Бэс ыйын 16-20 күннэригэр Бүлүү оройуоннааҕы оҕо библиотекатыгар «АПТААХ ХОЛБУЙАЧААН» сайыҥҥы смена тэриллэн 3–4 кылаас оҕолоругар ыытылынна. Бүлүү оройуонун оҕолоро сайыҥҥы сменаҕа сахалыы саҥарар ойуулуктары оҥордулар.
Сменаҕа 10 оҕо кыттыыны ылан, сахалыы саҥарар ойуулуктары оҥорууга нэдиэлэ устата дьарыктаннылар.
Сайыҥҥы смена сүрүн сыала – оҕолорго саха тылын кэрэтин билиһиннэрэн, төрөөбүт тылларынан саҥарар баҕаларын күүһүрдүү, айар дьоҕурдарын сайыннарыы, сахалыы ааҕыыга уһуйуу.
Смена кэмигэр оҕолор сахалыы тылынан араас темаларга кэпсэттилэр, остуоруйалары аахтылар, бэйэ-бэйэлэрин кытта санааларын үллэһиннилэр, сынньана таарыйа оонньоон-көрүлээн күннэрин туһалаахтык атаардылар.
Бастакы күннэргэ ойуулук диэн тугун, историятын, ханнык ойуулук оҥорор приложениялары туһанан үлэбит барарын сиһилии билсистилэр. Покадровай анимация (стоп-моушн) техниканы туһанан бастакы холонуулара «Дьуос хайдах доҕоттордоммута» пластилин ойуулук уһулунна.
Саамай сүрүнэ диэн, түмүгэр, оҕолорбут бэйэлэрин илиилэринэн пластилинынан сахалыы тыллаах, интэриэһинэй ойуулуктары айдылар. Бу үлэ оҕолорго олус интириэһинэй уонна туһалаах буолла.
«Аптаах холбуйачаан» сайыҥҥы смена түмүк күнүгэр оҕолор бэйэлэрин үлэлэрин көрдөрөн, ырытан, туох ыарахаттары көрсүбүттэрин кэпсэтэн, ситиһиилээх дьарыгы ааспыттарын туһунан туоһу сурук, өйдөбүнньүк бэлэх тутан, оонньоон, үҥкүүлээн сэргэхсийэн, үөрэн-көтөн тарҕастылар.
Оҕолорбутугар өрүүтүн маннык тэрээһиннэргэ салгыы кытталларыгар, сайыҥҥы сынньалаҥнарын туһалаахтык, сэргэхтик, элбэх саҥаны билэн, кинигэ ааҕан атааралларыгар баҕа санаабытын тиэрдэбит.
В. В. Софронова, Оройуоннааҕы оҕо бибилэтиэкэтин кыл. бибилэтиэкэрэ
