Саха норуодунай поэта, тылбаасчыт, Саха Республикатын Культуратын үтүөлээх үлэһитэ, П. А. Ойуунускай аатынан Государственнай бириэмийэ лауреата, хоһоонунан уонна прозаннан 37 кинигэ автора Саха Республикатын Өрөгөйүн ырыатын тексин автордарыттан биирдэстэрэ Михаил Елисеевич Тимофеев төрөөбүтэ 85 сылыгар аналлаах «Көтүҥ, сырдык санааларым…» диэн литературнай-музыкальнай биэчэр төрөөбүт күнүгэр,кулун тутар 15 күнүгэр «Алгыс» сынньалаҥ киинигэр Бүлүүтээҕи кииннэммит библиотека көҕүлээһининэн ыытылынна.
Тэрээһин Михаил Тимофеев уонна Савва Тарасов тылларыгар, Кирилл Герасимов матыыбыгар «Сахам сирэ» диэн Саха Республикатын Өрөгөйүн ырыатынан саҕаланна.
Тэрээһинҥэ «Бүлүү улууһа (оройуона)» муниципальнай оройуон дьаһалтатын социальнай боппуруоска отделын салайааччыта Аксиния Андреевна Кудайбердиева, «Кыргыдай нэһилиэгэ» муниципальнай тэриллии баһылыга Семен Спиридонович Григорьев, «Бүлүү саһарҕата» литературнай түмсүү председателэ, Бүлүү куоратын Өрөгөйүн ырыатын автора, Николай Иванович Иванов, Владимир Спиридонович Николаев салайар «Отуу уота» литературнай түмсүү кыттыылаахтара, Михаил Елисеевич бииргэ төрөөбүт эдьиийэ Мария Елисеевна сиэнэ, төрүт тыл учуутала Елена Софроновна Посельская уонна Анатолий Петров кэлэн ыалдьыттаатылар.
Михаил Тимофеев суруйан хаалларбыт үгүс хоһоонноругар композитор Герман Комраков матыып суруйбута. Уостан түспэт ырыаларын Анна Иванова, Валентина Кириллина, Августина Семенова, Владимир Васильев, Кыргыдай нэһилиэгиттэн “Дьүөгэ” ырыа ансамблын толорууларыгар, Иван Туласынов баяҥҥа доҕуһуолунан дуоһуйа иһиттибит.
Маны тэҥэ оскуола оҕолорун толорууларыгар Михаил Тимофеев хоһоонноруттан ааҕыылары иһиттибит.Ол курдук Гавриил Чиряев аатынан Бүлүүтээҕи 1№ орто оскуола 10 кылааһын үөрэнээччитин Миша Скрябин ааҕыытыгар «Төрөөбүт дойдубар», Геннадий Донской аатынан Бүлүүтээҕи 2№ орто оскуола 8 кылааһын үөрэнээччитин Муся Корякина ааҕыытыгар «Тутулуктаах буолума». Маны таһынан Бүлүү куоратын олохтоохторо хоһоон аахтылар. «Уол оҕо Улаан бэрдэ» диэн хоһоону Степан Максимович Аржаков аатынан Бүлүүтээҕи оҕо дьиэтин библиотиэкэрэ Анна Николаевна Игнатьева аахта, «Мин бүгүн сыһыыга сырыттым» диэн хомоҕой хоһоону Бүлүүтээҕи киин библиотека худуоһунньуга, народнай театр артыыһа Никита Михайлов аахтылар. Тэрээһин олус истиҥник ааста.
Михаил Тимофеевы истиҥ иэйии уонна өркөн өй поэта этэ диэтэхпитинэ сыыспаппыт буолуо. Саха киһитин быһыытынан сэмэй, боростуой буолан норуокка өрүү чугас этэ. Биһиги Бүлүүлэр маннык дьоннордоохпутунан киэн туттабыт. Аҥардас Савва Тарасовтыын айбыт Өрөгөй ырыалара олохпут биир дьоһун көстүүтэ буоллаҕа. Кини айбыт Өрөгөйүн ырыатын бүтүн Саха сирин дьоно ыллыылларыттан биһиги Бүлүүлэр киэн туттабыт.
Бүлүүтээҕи кииннэммит библиотека.