«Бастыҥ баай-дьон ытыктабыла, ыраас суобас» – диэн Саха норуодунай поэта Кындыл Уйбаан эппит тылларынан саҕаланар «Үлэһит үтүөтэ, киһи кэрэмэһэ» саҥа кинигэни билиһиннэрии олунньу 23 күнүгэр ыытылынна.
Бу күн, Дойду үрдүнэн бэлиэтэнэр Аҕа дойдуну көмүскээччилэр күннэригэр, ананан төрөөбүт үтүөкэн киһи, тыыл, үлэ, сыана бэтэрээнэ, РСФСР үөрэҕириитин туйгуна, Саха Өрөспүүбүлүкэтин культуратын туйгуна, Бүлүү улууһугар үөрэҕирии, культура сайдыыларыгар, общественнай хамсааһыны тэнитиигэ дьоһун кылаатын киллэрбит улахан учуутал, истиҥ иитээччи, муударай салайааччы, улахан дьиэ кэргэн аҕа баһылыга Степан Евсеевич Калачиковы төрөөбүтэ 90 сылынан ахтан-санаан ааһар түһүлгэ Бүлүү куоратын В. О. Каратаев аатынан Олоҥхо дьиэтигэр тэрилиннэ.
Күн сирин саҥа көрбүт кинигэни улахан кыыһа Светлана Степановна Александрова хомуйан оҥорбут. Сахалыы, нууччалыы тылларынан суруллубут кинигэ Дьокуускай куорат «Дани-Алмас» хааччахтаммыт эппиэтинэстээх хампаанньатыгар 130 ахсаанынан бэчээттэнэн тахсыбыт.
Тас көстүүтүнэн да сырдык сылаас сыдьаайдаах кинигэ Степан Евсеевич бэйэтэ суруйан хаалларбыт ахтыыларыттан, кини туһунан бииргэ үлэлээбит үөлээннээхтэрин, доҕотторун уонна оҕолорун, сиэннэрин, хос сиэннэрин ахтыыларыттан таҥыллыбыт. Киэҥ ис хоһооно элбэх хаартыскаларынан ситэриллибит. Аны талааннаах киһи культура эйгэтигэр үлэтин арыйар түһүмэххэ «Ыһыахха ыҥырыы» алгыһа уонна «Театр-олоҕум аргыһа» диэн айар киэһэтин видеоҕа устуулара QR-кодунан киллэриллибиттэр.
Бырааһынньык өрөбүлүн аахсыбакка, Степан Евсеевиһы төрөөбүт күнүгэр истиҥник санаан ааһаары, бүтүн саалаҕа толору мустубут дьон үөрэх, үлэ үөһүгэр бииргэ алтыспыт кэмнэрин туһунан бииртэн – биир олус истиҥ ахтыылары оҥордулар. Ытыктыыр киһилэрин аатын, үгүс сыралаах үлэтин, баай ис хоһоонноох олоҕун үйэтитэр кинигэни оҥорон таһааттарбыт дьиэ кэргэнигэр дириҥник махтаннылар. Ис дууһаттан тахсар долгутуулаах ырыаларын бэлэхтээтилэр.
Түмүккэ тапталлаах дьиэ кэргэнэ аҕаларынан киэн туттуулара өссө күүһүрбүтүн, кини дьоҥҥо-сэргэҕэ аптарытыата оҕолоругар, сиэннэригэр өрүү сабыдыаллыы турарын билинэн туран, кэлэн кыттыбыт дьоҥҥо махталларын бэлиэтин саҥа кинигэни бэлэх ууннулар.
Ити курдук, Бүлүүбүт ааҕааччыларыгар дьоһун олох, үлүскэн үлэ үтүө холобурун итэҕэтиилээхтик кэпсиир, тиэрдэр, хайа баҕарар аймахха көлүөнэлэри ситимниир, түмэр суолталаах тутуллаах өссө биир кинигэ бэчээттэнэн тахсыбытын кэрэхсээтибит.
Луиза Кононова, киин библиотека кыраайы үөрэтиигэ кылаабынай бибилэтиэкэрэ
