«Айар үлэ үрдүк дьолун бары дьолтон ордоробун…» : викторина

Саханы саха дэппит, уус тылбыт ойуулуур күүһүн чочуйбут  Саха АССР народнай поэта, талааннаах сэһэнньитэ, драматура, Саха Республикатын искуссвотын уонна Российскай Федерация культуратын үтүөлээх үлэһитэ, биир дойдулаахпыт Иван Михайлович Гоголев –  Кындыл быйыл тохсунньу ый 18 күнүгэр төрөөбүтэ 93 сылын туолар.


Күндү ааҕааччы, Бүлүүтээҕи оройуоннай оҕо библиотеката «Эһэкээн үөһэ» диэн Иван Михайлович Гоголев суруйбут сэһэнинэн бэлэмнэниллибит онлайн — викторинаҕа көхтөөхтүк кыттаргытыгар ыҥырабыт…

Иван Гоголев кыра сааһыттан остуоруйалары, номохтору сөбүлээн истэн улааппыт. Төрөппүттэрэ оччотооҕу дьон кыаҕынан балайда элбэх кинигэлээх буоланнар Уйбаанчык кыра сааһыттан уус-уран литература эйгэтигэр сыстан барбыта, сахалыы да, нууччалыы да кинигэни ааҕара. Орто оскуолаҕа үөрэнэр кэмигэр айар-тутар дьоҕура сайдан барбыт.

 Бастакы хоһооно 1948 сыллаахха, онтон хоһооннорун уонна поэмаларын «Ыҥырар уоттар» диэн кинигэтэ 22 саастааҕар 1952 сыллаахха бэчээттэммитэ. Ол кэмтэн ыла Иван Гоголев илиитин араарбакка, 40-тан тахса сыл устата айар үлэтигэр дьулуурдаахтык уонна тахсыылаахтык үлэлээн, поэзияҕа, прозаҕа, драматургияҕа, публицистикаҕа саха дьонун кутун туппут улуу айымньыларын айбыта.

Айымньыларын темалара араастар: төрөппүт ийэтигэр махтала, төрөөбүт алааһыгар, ийэ сиригэр таптала, норуотугар кэс тыла, алгыһа.

Оҕолорго аналлаах үгүс хоһоон, остуоруйа, пьеса кинигэлэрдээх. «Мин эһигини таптыыбын» (1971), «Эһэкээн үөһэ» (1978), «Олорор мутуккун кэрдимэ» (1986),  «Ыам ыйын халаан» (1971), «Мэник Мэнигийээн».


Тиэкиһи бэлэмнээтэ, викторинаны таҥна Туяра Васильева, онлайн-викторина боппуруостарын бэлэмнээтэ Мария Егорова, Бүлүүтээҕи оройуоннай оҕо библиотеката 

Оставить комментарий

Наш сайт использует файлы cookies, чтобы улучшить работу и повысить эффективность сайта. Продолжая работу с сайтом, вы соглашаетесь с использованием нами cookies и политикой конфиденциальности.

Принять
Обратная связь