Маннык ааттаах хоһоон, ырыа истиҥ түһүлгэтин кулун тутар 13 күнүгэр Бүлүүтээҕи киин модельнай библиотека уонна Н. И. Ылахова аатынан «Алгыс» культура национальнай киинэ, Саха Өрөспүүбүлүкэтин норуодунай поэта, Саха Өрөспүүбүлүкэтин култууратын үтүөлээх үлэһитэ, П.А. Ойуунускай аатынан судаарыстыбаннай бириэмийэ лауреата, прозаик, тылбаасчыт, Михаил Елисеевич Тимофеев төрөөбүтэ 94 сылыгар анаан тэрийэн ыыттылар.
Михаил Елисеевич 1932 сыллаахха Бүлүү улууһун Модут нэһилиэгэр кулун тутар 15 күнүгэр, күн сирин көрбүтэ. Оҕо сааһа сэрии, сут, кураан уустук сылларыгар ааспыта.
1953с. Бүлүү куорат орто оскуолатын оройуоннааҕы араадьыйа дикторынан үлэлии-үлэлии бүтэрбитэ. 1959 с. Саха государственнай университетын үөрэнэн бүтэрбитэ. Идэтинэн Уус-Алдан оройуонугар учууталлаабыта. Салгыы Дьокуускайга радиокомитекка литературнай- драматическай биэрии салаатыгар ыстаарсай эрэдээктэринэн үлэлээбитэ.
Айар үлэнэн умсугуйан 1957 сылтан бэчээттэнэн барбыта. Хоhооннорун бастакы кинигэтэ «Маҥнайгы хаар» диэн ааттанан 1960 с.тахсыбыта. Бу кэмтэн ыла кини саха поэзиятыгар истиҥ иэйиилээх лирик поэт быһыытынан дьулурҕаннык киирбитэ.
1961с. Саха сиринээҕи кинигэ издательствотын ыстаарсай эрэдээктэринэн, кэлин уус-уран уонна оҕо литературатын салаатын сэбиэдиссэйинэн үрдүк таһаарыылаахтык үлэлээбитэ. Үлэлиир кэмигэр саха литературата өрө көтөҕүллүүтүн уонна кэскилин тэрийсибитэ.
Михаил Елисеевич саха киһитин сүргэтин көтөҕөр, төрөөбүт дойдуга уостубат тапталын, үрдүк киэн туттуутун иҥэрэр дириҥ ис хоһоонноох Саха Өрөспүүбүлүкэтин өрөгөйүн ырыатын ааптардарыттан биирдэстэрэ буолар. Кини олоҕун устата тыйыс тымныылаах Сахатын сирин хорсун-хоодуот, амарах сүрэхтээх дьонун, сирдээҕи олоҕу, тулалыыр айылҕа араас көстүүтүн, таптал нарын иэйиитин хомоҕойдук хоһуйан суруйбут айымньылара отуттан тахса кинигэ буолан бэчээккэ тахсыбыттара. Ол иһигэр 200-тэн тахса истиҥ иэйиилээх хоһоонноро ылбаҕай ырыа буолан көппүттэрэ.
Чулуу биир дойдулаахпытын ахтан-санаан ааһар долгутуулаах киэһэни И.М. Гоголев-Кындыл аатынан кииннэммит библиотека ситимин дириэктэрэ Н.Н. Харлампьев, Н. И Ылахова аатынан «Алгыс» культура национальнай киинин директора А.П.Спиридонова эҕэрдэ тылынан арыйдылар. Улууспутугар поэт аатын үйэтитэр үлэлэри сырдаттылар.
Бастакы түһүмэххэ поэт хоһоонноруттан Г.С. Донской аатынан Бүлүү к. 2№ оскуолатын 11 «Б» кылааһын үөрэнээччилэрэ Алексеев Миша, Томскай Саян, Яковлев Виталий, Томскай Меркурий, Адамов Айынаат (салайааччы И.П.Докторова), улахан дьон Анна Игнатьева, Розалия Николаева, Елена Петрова иэйиилээхтик ааҕан иһитиннэрдилэр.
Михаил Тимофеев өрүү ырыаны өрө туппут поэт. Ол аҥардас кини «Ырыаҕа махтал», «Ырыа», «Кыыс ырыата», «Ырыа быстыыта», «Ырыаны иhиттим», «Ырыа-айан аргыһа» уо.д.а. анабыл хоһоонноругар да көстөр. Кини хоhоонноругар ааттаах-суоллаах композитордар Герман Комраков, Валерий Кац, Николай Берестов, Захар Степанов, Полина Иванова, Владимир Ксенофонтов, Кирилл Герасимов, биллэр мелодистар Христофор Максимов, Ольга Иванова, Елена Олбутцева, Анатолий Семенов, Виталий Андросов, Исай Брызгалов, Владимир Татаринов, Алексей Егоров, Владимир Корякин-Индигирскэй о.д.а үгүс ырыаны айбыттара.
Иккис түһүмэххэ, Бүлүүбүт чуор куоластаахтара поэт хоһоонноругар айыллыбыт уостан түспэккэ ыллана сылдьар ырыалары толорон, саала иһин музыка алыбар суулаатылар. Ол курдук, Матрена Сивцева Елена Олбутцева мелодиятыгар «Бүлүү вальса», Герман Комраков музыкатаыгар «Хатыҥнаах оскуолам», «STEP» вокальнай ансамбль Герман Комраков музыкатыгар «Туруйалар», Александр Иванов Герман Комраков музыкатыгар «Бүгүн мин көрдүм ыраахтан», Камилла Семенова Алексей Егоров мелодиятыгар «Дьокуускайга хаар түһэр», Мария Кырбасова Герман Комраков музыкатыгар «Табалар», Сандаара Парникова Владимир Татаринов мелодиятыгар «Күһүҥҥү күөрэгэй», Олег Петров Герман Комраков музыкатыгар «Күһүҥҥү ырыа» ырыаларын иһиттибит. Толорооччулар бу, өр сылларга дьон кутун туппут дьоһун ырыалары аан бастакытын ыллаан олус долгуйбуттарын билиннилэр.
Саха Өрөспүүбүлүкэтин культуратын үтүөлээх үлэһитэ, биллэр ырыа айааччы Иван Тулааһынап бу киэһэни быһаччы тэрийсэн, хас биирдии ырыаны санааны өрө көтөҕөр, сүрэҕи эппэтэр матыыптары баяҥҥа бэрт сымсатык доҕуһуоллаабыта көрөөччүлэри астыннарда. Эмиэ баян аргыстаах доҕоро Виктор Платоновтыын поэт «Айаас ат» диэн ырыатын баяҥҥа тэҥинэн оонньоон дьон сүргэтин өссө көтөхтүлэр.
Бииртэн биир хатыламмат ырыалары истэ олорон, «Истиҥ иэйии уонна өркөн өй поэта” ааттаммыт киэн туттар биир дойдулаахпыт, Михаил Елисеевич Тимофеев
«….Киhилии Ырыа киһитээҕэр кэрэ,
Киhитээҕэр эрэл,
Киһитээҕэр санньыар,
Киhитээҕэр күүстээх.
Бука, ол иһин буолуо,
Таптаабытым ырыаны
Киhитээҕэр ордук …»
диэн эппитин итэҕэйэҕин. Чахчы даҕаны ырыа кынаттыыр, сирдиир, үрдэтэр, көтүтэр, ардыгар баттыыр, хоргутар, хомотор, мунчаардар күүһүн ылынаҕын. Поэт өссө 1994 сыллаахха кулун тутар ыйга суруйан хаалларбыт хоһоонун тылларын ааҕан баран, хайдахтаах курдук кини ырыа суолтатын дириҥник өйдүүр, ураты уйан дууһалаах ЫРЫА КУТТААХ ПОЭТ буоларын бигэргэтэҕин.
«….Олоруом, син сылдьыам этэ
Соҕотоҕун.
Оттон ырыата суох
Күнү туоруурум саарбах.
Таптаабыт дьахтарбын
Таҥнарарым, умнарым;
Оттон кини ырыаларын
Таҥнарбытым суоҕа
Ырыаны өйдүүбүн тылбааһа суох,
Бэл диэтэр, билбэт омугум тылыттан.
Бу Аан дойдуга астан-таҥастан, утахтан,
Эҥин араас айаннарбыттан,
Бары быһылааннарбыттан;
Тугу испэр киллэрэммин
Кууһан-уураан ылбыппыттан,
Тугу тутан-хабан,
Имэрийэн да көрбүппүттэн-
Ырыаттан ордук миигин
Туох да дьоллообута суоҕа.
Кэлэр 2027 сылга Михаил Елисеевич төрөөбүтэ 95 сылын бэлиэтиэхпит. Бу истиҥ киэһэҕэ поэт айымньытын сэҥээрэн истэр уонна толорор баҕалаах элбэх киһи, эдэр ыччат кыттыбыта үбүлүөйдээх тэрээһини киэҥ хабааннаахтык, үрдүк таһымҥа тэрийэн ыытарга эрэли үөскэттэ.
Луиза Кононова, Бүлүү киин модельнай библиотекатын
кыраайы үөрэтиигэ кылаабынай библиотекара
