Кулун тутар 22 күнүгэр И.М.Гоголев-Кындыл аатынан кииннэммит библиотека ситимин тэрийиитинэн Саха норуодунай поэта, Саха АССР култууратын үтүөлээх үлэһитэ, П.А. Ойуунускай аатынан судаарыстыбаннай бириэмийэ лауреата Михаил Елисеевич Тимофеев төрөөбүтэ 92 сылыгар аналлаах уус-уран ааҕыыга улуустааҕы күрэх ыытылынна.
Бу, үтүө үгэскэ кубулуйан, алтыс төгүлүн ыытыллар «Биир иллээх дьиэ кэргэн тыына» диэн поэт кинигэтин аатынан күрэххэ Бүлүү куорат оскуолаларыттан, Н. Г. Чернышевскай аатынан профессиональнай-педагогическай колледжтан, Бөтүҥ Бороҕон, 2 Күүлэт, Кыргыдай нэһилиэктэриттэн кэрэни кэрэхсиир, уйан дууһалаах оҕолор, ыччаттар, улахан дьон кэлэн кыттыыны ыллылар.
Уус-уран тыл кэрэ эйгэтигэр угуйар улахан тэрээһин Саха Өрөспүүбүлүкэтин өрөгөйүн ырыатынан арыллыбыта ураты суолталаах. Биир дойдулаахпыт Михаил Елисеевич саха киһитэ киэн туттар өрөгөйүн ырыатын тылларын суруйбут ааптардартан биирдэстэрэ буолар.
Хомоҕой тыллаах, ураты буочардаах лирик поэт олоҕун устата айбыт-туппут айымньылара отуттан тахса кинигэ буолан бэчээккэ тахсан, саха тыллаах кутун-сүрүн таарыйа, сүрэҕин сүүйэ киэҥник тарҕаммыттара. Олортон киин библиотекаҕа баар кинигэлэрэ «Ыра санаа ахтылҕаннаах ырыаһыта» диэн быыстапкаҕа туруорулуннулар.
Михаил Елисеевич биир дойдулааҕа, Бүлүү улууһун, Кыргыдай нэһилиэгин бочуоттаах олохтооҕо, үлэ бэтэрээнэ, РФ үөрэҕириитин туйгуна, учууталлар учууталлара, Кыргыдай нэһилиэгин историятын туһунан дьаныһан үөрэтэн, сурукка тиспит ытык киһи Евдокия Гаврильевна Николаева оҥорбут суруйааччы олоҕун кэпсиир олус истиҥ ахтыыта мустубут дьоҥҥо ураты тыыны биэрдэ. Кини сэргэх, хатыламмат кэпсээнин Кыргыдай нэһилиэгин «Туйаара» вокальнай ансаамбыла (салайааччы Любовь Николаева) ырыанан ситэрэн, көрсүһүү түһүлгэтигэр өссө сылаас, истиҥ эйгэни олохтоото.
Күрэххэ кытта кэлбит 26 ааҕааччы норуодунай поэты тылбаасчыт быһыытынан арыйдылар. Кинилэр Михаил Тимофеев омук аатырбыт суруйааччыларын: нуучча Михаил Лермонтов, Александр Пушкин, Евгений Евтушенко, татар Муса Джалиль, авар Расул Гамзатов, башкир Габдрахман Галеев, казах Турсунхан Абраханова, кытайдар Ду Фу, Ли Бо, кэриэй Юн Сон До, эбээн Алитет Немтушкин хоһооннорун тылбаастарын өйтөн ааҕан иһитиннэрдилэр.
Биэс киһиттэн састааптаах дьүүллүүр сүбэ хоһоону ааҕыы маастарыстыбатын, айымньы ис хоһоонун истээччигэ тиэрдиини, уобараһы толору арыйарга туттууну-хаптыыны сыаналаата. Түмүккэ кыттааччылар саастарынан көрөн, үс бөлөххө бастыҥнары ааттаатылар.
Ол курдук 5-8 кылаас үөрэнээччилэригэр бастыҥ ааҕааччынан Айтал Тимофеев (2 Күүлэт, VI кылаас) сыаналанна. Артем Васильев (Бүлүү к 1 оскуола, V «а», кылаас) «Дорҕоонноох ааҕааччы», Айсена Кононова (Бүлүү к 1 оскуола, V «б», кылаас) «Мин тылым-мин туойар хомуһум» уонна Айталина Дабдасова (2 Күүлэт, VI кылаас) «Кэскиллээх ааҕааччы» дьоһун ааттарынан биһирэннилэр.
Үрдүкү кылаас көхтөөх уолаттарыгар Иванов Ильяҕа (2 Күүлэт, X кылаас) «Сэргэх ааҕааччы», онтон Быкалыров Степаҕа (Бороҕон, IX кылаас) «Иэйиилээх ааҕааччы» үрдүк ааттара иҥэрилиннилэр.
18-тан үөһэ саастаах улахан дьоҥҥо эриһиилээх киирсии буолла. Эрэллээх кыайыыны Бөкчөҥөө орто оскуолатын учуутала Иван Кондаков-Тимирхан ситистэ.
Бороҕонтон култуура үлэһитэ Елисей Белолюбскай «Умсугутуулаах ааҕааччы», БППКаттан студеннар Святослав Гаврильев «Иэйиилээх ааҕааччы» уонна Александра Петрова «Саас ыллыыр саҥата» анал ааттар хаһаайыннарынан буоллулар.
Култуура сайдыытын уонна норуот айымньытын оройуоннааҕы киинин анал бирииһэ (салайааччы Дашевская А.А.) — поэт айымньыларынан таҥыллыбыт ураты бэлэх Иван Кондаковка Расул Гамзатов «Долалай» уонна Святослав Гаврильевка Александр Пушкин «Ааһа түстүм бэйэм бэйэбин» диэн хоһооннорун ураты уус-ураннык аахпыттарын иһин туттарылынна.
Түмүккэ тэрийээччилэр күрэх бары кыттааччыларыгар туоһу суруктары, кыайыылаахтарга наҕараадалары туттардылар.
Ити курдук, норуодунай поэппыт аатын ааттатар, айымньыларын тарҕатар уонна дойдубутугар бу уустук кэмҥэ төрөөбүт сиргэ тапталы иҥэрэр, атын омук норуотугар убаастабылы, доҕордуу сыһыаны үөскэтэр сыаллаах ыытыллыбыт күрэх Михаил Елисеевич тылларыгар, Алексей Егоров матыыбыгар «Дьокуускайга хаар түһэр» диэн ырыаны күргүөм толоруунан долгутуулаахтык түмүктэннэ.
Бу күн Михаил Елисеевич төрөппүт кыыһа Айина Михайловна күрэх хайдах ыытылларын Дьокуускай куоракка кэтээн көрө, тэҥҥэ долгуйа олордо. Тэрийээччилэргэ улаханнык махтанан туран, бэйэтэ бэлэмнээн бэчээттэн саҥа тахсыбыт аҕатын айымньыларын толору хомуурунньугун 4-5-с томнарын библиотекаҕа бэлэх ыытта.
Киин библиотека аатыттан Айина Михайловнаҕа уонна күрэҕи тэрийэргэ үлэлэспит бибилэтиэкэлэргэ, М.Н.Жирков аатынан култуура оройуоннааҕы дыбарыаһыгар, профессиональнай-педагогическай колледжка, кыттааччылары бэлэмнээбит салайааччыларга дириҥ махталбытын тиэрдэбит.
Норуодунай поэппыт Михаил Тимофеев суруйан хаалларбыт хоһоонноро күннэтэ ахтыллан, өйгө-санааҕа иҥэн, үтүөҕэ-сырдыкка угуйа турдуннар, ырыаҕа ылланан үтүө санаа кэрэһитэ буолан көттүннэр!
Сүүһүнэн омуктар олорор, айар-тутар, кэскили уһанар тапталлаах дойдубутугар өрүү истиҥ сыһыан олохсуйдун, ил-эйэ эрэ туругурдун!
Луиза Кононова, киин библиотека кыраайы үөрэтиигэ кылаабынай бибилэтиэкэрэ
