Өрөспүүбүлүкэҕэ сүүһүнэн чулуу учууталлары иитэн-үөрэтэн таһаарбыт Бүлүү училищетыгар Саха норуодунай суруйааччыта Иван Васильевич Мигалкин эмиэ уһуйуллубута. Кини хайа да кэмҥэ, билиигэ-көрүүгэ уонна айар үлэ абылаҥар уһуйбут үөрэҕин кыһатын өрүү махталынан ахтар.
Бастыҥ үөрэнээччини Бүлүүтэ, үөрэммит кыһата эмиэ умнубат. Ол да иһин, олунньу 16 күнүгэр, билиҥҥитэ профессиональнай-педагогическай колледж студеннарын ортотугар «Кустук өҥнөөх, кымыс сыттаах сахам мандар саҥата» диэн Иван Васильевич хоһооннорун ааҕыыга күрэх буолан ааста.
Суруйааччы олох, таптал, дьон туһунан ытык өйдөбүллэри өрүү үрдүктүк тутан суруйбут айымньыларын колледж араас салааларыттан уопсайа 27 студент аахта. Ол иһигэр 5 бөлөх уонна 7 биирдиилээн кыттааччы толорууларыгар «Тэллэй», «Оһуор ойуу оҥоойук», «Таптал», «Эйиэхэ», «Сырдык иэйиилээх тапталбыт», «Киэн тутун, эн, саха буоларгынан», «Саха уолаттара», «Сахам дьоно, эһиги», «Сибэтиэй аанньал күнүгэр», «Мин курдук уол этиҥ», «Кылааспытыгар ыарыһах уол баара» диэн уо.д.а хоһооннору иһиттибит.
Дьүүллүүр сүбэ хас биирдии кыттааччы хоһоону саҥа тэтимин, араас дэгэтин туһанан чуолкайдык, дорҕоонноохтук, иэйиилээхтик ааҕыытын таһынан кини таҥаһын-сабын, туттан-хаптан туруутун эмиэ сыаналаата.
Түмүккэ биирдиилээн бастыҥ ааҕааччыларынан
Николаев Күндүл /ФО 152 группа/,
Егорова Моника /ПДО172 группа/,
Федоров Дьулустаан /ПВНК 112 группа/ ааттаннылар.Бөлөҕүнэн ааҕыыга техника уонна энергетика салаатын уолаттара ордук чорбойдулар.
Бастакы үрдэли ылла бу салаа 332 группата,
иккиһи 242 группа,
үсүһү 232 группа.
Ити курдук колледжка өссө училище саҕаттан ыччакка төрөөбүт тылы үрдүктүк тутан, дириҥник хорутан үөрэтэн кэлбит үтүө үгэс салҕанар. Саха тылыгар, ырыатыгар-тойугар тапталы иҥэриигэ, төрүт үгэстэри, сиэри-туому үөрэтиигэ араас өрүттээх үлэ тиһигин быспакка ыытыллар.
Бу хайысхаҕа киин библиотека үлэһиттэрэ биир санаанан тэҥҥэ үлэлэһэрбит үтүө түмүктэри аҕалар. Ыччаты билиигэ-көрүүгэ угуйар үлэни хардарыта тэрийсэн ситэрсэн, байытан, кэҥэтэн иһэбит.
Луиза Кононова, киин библиотека кыраайы үөрэтиигэ кылаабынай бибилэтиэкэрэ
