Кулун тутар 1 күнүгэр, Бүлүүтээҕи оройуоннай оҕо бибилэтиэкэтин үлэһиттэрэ, ыччат бибилэтиэкэтин сүрүн бибилэтиэкэрэ М. А. Иванова уонна И. М. Гоголев-Кындыл аатынан Бүлүүтээҕи кииннэммит библиотечнай ситим дириэктэрин солбуйааччыта Ф. А. Игнатьева буолан «Вы еще не читаете, тогда мы идем к вам!» диэн ааттаах ааҕыы десанын тэрийэн 1-Күүлэт нэһилиэгэр баран кэллибит.
1-Күүлэт нэһилиэктээҕи модельнай бибилэтиэкэтин кылаабынай бибилэтиэкэрэ Афанасьева Сардана Иннокентьевна итии чэйдээх үөрэ-көтө көрсөн, тэрээһиммит хайдах хаамыылаах барыахтааҕын билсэн, үлэлиир усулуобуйабытын тэрийэн, кэлиэхпититтэн барыахпытыгар дылы көрөн-истэн илдьэ сырытта.
«Вы еще не читаете, тогда мы идем к вам!» ааҕыы десанын сүрүн сыалынан, Арассыыйаҕа дьиэ кэргэн, Саха сиригэр оҕо саас сыла, Бүлүүтээҕи оройуоннай оҕо бибилэтиэкэтин 75 сыллаах үбүлүөйүн чэрчитинэн оҕо аймахха кинигэ ааҕыыны, бибилэтиэкэҕэ сылдьыыны, иллэҥ кэми туһалаахтык атаарыыны көҕүлээн, өр сылларга оройуоннай оҕо бибилэтиэкэтин кылаабынай библиограбынан үлэлээбит, бииргэ алтыспыт дьүөгэбит, коллегабыт, 1-Күүлэт нэһилиэгиттэн төрүттээх Григорьева Сахаяна Альбертовна сырдык кэриэһигэр, кини аатынан «Үбүлүөйдээх сыл бастыҥ ааҕааччыта» диэн оҕолорго анаан 2 тыһыынча суммалаах анал стипендия олохтонорун билиһиннэрии.
Сарсыарда 11 ч. уонна күнүс 15 ч. Прокопий Алексеевич Павлов аатынан орто оскуола 1 – 8 кылаас үөрэнээччилэрин кытта, нэһилиэк В. А. Степанов аатынан «Тэтим» ЦКД саалатыгар олус сэргэх, үөрүүлээх-көтүүлээх истиҥ көрсүһүү буолла. Оҕолорго бастатан туран десаммыт сүрүн сыалын, бибилэтиэкэбит историятын, үлэтин-хамнаһын билиһиннэрдибит. Сахаяна Альбертовна ийэтэ Ефросинья Захаровна тыл этэн, кини туһунан ахтан-санаан долгуйан туран махтанна. Прокопий Алексеевич Павлов аатынан орто оскуола үөрэххэ дириэктэри солбуйааччыта Иванова Альбина Семеновна: сонун тэрээһиҥҥэ көхтөөхтүк кыттыҥ, кинигэни ааҕыҥ, элбэҕи билиҥ диэн үөрэнээччилэри ыҥырда, десант хамаандатыгар эҕэрдэ тылларын эттэ.
Биир бэлиэ түгэнинэн буолла оҕолору алталыы хамаанданнан арааран икки түһүмэхтэн турар «Литературный Форт Боярд» квест-оонньуу ыытыыта. Бастакы түһүмэххэ хамаандалар карта көмөтүнэн алта хоһунан сылдьан араас ыарахаттартан турар сорудаҕы толордулар. Иккис түһүмэххэ биир мүнүүтэҕэ филворд таайдылар уонна «Книгохранилище» диэн тылтан тыллары таһаардылар. Икки түһүмэх түмүгүнэн алын кылаастарга – «Звезда», «Луна», «Радуга», орто сүһүөх кылаастарга – «Великолепная пятерка», «Феникс», «Лучшая пятерка» хамаандалар кыайыылаах тахсаннар дипломунан, минньигэс бирииһинэн наҕараадаланан олус астыннылар.
Оҕолор көхтөөхтүк оонньоон, кыайан-хотон үөрүүлэрэ үксээтэ. «Вы еще не читаете, тогда мы идем к вам!» ааҕыы десанын бары бииргэ флешмоб үҥкүүлээн түмүктээтибит.
1-Күүлэт нэһилиэгин оҕолорун сэргэхситэр тэрээһиммитигэр күүс-көмө, илии-атах буолбут Сардана Иннокентьевнаҕа, кулууп үлэһиттэригэр, миинньигэс астаах сандалы остуол тэрийэн күндүлээбит Ефросинья Захаровнаҕа, оҕолору тэрээһиҥҥэ иилээн-саҕалаан сырытыннарбыт учууталларга, көхтөөх кыттыны ылбыт оҕолорго тэрийээччилэр ааттарыттан барҕа махталбытын тиэрдэбит.
Олус ыалдьытымсах, үөрүнньэҥ дьонноох-сэргэлээх 1-Күүлэт нэһилиэгэ өйбүтүгэр-сүрэхпитигэр кэрэ өйдөбүлү хаалларда, ис дууһабытыгар дуоһуйууну аҕалла.
И. М. Гоголев-Кындыл аатынан Бүлүүтээҕи кииннэммит библиотечнай ситим дириэктэригэр Харлампьев Николай Николаевичка десаммытын өйөөн, кэлэр – барар сырыыбыт, тэрээһиммит үбүн-харчытын хааччыйбытыгар, ааҕыы десанын кыттыылаахтарын уонна оройуоннай оҕо бибилэтиэкэтин үлэһиттэрин ааттарыттан истиҥник махтанабыт.
Оройуоннай оҕо бибилэтиэкэтин кылаабынай бибилэтиэкэрэ Владилена Софронова
