Бибилэтиэкэҕэ «Саха этигэн тыла» күрэх ыытылынна

Төрөөбүт төрүт тыл уонна сурук-бичик күнүн чэрчитинэн олунньу 13 күнүгэр Бүлүүтээҕи оройуоннай оҕо уонна ыччат бибилэтиэкэлэрэ алын кылаас оҕолоругар – «Өксөкү сиэннэригэр» хамаанданнан «Саха этигэн тыла» күрэх тэрийэн ыыттыллар.

Тыл мүөтэ
Омукпун этэр.
Тыл сүмэтэ
Оҕону үөрэтэр!
 «Ийэ тылым», Уйбаан Бахсылыырап

Тэрийээччилэр хамаандалары биэс түһүмэххэ тургутан көрдүлэр:

1. «Балык кэпсээнэ» – хамаандалар талбыт оҕолоро сорудах талан ылан өс хоһоонунан пантомима көрдөрдүлэр. Хамаандаларын дьоно өс хоһоонун таайа сатаатылар.
2. «Саха талба таҥаһа» – болдьохтоох бириэмэҕэ хартыынаҕа баар оҕону таҥас-сап, симэх ааттарынан таайан сөпкө таҥыннардылар.
3. «Суруксуттар» — Сэмэн Ноҕоруодап саха бастакы маассабай алпаабытын туһанан бириэмэҕэ тыллары суруйдулар.
4. «Айымньыны таай» – нейросеть уруһуйдаабыт хартыынатынан айымньы аатын таайдылар.
5. «Өбүгэ оонньуулара» – үс төгүл үс оонньууну санаан, куобахтаан ойдулар, кылыҥкайдаан ыллылар.

Бүлүүтээҕи бастакы нүөмэрдээх уопсай үөрэхтээһин начаалынай оскуола икки хамаандата «Дьулуур» уонна «Добун», Герой Н. С. Степанов аатынан Бүлүүтээҕи үһүс нүөмэрдээх орто оскуола, 4 «б» кылааһын «Эрэллэр» хамаандата, Г. С. Донской аатынан Бүлүүтээҕи иккис нүөмэрдээх орто оскуола 3 «б« «Көрдөөх оҕолор» уонна 4 «б» «Өркөн өй», «Бэргэн өй» хамаандалара, уопсайа алта хамаанда күрэхтэстэ.

Ити курдук 5 түһүмэхтэринэн оҕолорбут кииристилэр. Хамаандалар бары биир өй-күүс буолан түмсүүлээхтик, көхтөөхтүк кыайыыны ситиһэргэ илин-кэлин түсүһэн оонньоотулар. Күрэх үрдүк таһымҥа өрө күүрүүлээхтик ааста.

Күрэх түмүгүнэн «Өркөн өй» хамаанда бастакы үрдэл,  «Добун» хамаанда иккис үрдэл,  «Бэргэн өй» үһүс үрдэл буоллулар. Кыайыылаах хамаандалар бары добун суругунан уонна минньигэс бирииһинэн наҕараадаланан үөрүүлэрэ өссө үрдээн, доҕордоһуу оһуохайынан күрэҕи түмүктээтилэр. Бары кыттыбыт оҕолор туоһу суругунан, хамаанда тэрийэн кытыннарбыт салайааччылар махтал суругунан бэлиэтэннилэр.

Ийэ тылбыт, сахалыы саҥабыт өлбөт-сүппэт дьылҕата эдэр көлүөнэ ыччаппытын хайдах иитэн, үөрэтэн-такайан таһаарарбытыттан тутулуктааҕын бары билэбит. Саха тыла тыыннаах хааларын туһугар, сылга анаммыт биир эрэ күҥҥэ буолбакка, күн ахсын бары биир санааннан аныгы кэм сайдыытын туһаҕа таһааран, араас саҥа ньыманы, саҥа хайысхалары тобулан оҕолорго сахабыт тылын кэрэхсэтэр, умсугутар үлэлэри ыытыахха диэн түмүккэ ыҥырыахпытын баҕарабыт.

…Таптыаҕын сахабыт тылын
Ийэбит, аҕабыт кэриэтэ,
Харыстыаҕын өбүгэбит тылын
Үйэлэргэ туруулаһа
«Сахам тыла», Виктория Белолюбская

        Оройуоннааҕы оҕо библиотеката