Саха биир уһулуччулаах суруйааччыта Николай Егорович Мординов – Амма Аччыгыйа төрөөбүтэ 115 сылыгар анаан тахсыбыт «Онус тоҕо?» диэн оҕолор айымньыларын хомуурунньугар Бүлүүтээҕи оройуоннай оҕо библиотеката буктрейлер оҥордо…
Бу хомуурунньукка, Амма Аччыгыйа төрөөбүтэ 115 сылыгар аналлаах өрөспүүбүлүкэтээҕи куонкурус бастыҥ үлэлэрэ түмүллэн киирбиттэр.
Кинигэ тоҕо «Онус «Тоҕо» диэн буолла? Амма Аччыгыйа «Тоҕус?» кэпсээнин хас биирдии айан суруйбут оҕо онус кэпсээнинэн ситэрэн биэрэр.
Күндү ааҕааччы, Эн, Амма Аччыгыйа айан суруйбут «Тоҕус төгүл «тоҕо?» кэпсээннэрин аахпыт буоллаххына билэҕин, оҕо ааҕар дьоҕурун ол аата өйдөөн, дорҕоонноохтук, түргэнник ааҕарын таһынан, бу кэпсээннэр оҕо сиэрдээх киһи буолан иитиллэн тахсарыгар иитэр-үөрэтэр өрүттэрэ ураты сүдү буоларын.
Кинигэҕэ хас биирдии кэпсээн кырачаан ааҕааччыга олус судургутук, өйдөнүмтүөтүк бэриллэр. Кэпсээннэр кырачаан үөрэнээччи биирдэ аахта да, ис хоһоонун тута өйдүүр гына айыллыбыттар.
Оҕолор айымньы дьоруойа туох алҕаһы оҥорбутун дьүүллүүллэр. Сыыһаны көннөрөр туһугар бэйэлэрин санааларын этэллэр. Үөрэнээччилэр бэйэлэрин олохторугар итинник түктэри быһыыны оҥорбот туһугар кыһаллаллар.
Мэхээс тоҕо кэлэйдэ?…Ийэбит тоҕо хомойдоҕой?… Айта тоҕо кылаас бөлөҕүттэн таҕыста? Саша тоҕо итинник быһыыланна?… бу маны барытын эн «Онус тоҕо?» диэн кинигэҕэ ааҕыаҥ.
Бэлэмнээн оҥордо Т. Ф. Васильева, Оройуоннааҕы оҕо бибилэтиэкэтин сүрүннүүр бибилэтиэкэрэ
Страница киэргэтиигэр туһанылыннылар: [Амма Аччыгыйа. Тоҕус төгүл «тоҕо»? / художник А. П. Мунхалов. – Якутскай : Кинигэ изд-вота, 1974. – 24 с. : ил.] уонна [Онус «Тоҕо?» / [хомуйан оҥордулар: В. С. Кривошапкина, В. П. Трофимова ; Т. Бурнашева ойуулара]. – Дьокуускай : Айар, 2021. – 47, [1] с. : ил.] .