2017 сылтан саҕалаан сылын ахсын Бүлүү куорат оскуоланы бүтэрээччилэригэр анаан И. М. Гоголев-Кындыл олоҕор, айар үлэтигэр аналлаах аһаҕас уруок ыытыллар. Бу тэрээһини саҕалааччыларынан уонна төрүттээччилэринэн Бүлүүтээҕи киин библиотека буолар.
Тохсунньу 29 күнүгэр, Саха народнай поэта Иван Михайлович Гоголев-Кындыл төрөөбүтэ 94 сылыгар аналлаах АҺАҔАС УРУОГУ Социалистическай Үлэ Геройа В.П. Трофимова аатынан Өкүндү оскуолата тэрийэн ыытта. Уруогу иилээн-саҕалаан саха тылын учуутала Ульяна Григорьевна Иванова уонна библиотекарь Саргылана Владимировна Петрова ыыттылар.
И. М. Гоголев-Кындыл ырыа буолбут хоһоонун Иван Васильевич Данилов толордо. Өкүндү нэһилиэгин эдэр ыччата уонна оскуола үөрэнээччилэрэ хоһоон ааҕан иһитиннэрдилэр. Уруок олус сэргэхтик, кэлбит бары оҕолору хабан көхтөөхтүк ааста.
Үөрэнээччилэр хамаанданнан арахсан «Бэйэ оонньуу» викторина таайыытыгар күрэхтэстилэр. Түмүккэ хоппут хамаанда сертификат тутта.
Эһиилги аһаҕас уруогу С. Ф. Гоголев аатынан Хампа орто оскуолата ыытар буолла. «Аһаҕас уруок» эстафета анал бэлиэтин саха тылын, литературатын учуутала Лидия Григорьевна Иннокентьева тутта.
А. А. Степанова, Бүлүүтээҕи модельнай бибилэтиэкэ сүрүннүүр бибилэтиэкэрэ