Олунньу 14 күнүгэр Бүлүүтээҕи киин бибилэтиэкэ ааҕар саалатыгар Бүлүү улууһун Үгүлээт нэһилиэгиттэн байыаннай – бэлитиичэскэй оскуоланы бүтэрбит соҕотох кадровай офицер, Аҕа дойду Улуу сэриитин кыттыылааҕа, педагогическай үлэ бэтэрээнэ, Анаабыр улууһун бочуоттаах олохтооҕо Георгий Дмитриевич Борисов сэрии туһунан илииннэн суруллубут ахтыыларыттан уонна кини олоҕун, бойобуой суолун туһунан махтал үтүө тыллардаах суруйуулартан хомуллубут «Саллаат сэһэнэ» кинигэтин сүрэхтэниитэ буолан ааста. Кинигэҕэ Г. Д. Борисов сэриигэ буолбут быһыыны – майгыны туох да киэргэтиитэ суох хайдах баарынан суруйбута умсугутар. Кинигэни хомуйан, таҥан оҥордулар биир дойдулааҕа филологическэй наука кандидата, Арассыыйа суруналыыстарын Сойууһун чилиэнэ Ангелина Афанасьевна Кузьмина, СӨ чэпчэки атлетикаҕа успуорт маастара Василий Николаевич Кузьмин, улахан кыыһа Антонина Николаевна Чердонова.
Бу кинигэҕэ – кыайыыны уһансыбыт сэрии кыттыылаахтарын туһунан чопчу холобурдарынан кэпсээһин, аҕа көлүөнэ холобуругар иитии, учуутал ханнык баҕарар түгэҥҥэ өрүү бастакы кэккэҕэ сылдьарын сырдатыы буолар. Кыраайы үөрэтэр салаа бибилэтиэкэрэ Матрена Петровна Дмитриева кинигэ тутулун билиһиннэрдэ, дьоһун киһи олоҕун сырдатар үйэтитэр үлэлэригэр кинигэни таһаарбыт Ангелина Афанасьевнаҕа, Антонина Николаевнаҕа махтанна. Кэлбит дьон үксүлэрэ Георгий Дмитриевич үөрэхтээх киһи буолан, хайа сиргэ үөрэммитин, сылдьыбытын, чаастарын сурукка тиспитин бэлиэтээтилэр. Сэрии туһунан дьиҥнээхтик суруллубут баай материал буоларын, ыччаты иитэр — үөрэтэр үлэҕэ, бэтэрээн сэбиэтигэр туһанар эбии матырыйаал баар буолбутун биһирээтилэр. Улуу Кыайыы 75 сылыгар буруолуу сылдьар дьоһун суолталаах кинигэ тахсыбытын ыйдылар. Кэпсэтиигэ кытыннылар Солтуев Герасим Алексеевич, Матвеев Никита Васильевич, Матвеев Иван Васильевич, Харлампьева Каролина Петровна, Васильев Владимир Афанасьевич, Саввинова Клара Егоровна, Маисов Макар Семенович.
Түмүккэ Ангелина Афанасьевна, Антонина Николаевна — Георгий Дмитриевич Борисов кинигэ гынан таһаарар баҕалаах бэлэмнээн хаалларбыт рукопиһа сүтэн, кыыһыгар хаалбыт илбирийбит тэтэрээтин сааһылаан, холботолоон, элбэх үлэни көрсөн бэчээккэ бэлэмнээн 200 эксэмпилээринэн «Сайдам» кинигэ кыһатыгар бэчээттэтэн таһааттаран Үгүлээт, Бүлүү к. олохтоохторугар билиһиннэриилэрин сэргээн, кэлэн кыттыыны ылбыт бар дьоҥҥо истиҥник махтаннылар. Кинигэ суолтатын, бойобуой офицер Георгий Дмитриевич Борисов туһунан ыччакка, дьоҥҥо – сэргэҕэ билиһиннэрэ туруҥ, — диэн баҕа санааларын эттилэр.
Егорова М.Е., «Бүлүүтээҕи поселениялар икки ардыларынааҕы
кииннэммит библиотечнай ситим» МКТ, дир. солбуйааччы
Навигация: Вернуться на главную страницу