Муус устар 12 күнүгэр, биһиги дойдубут Космонавтика күнүн бэлиэтээтэ — киһи аан бастаан космос куйаарыгар көппүтэ 64-с сылын туолла. Бу күннэргэ, Бүлүүтээҕи оройуоннай оҕо библиотеката куорат оҕо уһуйааннарын кырачааннарыгар, киһи космоска бастакы көтүүтүн билиһиннэрэр библиотечнай уруоктары ыыттылар.
1961 сыллаахха, муус устар 12 күнүгэр, летчик-испытатель Юрий Гагарин аан бастаан космоска көппүтэ. Гагарин Сир орбитатыгар Байконур космодромтан «Восток» хараабылынан 108 мүнүүтэ көтүүтүн кэмигэр Сири биирдэ эргийбитэ. Бу – Советскай Союзка эрэ буолбакка, бүтүн киһи-аймахха сүҥкэн бэлиэ күнүнэн буолбута. Онтон ыла куйаары дириҥэтэн чинчийии, кун бүгүнүгэр диэри ыытыллар. Бу бэлиэ күҥҥэ сыллата Космос туһунан киэҥ эйгэҕэ билиһиннэрэллэр. Ордук оҕолорго, ыччакка аналлаах тэрээһиннэр ыытыллалар.
Үлэ былаанын чэрчитинэн Бүлүүтээҕи оройуоннай оҕо библиотекатын үлэһиттэрэ, муус устар 15, 16, 17 күннэригэр «Аленушка», «Чуораанчык», «Кустук» оҕо уһуйаанын орто, улахан, бэлэмнэнии бөлөхтөрүгэр киһи космоска бастакы көтүүтүн билиһиннэрэр библиотечнай уруоктары ыыттылар.
Оҕолор уруокка халлаан куйаарын, сулустары, планеталары интэриэһиргээн үгүс боппуростарга хоруй ыллылар. Бастакы космонавт Юрий Гагарин олоҕун туһунан билистилэр.
Оҕолор аан маҥнай космоска көппүт ыттар – Белка и Стрелка тустарынан мультфильм көрдүлэр, таабырын таайдылар. Сири тула бастакы спутник көппүтүн туһунан радионан биллэриллибит устууну иһиттилэр, араас космоска сыһыаннаах оонньуулары оонньоотулар, ракета ыытан куоталастылар.
Библиотека үлэһиттэрэ кырачааннарга «Звездное небо Юрия Гагарина» диэн кинигэ быыстапкатын илдьэн көрдөрдүлэр, кэпсээтилэр.
Кырачааннар тэрээһиҥҥэ көхтөөхтүк кытыннылар, олус интэриэһиргээтилэр, иһиттилэр, көрдүлэр. Уруоктар, оҕолору барыларын хабан, бэрт сэргэхтик аастылар.
Бу оҕолортон баҕар, Советскай Союз Геройа, бастакы космонавт Юрий Алексеевич Гагарин курдук хорсун быһыытын холобур оҥостон, летчик, космонавт буолуохтара, халлаан куйаарыгар көтүөхтэрэ диэн баҕа санаалаах хаалабыт.
Т. Ф. Васильева, оройуоннааҕы оҕо бибилэтиэкэтин кыл. бибилэтиэкэрэ
