥо-сэргэҕэ таһаарда.

Кинигэ икки тылынан суруллубут. Дьокуускай куорат  «Алта» издательствотыгар таҥыллан «Дани-Алмас» компания типографиятыгар бэчээттэммит. 400 сирэйдээх, 130 ахсааннаах.

Ааптар тапталлаах төрөппүттэрин, Учуутал дьиэ кэргэн, төрдүн-ууһун, олоҕун, айымньылаах үлэтин архыып, бэчээт матырыйаалларыгар, элбэх дьон истиҥ ахтыыларыгар олоҕуран ааҕааччыга толору тиэрдибит. Ис хоһоонун хаартыскалар, эбии матырыйааллар өссө арыйан, байытан биэрбиттэр. Боччум миэстэни киэҥ аймах төрүччүтэ ылбыт.

Кинигэни билиһиннэрии тутулун кылгас ырытыыттан саҕаланна. Дьон болҕомтотун Андреевтар балтылара Мария Дмитриевна Андреева учуутал аймах төрүччүтүн көрдөрөр быыстапканы сиһилии кэпсээбитэ тарта.

Мантан көстөрүнэн биэс бииргэ төрөөбүт бырааттыы Андреевтартан үс көлүөнэ тухары 27 педагог иитиллэн тахсыбыт. Кинилэр  уопсайа 555 сыл үлэ ыстаастаахтар. Аҥардас Афанасий Николаевич дьиэ кэргэнин педагогическай ыстааһа 165 сыл буолбут.

Салгыы кинигэ сүрүн түһүмэхтэринэн кэпсэтии тэрилиннэ. Ол курдук «Өтөх төҥүргэстээх, сурт кэриэстээх» «Киһи-хара буолбут биһиктэрэ», «Учуутал, уһуйааччы, салайааччы уһаарыллыыта», «Силлибэт ситим утахтара» түһүмэхтэргэ чугас аймахтар, биир идэлээхтэр, үөрэнээччилэр бииртэн биир сэргэх ахтыылары оҥордулар.

Ордук сэҥээриини сонун «Сылаас холумтан» диэн дьиэ кэргэн үгэстэрин кэпсиир уонна «Аҕабыт аман өһө, ийэбит иһирэх иэйиитэ» түһүмэхтэр ыллылар. Иккис түһүмэххэ ыал аҕата Афанасий Николаевич биир дойдулаахтарын, тыа сирин үлэтин, үөрэҕириини сайыннарыы боппуруостарыгар бэчээккэ суруйуулара, онтон ыал ийэтэ Татьяна Алексеевна Баппаҕаайы оскуолатын 70 сыллаах үбүлүөйүн көрсө суруйбут үс көстүүлээх дьоһун  пьесата киирбит.

Кинигэ ааптар Ульяна Васильева өр кэмҥэ хомуйбут, таҥмыт матырыйаалларын билсэн, ааҕан баран ханнык туох санааларга кэлбитин суруйбутунан түмүктэммит. Төрөппүттэрин олорбут дьоһун олохторун, оҥорбут үтүө дьыалаларын ырытан ааҕааччыга тиэрдибит уонна саамай сөпкө бэйэлэрин бириэмэлэрин чаҕылхай бэрэстэбиитэллэринэн сыаналаабыт. Маны барытын истээччилэр толору биһирээтилэр уонна Ульяна Афанасьевнаҕа махтанан туран, өссө да саҥа суруйуулары таһаарарыгар алгыстарын анаатылар.

Үс чаас устата сүрэхтэммит бэртээхэй кинигэ ааптарын, бары үлэлэспит дьону ытык кырдьаҕас Ирина Петровна Прокопьева мандолинаҕа оонньоон, онтон Егор Евдокимов, Василий Николаев, Матрена Сивцева, Виктор Платонов ылбаҕай ырыаларынан эҕэрдэлээтилэр. Бүлүүбүт педколледжын коллективыттан элбэх сэҥээрээччи, ырыа куттаах эр дьон кэлэн кыттыбыттара көрсүһүү үөрүүтүн өссө үрдэттэ.

Бу маннык, холумтан сылааһынан сыдьаайар,  сырдык тыыннаах кинигэ хас биирдии дьиэ кэргэҥҥэ оҕону иитии үтүө холобура, ыччат дьоҥҥо, үөрэх эйгэтин үлэһиттэригэр идэҕэ бэринии сэргэх сэһэнэ буолан күннэтэ туттуллар остуол кинигэтэ буоларыгар баҕарабыт!

Луиза Кононова, киин библиотека  кыраайы үөрэтиигэ  кылаабынай бибилэтиэкэрэ


∗ Автор фотографий:Алена Степанова, Комплексный отдел обслуживания


Оставить комментарий

Наш сайт использует файлы cookies, чтобы улучшить работу и повысить эффективность сайта. Продолжая работу с сайтом, вы соглашаетесь с использованием нами cookies и политикой конфиденциальности.

Принять
Обратная связь