Бу дьыл олунньу ый 18 күнүгэр Саха сирин суруйааччыларын, Россия журналистарын сойуустарын чилиэнэ, суруйааччы, тылбаасчыт, сценарист, журналист – Раиса Егоровна Винокурова-Хаар Мичээрэ 65 үбүлүөйдээх сааһын бэлиэтиир.
Бүлүүтээҕи оройуоннай оҕо библиотеката Раиса Егоровна Винокурова суруйбут «Мин көрүдьүөс балтым» кэпсээнинэн ойуулугу көрөргүтүгэр ыҥырар.
Мультпрезентацияны оҥордо, кэпсээтэ: Васильева Т. Ф. оройуоннай оҕо бибилэтиэкэтин сүрүн бибилэтиэкэрэ.
Кэпсээни аахта Г.И. Чиряев аатынан 1 №-ээх оскуола 5 «б» кылааһын үөрэнээччитэ Мичийэ Иванова.
Раиса Егоровна олунньу ый 18 күнүгэр 1959 сыллаахха Мэҥэ-Хаҥалас оройуонун Бүтэйдээҕэр Аргуновтар дьиэ кэргэннэригэр төрөөбүтэ. Аҕата – Егор Константинович уонна ийэтэ – Мария Николаевна оччоҕо колхуоска үлэлииллэрэ. Бииргэ төрөөбүттэр бэһиэлэр. Икки эдьиий, икки убай. Бастакы кылааска улахан убайа Валерий сиэтэн илдьибитэ. Алтыс кылааһы бүтэриэҕэр диэри төрөөбүт дэриэбинэтин оскуолатыгар үчүгэй учууталларга үөрэммитэ. Кэлин Бэдьимэ аҕыс кылаастаах оскуолатыгар республиканскай физмат оскуолага (аатырар ахсаанньыт Алиевка) үөрэнитэлээн баран, Тааттаҕа А. И. Софронов – Алампа аатынан Ытык-Күөл орто оскуолатын бүтэрбитэ.
Оҕо сылдьан библиотекага элбэхтик сылдьара, кинигэ ааҕара. Аахпыт кинигэлэринэн, сценкалары туруорара. Оскуолаҕа кэнсиэрдэргэ мэлдьи хоһоон аахтараллара уонна биллэрээччи оҥостоллоро. Ытык-Күөлгэ оскуолаҕа радиопередачаны салайара.
1984с. Саха государственнай университетын бүтэрэн 19 сыл учууталлаабыта. Хотугу сир ирбэт тоҥноох зонатын үөрэтэр-чинчийэр институкка 1997 с. ыҥырыллан аспирантураҕа үөрэнэ-үөрэнэ үлэлээбитэ. Эмтээх оттору үөрэппитэ. Бу сылларга Н. Н. Тобуроков – тыл үөрэҕэр доктор, профессор поэзияҕа соҕотох бөдөҥ критик биир сыл Раисаны уһуйан хоһоон суолугар үктэнэригэр көмөлөспүтэ, оҕолорго кинигэлэрин рецензенэ буолбута. Саха омук киэн туттар композитора Захар Константинович Степанов – бииргэ үлэлэһэн ырыаҕа, үҥкүүгэ чугаһаппыта, хоһоонноругар музыка айбыта. Сити курдук дьонун-сэргэтин, учууталларын көмөлөрүнэн уһуйуллан кинигэлэри суруйбута. Бастакы кинигэтэ «Кыһыл көмүс таммахтар» тахсыбыта. Уонна Таатта улуустааҕы типографията эмиэ ити дьыл «Сэбирдэх оһуора» кинигэтин таһаарбыта.
Култуура уонна духуобунас министерствотын кытта үлэлээн Азия оҕолорун үһүс оонньуутун сценарийыгар үлэлэспитэ. Биолог буолан, үс мууһуруу периодын ааспыт дойдутун суох буолан симэлийбит мастарын мааманнарын сүрүн идея гынан киллэртэрбитэ уонна «Күлүмчээн уонна кыһыл көмүс ыҥырыалар» диэн пьесата персонажтара: кырачаан уолчаан уонна лыахтар, араас кыыллар, көтөрдөр оонньуу аһыллыытын киэргэппиттэрэ. Убайа, республика уон төгүллээх марафоҥҥа чемпиона А.П. Илларионов көрдөһүүтүнэн «Ода спорту» диэн П.де Кубертен айымньытын тылбаастаабыппын биэрэн, Саха сиригэр аан бастакынан бу оонньууларга үс омук тылынан саҥарар Олимпийскай хартия гимнын этэр дьоннор баар буолбуттара. Ити кинигэни «Күөн күрэс тойуга» диэн ааттаан мини-кинигэ гынан таьаартарбыта элбэх спорду салайааччыга сиэпкэ угулла сылдьан туттуллар кинигэ буолбута.
Култуура министерствотын кытта дуогабар туһэрсэн Англия улуу суруйааччыта У. Шекспир «Ромео уонна Джульетта» диэн айымньытын тылбаастаабыта. 2004 сыллаахтан П.А.Ойуунускай аатынан Саха театрын сыанатыгар куруук көрдөрүллэр репертуарга киирэн кэлиҥҥи уонтан тахса сыл туран кэллэ.
Саха сирин государственнай циркэтигэр «Сказочный сон» диэн музыкальнай оҕолорго аналлаах пьесата турбута. Павел Акимов диэн композитор хаһыакка тахсыбыт хоһоонноругар мелодия айан ноталаан суруйбута. Ол кини Раиса Егоровна хоһоонноругар айбыт биир ырыатын «Айылҕа бэлэҕэ» диэнин ырыаһыт Раиса Захарова элбэх сыл ыллаабыта.
Кэлин «Бэйбэрикээн эмээхсин» диэн оҕолорго аналлаах олоҥхо суруйбута. Сайсары ансаамбыл «Серебряный город» диэн ырыатын нууччалыы тыллаах эйгэҕэ ыллыыр ырыа оҥостон Франциянан, Кытайынан кытта илдьэ сылдьыбыттара. Бу ырыа «Азия о5олоро» оонньуу ырыаларыттан биирдэстэрэ буолар. О5олорго анаан нууччалыыттан мультипликационнай киинэ ырыаларын тылбаастаабытын «Далбар Хотун» сурунаалга таһаарбыттара.
2006 сыллаахха А.Н. Варламова төрүттээн хаалларбыт «Биһик ырыата» республиканскай конкурска сэттэ хоһоонугар ырыа айыллан ылламмыта. Гран-прины икки ырыанан биэрбиттэрэ: «Байанай» уонна «Көмүстүүрэ чыычааҕым» диэннэринэн.
Раиса Винокурова биир дойдулааҕа суруйааччы – Р.Баҕатаайыскай кыыһыгар: «Классиктары тылбаастыыр буоллаҕына кыра суруйааччы буолбатах», Н.Н.Тобуроков «Саха Анна Ахматоватаҕын эн» – диэбитэ, учууталым А. С. Элякова Жуковскай Пушкиҥҥа бокулуон биэрбитин курдук бокулуоннаабыта, суруйааччы В.Н.Протодъяконов – «Саха Шиллера» –диэн эппит тыллара өссө да элбэхтэ үлэлииргэ күһэйэр күүс буолбуттара.
Раиса Егоровна оҕолорго анаан суруйбут айымньылара «Кыһыл көмүс таммахтар», «Сэбирдэх оһуора» «Кыһыл көмүс таммахтар», «Күннээх азбука», «Маныыһыт кумаар», «Сардаҥалаах ырыа», «Хоһоонунан ахсаан», «Мин көрүдьүөс балтым», «Таптал сүтэн эрэр куората», «Үп үрүҥ түү курдук», «Бэйбэрикээн эмээхсин», «Байымаайы уонна Дьааҥы».
∗ Страница тиэкиһэ уонна ойуулара Раиса Егоровна Винокурова-ХААР Мичээрэ сайтыттан уонна интернет ситимиттэн туһанылынна: https://haarmi.jimdofree.com/%D0%BE%D2%95%D0%BE%D0%BB%D0%BE%D1%80%D0%B3%D0%BE-%D1%85%D0%BE%D2%BB%D0%BE%D0%BE%D0%BD%D0%BD%D0%BE%D1%80/
Бүлүүтээҕи оройуоннай оҕо бибилэтиэкэтэ
