Ыам ыйын 27 күнүгэр Бүлүү куоратыгар И. М. Гоголев-Кындыл аатынан киин бибилэтиэкэҕэ Бибилэтиэкэ күнүн бэлиэтиир олус истиҥ тэрээһин буолла.
С.А.Новгородов аатынан «Айар» кинигэ кыһатын үлэһиттэрэ Бүлүү олохтоохторун кытта көрсүстүлэр, бэйэлэрэ оҥорон таһаарар бородууксуйаларын билиһиннэрдилэр, дьаарбаҥка тэрийдилэр. Ону тэҥэ ыкса үлэлэһэ сылдьар Бүлүү бибилэтиэкэтин үлэһиттэрин, суруйааччылары, кинигэ сүгүрүйээччилэрин кытта билсэ-көрсө, инники былааннары билиһиннэрэр, кэпсиир сыаллаах кэлэ сырыттылар.
Маны сэргэ бу күн «Кинигэ туһунан кинигэ» диэн Саха Өрөспүүбүлүкэтин култууратын туйгуна, оҕолорго аналлаах элбэх кинигэ автора, Тоҕус нэһилиэгин бибилэтиэкэрэ Анастасия Марковна Егорова кинигэтин сүрэхтэниитэ буолла. Кинигэни оҕо бибилэтиэкэтин сүрүн библиограба Мария Егоровна билиһиннэрдэ, автор үлэтин туһунан кэпсээтэ. Мустубут дьон оҕолорго анаан олус туһалаах кинигэ тахсыбыт диэн биһирээтилэр.
Бибилэтиэкэ — дьон-сэргэ, оҕо-аймах, ыччат, сөбүлээн түмсэр сирэ, кинигэ — олоххо сирдиир суолдьуппут, саҥаттан саҥаны арыйар, билиини-көрүүнү биэрэр истиҥ доҕорбут. Бырааһынньыгынан!
Василина Татаринова
∗ Источник: Татаринова, Василина. Бүлүүгэ Бибилэтиэкэ күнүн бэлиэтээтилэр / Василина Татаринова. – Текст : электронный // UlusMedia. Олох суола : [сетевое издание]. – URL: https://xn--80avakbauqq.xn--p1ai/bylyyge-bibiletieke-kynyn-belieteetiler/ (дата обращения: 27.05.2025)
ИСТОРИЯ ВИЛЮЙСКОЙ БИБЛИОТЕКИ: ОТКРЫТЬ ВИРТУАЛЬНУЮ ВЫСТАВКУ
∗ Фотографии сделанные сотрудниками библиотеки МКУ «Вилюйская МЦБС им. И. М. Гоголева-Кындыл» – В. В. Софроновой и А. А. Степановой
