Убаастабыллаах Бүлүүбүт олохтоохторун, бу дьыл муус устар 5 күнүгэр күнүс 14:30 ч. киин бибилэтикэҕэ саҥа кинигэ сүрэхтэниитигэр ыҥырабыт. Дириҥ силистээх-мутуктаах, төрүттээх-уустаах Иккис Күүлэт нэһилиэгин 130 сыллаах баай остуоруйатын кэлэн билсиҥ, сэргээҥ. Дьоһун дьонун хомоҕой тылын-өһүн, ылбаҕай ырыатын дуоһуйа истиҥ.
Бу күннэргэ киин библиотекаҕа сибиэһэй кырааска, кумааҕы сытынан аҥылыйар сабыс саҥа кинигэлэри долгуйа туттубут.
Бүлүү улууһун биир дириҥ силистээх-мутуктаах, киэҥ төрүттээх-уустаах II Күүлэт нэһилиэгин туһунан икки чаастаах дьоһун кинигэ улууспут бары олохтоохторугар, сэргэх ааҕааччыларбытыгар, төрөөбүт кыраайы үөрэтээччилэргэ кэрэ бэлэх буолан тиийэн кэллэ.
Нэһилиэк дьаһалтата (баһылык Ю.И.Спиридонов) дьону түмэ тардан, салайан үлэлэтэн, нэһилиэгин төрүттэммитэ 130 сыллаах үбүлүөйүгэр анаан таһаартарбыт.
Саҥа «II Күүлэттэр» кинигэ икки чаастан турар. Манна нэһилиэк төрүттэниититтэн саҕалаан билиҥҥи күҥҥэ диэри сайдыыта элбэх научнай үлэлэргэ, архыып дөкүмүөннэригэр, нэһилиэк мусуойун матырыйаалларыгар, бэчээккэ тахсыбыт суруйууларга уонна биирдиилээн дьон ахтыыларыгар олоҕуран, саас-сааһынан таҥыллан, аттарыллан киирбит.
Баай ис хоһоонноох дьоһуннаахай кинигэ, ааҕааччыны интэриэһиргэтэр элбэх матырыйааллардаах. Араас ыстатыйалар, хаартыскалар, докумуоннар кинигэ ис хоһоонун ситэрэллэр.
Киин библиотека нэһилиэк олохтоох дьаһалтатын кытары саҥа кинигэ сүрэхтэниитин тэрийэргэ бэлэмнэнэллэр.
Киин бибилэтиэкэ
