Олунньу ыйга Бороҕон нэһилиэгин модельнай бибилэтиэкэтигэр, санааларын күүһүнэн төрөөбүт дойдубут киэн историятын, үһүйээннэрин, номохторун чинчийэн, кинигэ гынан бэчээттэтэн бар дьонноругар туохха да тэҥнэммэт бэлэх уунар ытык-мааны дьоммут – М. П. Григорьев, А. А. Павлов, И. А. Андросов – Айанньыт, П. С. Колтовской — «Үс Бүлүү айдарыылаахтара» уонна «Туоҕа Боотур удьуорун утума», «Тумаҥҥа симэлийбиттэр» кинигэлэрин билиһиннэрии буолан ааста.
Кинигэ билии-көрүү бараммат баайа, өй-санаа уостубат кылаата. Киһи аймах көлүөнэттэн көлүөнэҕэ, үйэттэн үйэҕэ муспут баай уопута, билбитэ-көрбүтэ барыта кинигэҕэ киирэр. Ол иһин кинигэттэн ааспыт үйэлэри билэбит, кэлэр кэмнэри сабаҕалыыбыт…
Лүүчүнтэн төрүттээх физико-математическай наука кандитата, университет доцена, РФ үрдүкү профессиональнай үөрэҕириитин бочуоттаах үлэһитэ, Учууталлар учууталлара, Кэбээйи, 1 Лүүчүн нэһилиэгин боччуоттаах олохтооҕо, Марк Петрович Григорьев. Диссертациятын «Устойчивость и периодические решения некоторых классов систем дифференциальных уравнений в критических случаях» диэн темаҕа көмүскээбит. Уонна 40–тан тахса билим бэчээтигэр тахсыбыт үлэлэрдээх. Марк Петрович иллэҥ кэмигэр төрүччү оҥоруутунан дьарыктанар. «Туоҕа Боотур удьуорун утума» Лүүчүннэр төрүттэрин туһунан кинигэ ааптара.
Бороҕонтон төрүттээх история билимин кандитата, гуманитарнай чинчийии институтун научнай үлэһитэ, республикатааҕы «Билии» общество тутаах лектора Афанасий Афанасьевич Павлов. Диссертациятын «Губернатор Иван Иванович Крафт: опыт управления якутской областью» темаҕа көмүскээбит. Кэт Марсден уонна кини экспедициятын туһунан, Аҕа дойду сэриитигэр сахалар кыттыыларын туһунан үлэлэрдээх.
СӨ суруйааччыларын, суруналыыстарын чилиэнэ, «За верность теме», Вячеслав Степанов аатынан бириэмийэлэр лауреаттара, СӨ бэчээтин, үөрэҕириитин туйгуна, РФ театральнай деятеллэрин союһун лауреата, СӨ спордун бэтэрээнэ, «Урожай» спортивнай общество бочуоттаах үлэһитэ, үлэ бэтэрээнэ Иван Афанасьевич Андросов — Айанньыт. «Тумаҥҥа симэлийбиттэр» кинигэ автора.
Дьонун — сэргэтин, төрдүн – ууһун ырытан, үһүйээннэри, остуоруйалары мунньан, хомуйан таһааран уон икки кинигэ ааптара Прокопий Степанович Колтовской. Прокопий Степанович Бороҕон нэһилиэгин Бочуоттаах олохтооҕо, нэһилиэк ытык кырдьаҕаһа. «Үс Бүлүү айдарыылаахтара» кинигэ ааптардарыттан биирдэстэрэ.
Көрсүһүүбүтүн алгыс ырыатынан арыйда культура туйгуна Семен Федоров. Иилээн-саҕалаан ыытта история учуутала Мария Михайловна Фомина. Кинигэлэри биирдиилээн наардаан ис хоһооннорун, тутулун билиһиннэрдэ.
Ааптардары эҕэрдэлээтилэр олохтоох дьаһалта баһылыга Андрей Иннокентьевич Иванов, Бороҕон орто оскуолатын дириэктэрэ Мария Прокопьевна Захарова эҕэрдэ тылларын эттилэр уонна махтал сурук туттардылар.
Саха тылын учуутала Наталья Трофимовна Прокопьевна, үлэ, тыыл бэтэрээнэ Иннокентий Николаевич Иванов, Зоя Михайловна Яковлева, бэтэрээннэр бэрэссэдээтэллэрэ Март Михайлович Спиридонов «Үс Бүлүү айдарыылаахтара» кинигэ туһунан бэйэлэрин тус санааларын эттилэр, ырыттылар. Ирэ – хоро дуоһуйа кэпсэтии, санаа үллэстии буолла.
Ааптардар айар үлэлэрин сырдатар быыстапканы сэргии көрдүлэр. Түмүккэ кинигэ сүрэхтэниитэ үрдүк таһымнаахтык ааспытынан ис дууһаттан үөрэн, махтанан олохтоох бибилэтиэкэ салайааччытыгар Саргылана Петровна Каратаеваҕа махталларын, баҕа санааларын эттилэр. Кэлбит ыалдьыттардыын уопсай хаартыскаҕа түһүү буолла.
Бороҕоннооҕу модельнай библиотека кыл. бибилэтиэкэрэ С. П. Каратаева
Посмотреть эту публикацию в Instagram
Навигация: Вернуться на главную страницу