Ахсынньы 14 күнүгэр, Бүлүүтээҕи киин библиотекаҕа, олоҕун доруобуйа харыстабылыгар анаабыт, фельдшер-акушер Петрова-Меньшикова Зоя Михайловна төрөөбүтэ 100 сылыгар анаан, Россия суруналыыстарын Союһун чилиэнэ Анатолий Петров – Уу Туолата суруйан, хомуйан таһаарбыт кинигэтин билиһиннэриитэ буолан ааста. Убаастабыллаах ааҕааччылар, ол туһунан «Олох суола» Улуус медиа ситимигэр тахсыбыт ыстатыйаны сэргээн ааҕыҥ ⇒
Кииннэммит библиотека саалатыгар мустубут дьон үгүс кинигэ ааптара, Россия суруналыыстарын Союһун чилиэнэ Анатолий Петров -Уу Туолата тутан турар кинигэтин кэпсиирин олус интэриэһиргээн истэллэр. Бу ааптар саҥа бэчээттэтэн таһаарбыт сыралаах үлэтин билиһиннэрэр.
Аҕа саастаах көлүөнэ роддомҥа эйэҕэс бэйэлээх нуучча акушер-бырааһа үлэлээбитин өйдүүр буолуохтаах. Ким эрэ кини көмөтүнэн оҕолонон дьолломмутун, ким эрэ ийэтэ кэпсииринэн, бэйэтэ бу дойдуга кэлэригэр көмө буолбутун билэр буолуохтаах. Ол Зоя Михайловна Петрова (Меньшикова) этэ.
Ахсынньы 14 күнүгэр Зоя Михайловна төрөөбүтэ 100 сылын бэлиэтиир күҥҥэ сөп түбэһиннэрэн, ону таһынан, 2022 сыл — Ийэ сылынан биллэриллибитинэн, кини туһунан кинигэни сүрэхтээһин буолла.
Зоя Михайловна ыраах Кировскай уобаластан 18 эрэ саастааҕар Бүлүүгэ Дьоохуга, үлэлии кэлбит. Дьооху (Кыргыдай) сирэ-уота эдэркээн кыыһы үөрэ көрсүбүт, манна кини киэҥ историялаах үлэтэ саҕаламмыт. Кини биһиги тыйыс айылҕалаах дойдубутун сөбүлээн, ыал буолан, 4 оҕону төрөтөн, олоҕун тиһэх күннэригэр диэри манна олорон-үлэлээн ааспыт Зоя Михайловна туһунан кинигэ ааҕааччыга олус интэриэһинэй буолан биэрдэ. Кини аймахтара, алтыһан ааспыт дьоно, үлэтин салгыы сылдьар биир идэлээхтэрэ ону бэлиэтии көрдүлэр, санааларын атастастылар, өйдөөн-ахтан аастылар.
Бу кинигэ тахсарыгар улахан үлэни оҥорсубут Зоя Михайловна сиэн кыыһа Юлия Валерьевна эбэтин туһунан ахтыыта олус истиҥ буолла. Юлия Валерьевна: «Зоя диэн аат «жизнь» диэн тылбаастанар», -диэн бэлиэтээн эттэ. Кырдьык даҕаны, төһөлөөх элбэх Бүлүү дьонун олохторо Зоя Михайловнаны кытта көрсүһүүттэн саҕаламмыта буолуой?!
«Бу кинигэ атыыга буолбакка, билэр дьоҥҥо өйдөбүнньүк быһыытынан, оттон билбэт дьон бу кинигэни көрөн баран «маннык эппиэтинэстээх үлэһит, ыраах сиртэн кэлэн баран, олоҕун Бүлүү дьонугар анаабыт быраас баар этэ» диэн билсэллэригэр ананан таҕыста» диэн ааптардар бэлиэтээн эттилэр. Оннук, Бүлүүбүт историятыгар үтүө суобастаах үлэлэринэн, дьоҥҥо истиҥ сыһыаннарынан бэйэлэрин сүдү кылааттарын киллэрбит дьоммут ааттара үйэлэргэ ааттана туруохтаах, кэлэр кэнчээри ыччакка холобур буолан хаалыахтаах.
Источник: Татаринова, Василина. «Зоя – это жизнь» диэн кылгас ааттаах эрээри, улахан суолталаах кинигэ күн сирин көрдө / Василина Татаринова. – Текст : электронный // UlusMedia. Олох суола : [сетевое издание]. – URL: https://xn--80avakbauqq.xn--p1ai/article/83012 (дата обращения: 16.12.2022)
