«Ахтылҕан санаатыгар куустаран…» кинигэ сүрэхтэниитэ

Тохсунньу 14 күнүгэр, Бүлүүтээҕи киин библиотека ааҕар саалатыгар үлэ, тыыл, доруобуйа харыстабылын ветерана, сэрии огдообото, амарах санаалаах ийэ, уйаҕас дууһалаах эбээ, Бүлүү улууһун Үгүлээтиттэн төрүттээх 89 саастаах Ытык кырдьаҕас, Далбар Хотун – Матрена Александровна Яковлева – Прокопьева «Ахтылҕан санаатыгар куустаран…» диэн кинигэтин сүрэхтэниитэ буолан ааста.

«Ахтылҕан санаатыгар куустаран…» кинигэ быйыл 2018 сылга Дьокуускай куорат ХИФУ издательскай дьиэтигэр 50 экземпляринэн бэчээттэнэн тахсыбыт.

Хоһоон хомуурунньуга олус дириҥ ис хоһоонноох: күннээҕи олох кыһалҕата, үөрүүтэ-көтүүтэ,  сирдээҕи анал  туһунан санаалара,  чугас, алтыспыт дьонугар махтал тыллардаах хоһоонноро.

Ааптары бу күн эҕэрдэлии кэллилэр: Бүлүү улууһун дьаһалтатын аатыттан М.С. Маисов, Үгүлээт нэһилиэгин дьаһалтатыттан Е.Г. Мандарова, Улуус мунньаҕын депутата Т.В. Фомина, биллиилээх суруналыыс Макаар Мыла, Бүлүүтээҕи П.Петров аатынан киин балыыһа профсойууһун аатыттан Л. В. Петрова, «Хомустаах» уокуругун депутата А.И.  Егорова, Бүлүү куоратын дьахталларын комитетын председателэ Л. В. Томская, «Ыллык» литературнай түмсүү, «Алаһа» түмсүү салайааччыта Екатерина  Герасимовна, П.Х.Староватов аатынан түмэл үлэһиттэрэ, биир дойдулааҕа К. П. Харлампьева, истиҥ дьүөгэлэрэ, аймах-билэ дьонноро.

Кинигэ күн сирин көрөрүгэр бэйэтин өттүттэн сүҥкэн кылаатын киллэрбит, кинигэ тахсыытыгар сүүрбүт-көппүт хомуйан оҥорсубут киһиннэн  буолар Е. Н. Волкова, Э. П. Николаева.

Кинигэ сүрэхтэниитэ олус истиҥник ааста. Киһи барахсан олорорун тухары кэрэҕэ, сырдыкка талаһарын,  айар талаана арылыннар – арыллан иһэрин Матрена Александровна Яковлева–Прокопьева олоҕо, айар үлэтэ туоһулуур, кэлэр көлүөнэҕэ холобур буолар.      

Мария Иванова, КОО кыл. бибилэтиэкэрэ



Навигация: Вернуться на главную страницу

Оставить комментарий