Кулун тутар 5 күнүгэр Бүлүү киин библиотекатыгар Россия суруналыыстарын уонна Саха Өрөспүүбүлүкэтин суруйааччыларын Союһун чилиэнэ, өрөспүүбүлүкэ бочуоттаах бэтэрээнэ, Бүлүү куоратын уонна Бастакы Тоҕус нэһилиэгин Бочуоттаах гражданина Аким Алексеевич Степанов-Акыым Дуолан «Туоҕа Боотур алгыһынан» диэн саҥа кинигэтэ сүрэхтэннэ.
Акыым Дуолан 1935 сыл тохсунньу 10 күнүгэр Бүлүү оройуонугар Бастакы Тоҕус нэһилиэгин Орто күөл алааһыгар төрөөбүтэ. Милиция оскуолатын бүтэрэн 1964 сылтан 1981 сылга диэри Магаданынан, Чукотканан, Бүлүүгэ ИДЬМ органнарыгар үлэлээбитэ. Кэлин айар, суруйар дьарыктанан, суруналыыс быһыытынан Бүлүү оройуонун «Олох суола», өрөспүүбүлүкэ «Арчы-Забота» хаһыаттарыгар общественнай корреспонденынан үлэлээбитэ.
Кини ааҕааччылар биһирэбиллэрин ылбыт ураты тыллаах-өстөөх поэт, кэпсээнньит, суруналыыс, элбэх кинигэ ааптара. Ордук төрөөбүт дойдутун, Бастакы Тоҕус нэһилиэгин историятын, биир дойдулаахтарын туһунан эрдэтээҥи научнай чинчийиилэргэ, буолбут чахчыларга олоҕуран суруйара кэрэхсэбиллээх. Өссө 1998 сыллаахха «Бастакы Тоҕус – Бүлүү ытык алаһата», «Аан дойду алаастан саҕаланар» /2001/, «Былыт саппыт уруккута» /2019/ диэн кинигэлэри таһааран турар.
390 сылтан ордук кэм иннигэр үөскээбит нэһилиэк дириҥ историятын, ураты дьарыктаах дьонун кэпсиир саҥа «Туоҕа Боотур алгыһынан» кинигэтэ ааспыт сыл атырдьах ыйыгар «Майапринт» дьоҕус бэчээттиир тэрилтэҕэ таҥыллан тахсыбыт. 138 сирэйдээх 50 ахсааннаах.
Ааптар Туоҕа Боотур удьуордарын утумун Сэһэн Боло, Вацлав Серошевскай, Гавриил Ксенофонтов сахалар тустарынан чинчийэн суруйбут улахан үлэлэриттэн сүүйэн ылан кинигэтигэр биир сиргэ түмпүт.
Төһө да ытык сааһыгар сырыттар, Аким Алексеевич, истээччилэргэ кинигэтин ис хоһоонун, суолтатын быһааран кэпсээтэ. Өр кэмҥэ иитиэхтии сылдьыбыт баҕа санаатын толорон, бэчээккэ таһааран эт илиитигэр тутан олороругар муҥура суох үөрэрин биллэрдэ.
Кинигэ иккис аҥарын олох эгэлгэ көстүүтүн ойуулуур, сүрэх нарын иэйиитин истиҥник этэр, айылҕаны хоһуйар хомоҕой хоһоонноро ылбыттар.
Акыым Дуолан үйэлээх үлэтин сыаналаан, бу күн дойдутуттан, Бастакы Тоҕустан, нэһилиэк баһылыга Акимар Акимович Михайлов, библиотекарь Анастасия Марковна Егорова, чугас аймахтара Зинаида Николаевна Сергина, Наталья Васильевна Новикова, Халбаакыттан Надежда Николаевна Семёнова кэлэн эҕэрдэлээн истиҥ санааларын үллэһиннилэр. Бүлүү куоратыттан саха суруйааччыта Николай Иванович Иванов кинигэ иитэр, үөрэтэр улахан суолтатын ыйан туран, салгыы бу хайысхаҕа үлэлииргэ этиилэри киллэрдэ.
Кииннэммит библиотека директора Николай Харлампьев ытык саастаах суруйааччыга уонна кинигэ тахсарыгар көмөлөспүт нэһилиэк баһылыгар махтал суруктары кытары өйдөбүнньүк бэлэхтэри туттарда.
Бүлүүтээҕи профессиональнай-педагогическай колледж алын кылаас учууталларын бэлэмниир салаатын студеннара Борис Васильев, Анатолий Семенов, Антон Ноев суруйааччы хоһоонноруттан ааҕан, онтон Тыымпы ырыа куттаах Далбардарын «Уйгу» вокальнай бөлөҕө биир дойдулаахтара Родион Еремеев уонна Алексей Егоров суруйбут «Дьикти түгэн» ырыаларын толорон мустубут дьон сүргэлэрин өссө көтөхтүлэр.
Онтон уйан дууһалаах, иэйэр куттаах суруйааччы долгуйан туран кэрэ аҥаардарга бэйэтин хоһоонун аахпыта уонна бар дьонугар махтал, алгыс үтүө тылларын анаабыта ытыс дохсун тыаһынан арыалланна.
Бу курдук, чахчы да, сааскы ылааҥы күн библиотека киэҥ саалатыгар эмиэ биир дьикти умнуллубат түгэн тосхойдо.
Луиза Кононова, киин библиотека кыраайы үөрэтиигэ кылаабынай бибилэтиэкэрэ
