Элэккэй, ыраас санаалаах, сытыары-сымнаҕас майгылаах саха киһитин кэрэмэһэ – коллегабыт Никита Петрович Михайлов баара буоллар бүгүн, муус устар 17 күнүгэр, 65 сааһын туолуо этэ…
Никита Петрович Михайлов өрүс унуор сытар «үрэх баһа» аатырар дойду саамай кэрэ сиригэр I Күүлэккэ төрөөбүтэ. Кини кэпсээнин иһиттэххэ, оройунан көрбүт оҕо сааһа, ахтылҕаннаах ахсым эдэр кэмэ барыта – эргиччи күннээх, кыырпаҕа суох ыраас халлааннаах Күүлэт дьэрэкээн сибэккилээх алаастарыгар, хатын мастаах чараҥнарыгар, түптэ сыттаах сайылыктарыгар, уһун күнү аттара сөтүөлүүр ыраас уулаах күөллэригэр, мутукча сытынан саба биэрэр тыатыгар ааспыт эбит.
Элбэх оҕолоох ыал оһоҕос түгэҕинээҕи тапталлаах кыра уолларын ийэлээх аҕата, элбэх эдьиий бэрийэн, бэйэлэрин холобурдарыгар иитэн, инникитин дьон-сэргэ ортотугар дьоллоохтук олороругар, үлэни-хамнаһы өрө тутарыгар үөрэппиттэр, такайбыттар эбит.
Никиитэ сатаабатаҕа, кыайбатаҕа диэн туох да суох буолааччы. Кини кырдьаҕас үлэһиттэр Александр Михайлович, Анна Николаевна, Анна Прокопьевна, Анисия Михайловна, Мария Прокопьевна, биир дойдулааҕа Анастасия Васильевна баалларыгар үлэҕэ киирэн, начаас бибилитиэкэ тапталлаах оҕото буола охсубута. Никиитэ бэйэтэ кимиэхэ баҕарар истиҥ сыһыаннаах, сахаҕа да дэҥҥэ көстөр, оҕо өс киирбэх эрэнэр-итэҕэйэр хаачыстыбатын бу дойдуттан барыар диэри сүтэрбэтэх киһи этэ. Барыта сүбэнэн, ардыгар атаахтатан дьаалатынан ыытан, ардыгар буойан-дьарыйан даҕаны, бибилитиэкэ хаһан да бүппэт ииччик-быыччык улэтигэр, наада буоллаҕына түүннэри-күнүстэри да, номнуо 38 сыл үлэлээбит эбит. Кимиэхэ да өрөлөспөтө, аккаастаабата, көмөлөһөргө куруук бэлэмэ, кини тула, сааһыттан тутулуга суох атас-доҕор элбииригэр олук охсоро, дьону бэйэтигэр тардар куүһэ олох аартыгар чиҥник үктэнэн киирэригэр көмөлөстөҕө.
Олох диэн ыҥыра, угуйа турар бэрт кэрэ өйдөбүлгэ тиийэн олороору Никиитэ дьиэ-уот тэринэн, онтон утуу-субуу кыыстаах уол оҕолонон, дьэ, дьиҥнээхтик «Киһи киһитэ» буолан, бэйэтин сыаналаныыта үрдээн, мындыра-сатабыла арыллан, айылҕаттан эйгэтэ кэҥээн, талааннарын таһааран барбыта.
Бибилитиэкэҕэ үйэтин тухары солбуллубат культмаассабай үлэҕэ эппиэттээх киһи, оҕо-аймах кинини улуу нуучча поэта Александр Сергеевич Пушкин быһыытынан билиниэхтэригэр дылы.
И. М. Гоголев-Кындыл аатынан норуодунай тыйаатыр тутаах артыыһын быһыытынан дьон тылыгар-өһүгэр киириэн киирбитэ, умнуллубат кэрэ оруоллары айбыта-туппута.
Владимир Васильев аатынан норуодунай хуор бастын ырыаһыттарыттан биирдэстэрэ, салайааччы Владимир Васильевич хайҕалга кэччэгэй киһи – Никиитэни баарыгар да, суоҕар да «сурун куолас тутааччы» быһыытынан кэлтэччи хайгыыр киһитэ этэ.
Бу икки кэлэктииптэр иккиэн норуодунай ааттара да элбэҕи кэрэһэлиир: үгүс улэнэн, элбэх сыранан ситиһиллэр-иҥэриллэр аат. Никиитэ хуору кытта «Россия сүрэҕэ» диэн аатырар дьикти сиргэ Сергиев Посадка, Бүтүн Россиятааҕы пенсионердар хордарын көрүү-күрэҕэр лауреат аатын ылбыппытынан, таарыччы, ыра гыммыт аатырар Ильмен күөлгэ сырыыны, саха буойуннарыгар сүгүрүйүүнү олус астыммытын кэпсээччи.
Ыллыыр талаана Никиитэни өссө үрдүк үрдэлгэ таһаарбыта. Бүлүүгэ, онтон Дьокуускайга О.Н. Корякина салалтатынан композитор М.Н. Жирков «Сыгый Кырынаастыыр» операта ситиһиилээхтик туруоруутугар кыттыбыта, онтон улахан дуоһуйууну ылбыта.
Никиитэ дьоһун олоҕу олорон ааста, Бүлүү куоратыгар эдэрдиин-эмэнниин кинини билбэт киһи аҕыйаҕа буолуо. Саха киһитэ олоххо күүстээх тапталын Никиитэбит холобуругар көрөн өйдөөтүбүт, ыарахан ыарыыга ылларан баран, олох бу да тургутуутун этэҥҥэ аһарар хоһуун санаалаах, улахан эрэллээх этэ, кыаллыбата… Улахан да кыра да дьыалаҕа тубалык туттар киһибит элбэхтик «Никиитэбит баара буоллар…» дэтэрэ буолуо.
И.М. Гоголев-Кындыл аатынан кииннэммит библиотека ситимин кэлэктиибэ
