Биһиги бары Улуу Кыайыы күнүн – ыам ыйын 9 күнүн кытары ыкса сибээстээх курдукпут. Ол, аҕа көлүөнэ дьон иннигэр төлөнүөхтээх сүдү иэһи кытары ситимнээх. Биһиги ытык иэспит – уоттаах сэриигэ Ийэ дойдубутун көмүскээбит буойуннар, тыылга бэйэлэрин харыстаммакка үлэлээбит дьоммут тустарынан үүнэр көлүөнэҕэ туох баар кырдьыгынан тиэрдии, кинилэр сырдык ааттарын үйэтитии буолар.
Ыам ыйын 7 күнүгэр Бүлүү куоратын А. И. Николаев аатынан Албан аат түмэлигэр Аҕа дойду Улуу сэриитин кыттыылааҕа, Саха сирин норуотун хаһаайыстыбатын үтүөлээх үлэһитэ, Бүлүү улууһун, Бүлүү куоратын, Ньурба улууһун Акана нэһилиэгин бочуоттаах олохтооҕо, учуутал, сэбиэскэй-партийнай үлэһит, Өрөспүүбүлүкэ Ытык аҕа бэлиэтин хаһаайына Афанасий Иннокентьевич Николаев туһунан саҥа кинигэ сүрэхтэннэ. Кинигэни ветеран кыра кыыһа Валентина Афанасьевна Николаева хомуйан оҥорбут.
Субу бэчээттэн тахсыбыт «Учуутал, буойун, патриот — Афанасий Николаев» диэн кинигэ Дьокуускай куоракка «Алаас» кинигэ кыһатыгар таҥыллыбыт. Икки тылынан суруллубут. 288 сирэйтэн турар, 100 ахсааннаах. Бу кинигэни Афанасий Иннокентьевич тус бэйэтэ өссө 2015 сыллаахха Кыайыы 70 сылыгар бэлэмнээн таһаартарбыт «Хорсуннар суоллара умнуллубат» диэн кинигэтин салгыытын курдук көрүөххэ сөп.
Афанасий Иннокентьевич 1960 сылтан Бүлүүнү иккис дойду оҥостон, олоҕун, үлэтин бүүс бүтүннүү Бүлүү куоратын, улууһун сайдыытыгар анаабыта. Тапталлаах кэргэнэ Мария Ивановналыын 5 оҕону төрөтөн, иитэн олох суолугар үктэннэрбиттэрэ.
Ытык киһи олоҕун кэпсиир дириҥ ис хоһоонноох саҥа кинигэни билиһиннэриигэ уолаттара Российскай Федерация, Саха Өрөспүүбүлүкэтин үтүөлээх архитектора, Российскай Федерация, судаарыстыбаннай бириэмийэтин лауреата, Бүлүү улууһун бочуоттаах олохтооҕо Иннокентий Афанасьевич, Саха Өрөспүүбүлүкэтин судаарыстыбаннай бириэмийэтин лауреата Юрий Афанасьевич, кыра кыыһа Саха Өрөспүүбүлүкэтин үтүөлээх экэнэмииһэ Валентина Афанасьевна кыттыыны ыллылар.
Кинилэр кинигэ тахсыытыгар ахтыынан көмөлөспүт дьоҥҥо, үбүлээбит улуус дьаһалтатыгар махтанан туран дьиэ кэргэн архыыбыттан анаан таҥан оҥорбут видеоматырыйаалларын көрдөрдүлэр. Дьон Афанасий Иннокентьевич сырдык мөссүөнүн, байыаннайдыы киппэ быһыытын субу баардыы көрөн, араас кэмҥэ эппит-тыыммыт олохтоох тылын-өһүн, эт куолаһын, истэн бука бары иһийэн олордулар.
Хорсун буойун ийэ дойдутугар бэриниилээх дьоһун олоҕун үйэтитэр кинигэ тула кэпсэтиигэ Бүлүү улууһун баһылыга Сергей Николаевич Винокуров, Бүлүү куоратын баһылыга Ян Анатольевич Попов, Бүлүү улууһун бэтэрээннэрин сэбиэтин бэрэссэдээтэлэ Федор Федорович Николаев, А. И. Николаев аатынан Албан аат түмэлин салайааччыта Борис Николаевич Васильев, чугас дьонноро Наталья Дмитриевна Алексеева, Гаврил Семенович Корякин, Гарий Викторович Томскай о.д.а атыттар кытыннылар.
Кырдьаҕас Бүлүү библиотеката Афанасий Иннокентьевич туһунан ураты сылаас өйдөбүлү куруук илдьэ сылдьар. Ол курдук эдэр сааһыттан саамай көхтөөх ааҕааччы Афанасий Николаев нуучча да, омук да классик суруйааччыларын айымньыларын олус тартаран ааҕара. Хаһыаты, сурунаалы тиһигин быспакка сыныйан көрөрө. Өссө 1997 сыллаахха кини «Миэхэ билиигэ-көрүүгэ, улахан олох суолугар бастакы олугу уурбут Бүлүү библиотекатын өрүү үтүө тылынан ахтабын. Кинигэни ааҕыы миэхэ олус элбэҕи биэрбитэ…» диэн суруйан хаалларбыта туохтааҕар да күндү сыанабыл буолар.
Истиҥ көрсүһүү түмүгэр махталлаах библиотека «Күүрээннээх үлэннэн, уҕараабат уоҕунан» диэн Афанасий Иннокентьевичка аналлаах биобиблиографическай испииһэги оҥорбутун оҕолоругар бэлэх уунна. Үтүөкэннээх учуутал, хорсун буойун, патриот Афанасий Иннокентьевич Николаев аата Бүлүү устуоруйатыгар бигэтик ааттана туруо.
Луиза Кононова, киин библиотека кыраайы үөрэтиигэ кылаабынай библиотекара
∗ коротко ознакомиться с содержанием книги: https://librvil.ru/2025/05/04/news04052025-2/
∗ Фото: Г. Г. Осипова и А. А. Степановой, сотрудников МКУ «Вилюйской МЦБС им. И. М. Гоголева-Кындыл»
