Күн-дьыл сүүрүк курдук устара түргэнин, киһи олоҕо, кырдьык даҕаны өбүгэ этэринии, аттаах киһи түннүгүнэн элэс гынан ааһарын курдук түргэн да буолар эбит. Күндүтүк саныыр дьүөгэбит, коллегабыт, биһиги Сахаянабыт эдэр сааһыгар ыарахан ыарыыттан күннэтэ алтыһа-билсиһэ олорбут чугас дьонугар соһумардык орто дойдуттан барбыта бу дьыл атырдьах ыйын 1 күнүгэр биир сыла буолар.
Кини оройуоннааҕы оҕо библиотекатыгар 2013 с. балаҕан ыйыгар, Дьокуускайдааҕы АГИКИ-га кэтэхтэн үөрэнэ сылдьан, библиотекарынан үлэлии кэлбитэ. Үлэлии сылдьан үөрэҕин бүтэрэн, библиограф идэтин баһылаан, кэнники сылларга оҕо библиотекатыгар библиографтаабыта. 2021 сыл муус устар ыйыгар үрдээн дириэктэр солбуйааччытынан анаммыта. Сахаяна үлэтигэр олус бэриниилээх, чуолкай, түргэн-тарҕан, идеялаах, профессиональнай көрүүлээх-билиилээх этэ. Үлэҕэ киириэҕиттэн аҕам саастаах да, эдэр да коллегаларын кытары биир уопсай тылы түргэнник булбута, убаастабылларын ылбыта.
Биһиги Сахаянабыт барыга бары киэҥ билиилээх, аныгы техникаҕа саҥа программалары түргэнник ылынар сатабыллаах буолан, киниттэн элбэхтик сүбэлэтээччибит. Оҕо библиотекатын биир да тэрээһинэ кинитэ суох буолбата. Барытыгар көхтөөхтүк кыттара. Конкурстар, библиотечнай уруоктар, тематическай биэчэрдэр сценарийдарыттан саҕалаан, декорацияларыгар, атрибуттарыгар тиийэ барытыгар ылсыһан, бары бииргэ оҥорор буоларбыт. Эстетика, кэрэ көстүү өттүнэн көрөн көннөрөн, өссө тупсаран биэрэрэ. Хаһан да мин сатаабаппын, мин итини оҥорбоппун диэбэт этэ, барытыгар ылсыһан иһэрэ. Уопсай библиотека, профсоюз ыытар тэрээһиннэригэр тэрийээччи, көхтөөх кыттааччы буолара. Улуустааҕы культура профсоюһун аатыттан Сунтаарга баран, библиотека эдэр үлэһиттэрин күрэҕэр кыттан, улуус аатын көмүскээн кэлбитэ. Спартакиада, субуотунньук да кинитэ суох ааспаттара.
Бэйэтэ ис-иһиттэн тыл өттүгэр дьоҕурдаах, сахалыы да, нууччалыы да сөпкө суруйара, наһаа грамотнай этэ. Россия, Саха сирэ ыытар диктант акцияларыгар кыттан куруук миэстэлэһэр, туйгун сыанаҕа суруйар этэ. Онон сиэттэрэн суруйбут текстэрбитин, суруктарбытын киниэхэ көннөртөрөн, редакциялатар этибит. Саҥа тахсыбыт кинигэни ааҕа охсон, саҥа сонун суруйааччылары билэрэ, кинилэр ураты буочардарын кэпсээн, киниттэн элбэх саҥаны, сонуну истэрбит.
Олоххо дьулуурдаах, сырдык ыралаах, үтүө майгылаах, дьоҥҥо-сэргэҕэ эйэҕэс сыһыаннаах этэ. Элбэх дьүөгэлэрдээҕэ, кыһалҕалаах ыарахан кэмҥэ куруук көмөҕө кэлэр көрсүө-сэмэй, бэриниилээх дьүөгэ этэ. Балыктыырын, айылҕаҕа сылдьарын, киһини кэрэ-кырасыабай оҥорорун, массыына ыытарын олус сөбүлүүрэ. Бырааһынньык буоларын саҕана кыламан, тыҥырах оҥорторон астынарбыт. Визажистаан, баттах бөрүчүөскэлээн кыргыттары, билэр дьонун тупсаран дьоллуура, элбэх махтал тылларын истэрэ. Киһини кэрэ оҥорор талааннааҕа, онтун сайыннаран анал куурустарга үөрэнэн сертификаттанан кэлбитэ, анал тээбирин, матырыйаал ылынан, эбии дохуот киллэринэрэ.
Сылын аайы төрөөбүт күнүн араас темалаах, уратытык тэрийээччи. Онон сайыны күүтэрбит, быйыл туох ураты төрөөбүт күн буолуой диэн. Үөрэн-көтөн, үҥкүүлээн, ыллаан, оонньоон бэркэ сынньанан, дуоһуйан барааччыбыт.
Кыыс, сиэн, эдьиий, ийэ, кэргэн быһыытынан олус кыһамньылаах, сымнаҕас, эйэҕэс майгылааҕа, дьонун наһаа таптыыра. Дьиэтин-уотун тэрийэн, куруук тилигирии сылдьара.Чугас дьонугар мэлдьи күүс-көмө, өйөбүл буолара.
Билигин даҕаны күлэн-үөрэн, мичээрдээн, үлэтигэр киирэн кэлиэ диэн саныыбыт. Анараа дойду диэн баар буоллаҕына, билигин онно бэйэтии сырдыгын, мичээрин бэлэхтии сырыттаҕа.
Инники элбэх былааннааҕа, хомойуох иһин, туолбакка хааллахтара. Ситэ олорботох олоҕун уола, чугас дьоно салҕыахтара. Сырдык мөссүөнэ, үтүө-мааны майгыта биһиги сүрэхпитигэр, өйбүтүгэр мэлдьи тыыннаах буолуоҕа.
Бүлүүтээҕи оройуоннай оҕо библиотекатыгар
бииргэ үлэлээбит дьүөгэ коллегалара
Источник: Үтүө аата мэлдьи ахтылла туруоҕа : [дьүөгэбит, коллегабыт Сахаяна Альбертовна Григорьева туһунан] / Бүлүүтээҕи оройуоннай оҕо библиотеката. – (Кэриэстэбил) // Олох суола. – От ыйын 29 к. (N 29) . – С. 8.
∗ фотография (2). Летняя школа молодых библиотекарей. Национальная библиотека РС(Я). Наша Сахаяна — 3-я слева.