Тохсунньу 15 күнүгэр И. М. Гоголев-Кындыл аатынан Бүлүүтээҕи киин библиотекаҕа, Саха Республикатын искусствотын үтүөлээх деятелэ, Российскай Федерация культуратын үтүөлээх үлэһитэ, Саха норуодунай бэйиэтэ, биир дойдулаахпыт Иван Михайлович Гоголев-Кындыл төрөөбүтэ 95 үбүлүөйдээх сылын көрсө төгүрүк остуол ыытылынна.
Тэрээһиҥҥэ улуус баһылыга Сергей Николаевич Винокуров, Бүлүү куоратын баһылыга Ян Анатольевич Попов, Чочу нэһилиэгин баһылыга Петр Александрович Догоюсов, Халбаакы баһылыга Алексей Иванович Васильев уонна культура, үөрэҕирии салаатын үлэһиттэрэ, саха тылын учууталлара, үөрэнээччилэр, ааҕааччылар кыттыыны ыллылар.
Кэпсэтиини иилээн-саҕалаан Бүлүүтээҕи кииннэммит библиотека дириэктэрэ Николай Николаевич Харлампьев ыытта.
Тэрээһин үөрүүлээх чааһыгар Халбаакы, Чочу уонна Бүлүүтээҕи Г. С. Донской аатынан 2-с нүөмэрдээх оскуола үөрэнээччилэрэ Кындыл хоһоонун ааҕан иһитиннэрдилэр.
Суруйааччы кыыһа, Анна Ивановна Саха Республикатын суруйааччыларын Сойууһун чилиэнэ, филологическай наука кандидата бэйэтин төлөннөөх эҕэрдэтин уонна биир дойдулаахтарыгар махтал тылларын видео нөҥүө тиэртэ.
Тэрээһин сүрүн соругунан 2025 сылга поэт үбүлүөйдээх 95 сылын үрдүк таһымнаахтык бэлиэтиир соруктар тула кэпсэтии буолла.
Мустубут дьон санааларын этиннилэр, былааннарын торумун билиһиннэрдилэр. Ол курдук, үрдүк таһымнаах торжественнай тэрээһини, оҕолорго ойуулук күрэҕин ыытарга, куорат уулуссаларыгар баннердары ыйыырга уо.д.а интэриэһинэй этиилэри киллэрдилэр.
Ыытыллар бары тэрээһиннэри сыл устата ситимнээхтик былааннаан, үбүлүөйдээх сылын үрдүк таһымнаахтык ыытарга сорук турда.
А. А. Степанова, Бүлүүтээҕи кииннэммит модельнай бибилэтиэкэ ааҕааччыны кытта үлэлиир отделын сүрүннүүр бибилэтиэкэрэ
