2023 сыл Саха сиригэр Үлэ сылынан биллэриллибитэ. Кулун тутар 23–24 күннэригэр, Бүлүүтээҕи Оройуоннай оҕо библиотеката «Үлэ Геройун суолларынан» диэн краеведческай бырайыак чэрчитинэн Бүлүү оскуолаларын үөрэнээччилэрэ кыттыылаах автодесант бастакы түһүмэҕин тэрийдэ.
СӨ Ил Дархана Айсен Сергеевич Николаев 2023 сылы Үлэ сылынан биллэрбитинэн Бүлүүтээҕи Оҕо Оройуоннай библиотекатын үлэһиттэрэ Владилена Владимировна Софронова, Мария Егоровна Егорова иилээн-саҕалаан «Үлэ Геройун суолларынан» диэн краеведческай бырайыак чэрчитинэн, десант быһыытынан Социалистическай Үлэ Геройдарын олохторун, үлэлэрин туһунан билсиһэр, кинилэр тустарынан матырыйаал хомуйар, оҕолорго улуустарын историятын үөрэтиигэ көҕүлүүр сыаллаах Бүлүү к. оскуолаларыттан иккилии үөрэнээччи кыттыылаах автодесант Өкүндү, Чинэкэ, Халбаакы нэһилиэктэринэн кулун тутар 23-24 күннэригэр тахса сырыттыбыт.
Ол курдук бастакы күҥҥэ айан Өкүндү нэһилиэгиттэн саҕаланна. Өкүндү нэһилиэгин баһылыга Никифор Владимирович Петров нэһилиэк олоҕун-дьаһаҕын, биллэр-көстөр дьонун, туох үлэ бара турарын билиһиннэрдэ, оҕолор ыйытыыларыгар хоруйдаата. Оскуолаҕа дириэктэри иитэр үлэҕэ солбуйааччы БорисНиколаевич Васильев Социалистическай Үлэ Геройа Варвара Петровна Трофимова олоҕун, үлэтин кэпсиир стендэни, ону таһынан киниэхэ аналлаах фотовыставканы билиһиннэрдэ. 6 кылаас үөрэнээччитэ Марсель Петров доклад аахта. Түмүккэ Борис Николаевич проект кэскиллээҕин бэлиэтээн туран «Трофимова Варвара Петровна. Өрөгөйдөөх “Якутскай” сопхуос» диэн кинигэни бэлэх уунан олуһун үөрдүбүт.
Чинэкэ нэһилиэгэр баһылык Антон Сергеевич Амбросьев оҕолору көрсөн нэһилиэк хайдах, туох үлэлээн олорорун, нэһилиэк икки Социалистическай Үлэ Геройдарын Петр Иванович Протопоповы, Семен Митрофановиһы билиһиннэрдэ. Семен Митрофанович Васильев туһунан кинигэни ыалдьыт оҕолорго бэлэхтээтэ. Салгыы С. М. Васильев аат. орто оскуола 6-7 кылаас оҕолорун кытта көрсүһүү кэмигэр нэһилиэк библиотекара Любовь Прокопьевна Корякина Семен Васильевка аналлаах стендэни билиһиннэрдэ. Ол кэннэ “Кыталык” НАДь үлэһиттэрэ оҕолору 4 хамаандаҕа арааран оонньотон сэргэхситтилэр, оҕолор көрсүһүү түгэннэриттэн тугу иҥэриммиттэрин тургутук боппуруостарга эппиэттээтилэр.
Иккис күн автодесант үһүс сырыытыгар айаҥҥа турунан Халбаакы нэһилиэгэр ыалдьыттааһына буолла.
Көрсүһүү, «Тускул» культура дьиэтигэр үлэлиир Халбаакы нэһилиэгин библиотекатыттан саҕаламмыта. Библиотекарь Надежда Николаевна Семенова ыалдьыттары алгыстаах алаадьыннан айхаллыы көрсөн «Үлэттэн дьолломмут чулуу дьоммут» кинигэ быыстапкатын билиһиннэрдэ. Социалистическай Үлэ Геройа Прокопий Иннокентьевич Быканов туһунан иһитиннэрии оҥортун кэннэ П.Быканов аат. Халбаакы орто оскуолатыгар 5-6-7 кылаас үөрэнээччилэрин кытта көрсүһүү буолла. Халбаакы оскуолатын 5 кылааһын үөрэнээччилэрэ Толя Томскай уонна Клава Гаврильева «Саха Саарына» диэн Данилова Уйгулаана геройга анаан суруйбут хоһоонун доргуччу аахтылар. Герой олоҕун уонна үлэтин сырдатар стендэни оҕолор кэпсээн билиһиннэрдилэр. Онтон оҕолору 2 хамаандаҕа арааран оскуола иитэр үлэҕэ дириэктэри солбуйар Анна Михайловна Простакова бэлэмнээбит викторинатынан оонньоотулар, тургутуулары аастылар.
Сырыы, түмүк түһүмэҕинэн, Халбаакы оскуолатын кыраайы үөрэтэр түмэлигэр: үгүс элбэх экспонааттардаах, баай историялаах түмэли сэргээн көрүүннэн түмүктэннэ. Оҕолор билсэннэр, билиилэрин хаҥатан, сылдьыбыт сырыыларын олуһун астыннылар.
Бүлүү куоратын Г. И. Чиряев аат. 1№-дээх оскуолаттан 7 «в» кылааһын үөрэнээччилэрэ Роберт Мандаров, Никита Оконешников, ССГ Н. С. Степанов аат. 3№–дээх оскуолаттан 6 «б» кылааһын үөрэнээччилэрэ Никадора Петрова, Сайаана-Мария Иванова, Ализа Степанова, И. Кондаков аат. Бүлүүтээҕи гимназия 6 «б», 7 «б» кылааһын үөрэнээччилэрэ Афоня Андреев, Джулиана Дорофеева кыттыыны ыллылар.
Автодесаны өйөөн гөрүүчэй булан проекка күүс көмө буолбут Бүлүү улууһун культураҕа уонна норуот айымньытын киинин начальнигар А. А. Дашевскаяҕа, «И. М. Гоголев-Кындыл» аатынан Бүлүүтээҕи нэһилиэктэр икки ардыларынааҕы кииннэммит библиотека ситимэ» МХТ дириэктэригэр Н. Н. Харлампьевка махталбытын тиэрдэбит.
Автодесант айаныгар бэйэлэрин тимир көлөлөрүнэн күүс-көмө буолан сырытыннарбыт суоппардарга Леонид Егоровка, Владислав Софроновка Бүлүүтээҕи оҕо оройуоннай библиотекатын үлэһиттэрин ааттарыттан көмөлөрүн иһин махтал тылларын этэбит.
Каникул кэннэ, сылдьыбыт нэһилиэктэрбит, Бүлүү к. оскуолаларын үөрэнээччилэрин кытта Бүлүү куоратыгар көрсүһэн, Үлэ Геройа П.Х. Староватов олоҕун, үлэтин кэпсиир тэрээһиннэри ыытар баҕалаахпыт.
Бэс ыйыгар 4 автодесант Дьөккөн нэһилиэгэр Социалистическай Үлэ Геройа Алексей Николаевич Черканов дойдутугар былааннанар.
М. Е. Егорова, Оройуоннай оҕо библиотекатын кыл. библиограба
Сиһилии социальнай ситимнэргэ киирэн көрүҥ:
«Чернышевскай нэһилиэгэ», муниципальнай тэриллии «ВКонтакте» социальнай ситимэ: https://vk.com/wall-215992821_91
«И. М. Гоголев-Кындыл» аатынан Бүлүүтээҕи нэһилиэктэр икки ардыларынааҕы кииннэммит библиотека ситимэ» МХТ, Оройуоннааҕы оҕо библиотекатын «ВКонтакте» социальнай ситимэ: https://vk.com/wall-216665301_31 / https://vk.com/wall-216665301_30
