Киин библиотекаҕа олунньу 17 күнүгэр, төрөөбүт тыл уонна сурук-бичик күнүгэр анаан, 2014 сылтан үгэскэ кубулуйбут Хотугулуу-Илиҥҥи бэдэрээлинэй үнүбүрсүтүөт уонна СӨ Национальнай бибилэтиэкэтэ өрөспүүбүлүкэ үрдүнэн тэрийэн ыытар сахалыы дьыктаанын суруйуу аахсыйата тэрилиннэ.
Манна кыттаары араас саастаах, тус-туһунан дьарыктаах Бүлүү куорат олохтоохторо сэргэхтик тэринэн кэлбиттэр.
Төлө туппат төрүт баайыҥ –
Төрөөбүт ийэ тылыҥ.
Т. Аммосова – Ахсаана Сонтуой
Быйылгы дьыктаан тиэкиһэ саха норуодунай суруйааччыта Николай Лугинов суруйуутуттан ылыллыбыт.
Онус сылын ыытыллар ботуччу кээмэйдээх дьыктааны барыта 22 кыттааччы суруйда. Кинилэр биир чаас устата төрөөбүт тылынан таба суруйарга кыһанан олус болҕомтолоохтук үлэлээтилэр.
Толоруллубут үлэлэри бигэргэммит ирдэбиллэргэ олоҕуран бэрэбиэркэлээһин түмүгүнэн «Бастыҥтан бастыҥ суруксут» диэн чыпчаал ааты И.Л.Кондаков аатынан Бүлүүтээҕи гимназия саха тылыгар учуутала Лилия Васильевна Семенова уонна оройуоннааҕы оҕо библиотекатын тутаах библиотекара Анна Ивановна Чемпорова бигэтик ыллылар.
Онтон нэһилиэнньэҕэ социальнай өйөбүлү оҥорор үлэһит Сардана Иосифовна Волкова уонна И.М.Гоголев аатынан Бүлүү библиотекатын кииннэммит ситимин директорын солбуйааччы Федора Александровна Игнатьева бастыҥ суруксуттарынан ааттаннылар.
Аҕам саастаах Николай Николаевич Никифоров, Екатерина Нифонтовна Константинова, культура үлэһитэ Елена Иннокентьевна Каменева оҕолорго аналлаах социальнай тэрилтэ үлэһиттэрэ Валентина Петровна Егорова, Мария Даниловна Егорова, библиотекарь Туяра Федоровна Васильева төрөөбүт тылларын эмиэ үчүгэйдик билэллэрин көрдөрдүлэр.
Бары үөһэ ааттаммыттар дьүүллүүр сүбэ добун суруктарынан бэлиэтэннилэр.
Кэлэн аахсыйаҕа кыттыбыт көхтөөх дьоммутугар, убаастыыр ааҕааччыларбытыгар тэрийээччилэр ааттарыттан истиҥник махтанабыт. Ийэбит үүтүн кытары иҥэриммит төрөөбүт баай сахабыт тылын өрүү өрө тута, кэскилин кэҥэтэ сылдьыаххайыҥ!
Луиза Кононова, киин библиотека кыраайы үөрэтиигэ кылаабынай бибилэтиэкэрэ
Убаастабыллаах, ааҕааччылар! Ким дьыктаан суруйа кэлбэтэх, быйылгы дьыктаан тиэкиһинэн бэйэҕитин тургутан көрүҥ, төһө сөпкө суруйаргытын.
Николай Лугинов «Чыркымай».
Кэпсээни толору Электроннай бибилэтиэкэ сайтыгар ааҕыаххытын сөп:
Лугинов, Николай Алексеевич.
Чыркымай : [кэпсээн] // Кэпсээннэр / Николай Лугинов. — Якутск : Саха сиринээҕи кинигэ изд-вота, 1976. – С. 5-7. : URL: https://e-librvil.ru/book282/