Олоҥхо түмсүүнү түстүүр

Бэс ыйын 20-21 күннэригэр Аммаҕа ыытыллыбыт Олоҥхо алгыстаах ыһыаҕын ыалдьыттарын киэҥник хабар биир улахан кэрэхсэнэр тэрээһининэн – олоҥхону уһун тыыннаах ааҕыы марафона буолла.


Бу, олоҥхо курдук сүдү айымньыга интэриэһи көбүтэр, норуоту чугаһатар сонун бырайыак, өссө 2022 сыллаахха Үөһээ Бүлүүгэ Өрөспүүбүлүкэтээҕи ыһыахха саҕаламмыта. Ааҕыыны толкуйдаан, тобулан таһаарбыт ааптарынан Үөһээ Бүлүүтээҕи кииннэммит библиотека ситимин салайааччыта Наталья Кирилловна Петрова буолар. Кини бастакы ааҕыыларга П.А.Ойуунускай «Дьулуруйар Ньургун Боотур» олоҥхотун Сахабыт сирин араас муннугар олорор 100 киһи уу сахалыы тылынан ааҕарын ситиспитэ.

Онтон салгыы бырайыагы өссө чочуйан 2023 сыллаахха Үөһээ-Бүлүүгэ ыытыллыбыт Олоҥхо ыһыаҕар «Ньургун Боотур» олоҥхону саха, нуучча, эбээн уонна аангылыйа тылларынан ааҕан иһитиннэрбиттэрэ киэҥ биһирэбили ылбыта.

Быйылгы ааҕыылары саха народнай поэта Владимир Михайлович Новиков-Күннүк Уурастыырап аатын сүгэр Амматааҕы киин библиотека тэрийэн ыытта. Өрөспүүбүлүкэ 29 улууһуттан 100 кыттааччы кэрэ айылҕалаах Муона чараҥар мустан аатырбыт олоҥхоһут Тимофей Васильевич Захаров-Чээбий «Ала Булкун бухатыыр» олоҥхотун икки күн устата уустаан-ураннаан ааҕан дьоҥҥо-сэргэҕэ иһитиннэрдилэр. Бу сырыыга олоҥхону ааҕыыга Амма улууһун ааттаах-суоллаах олоҥхоһуттарын удьуор утумун салҕыыр сыдьааннара, аймахтара холоннулар. Кинилэр төрүттэриттэн бэриллибит олоҥхолуур дьоҕурдара тымыр-хаан тардыытынан көлүөнэлэргэ тарҕанан, сүтэн-симэлийэн хаалбакка, салҕана турарын бигэтик итэҕэттилэр.

Олоҥхо ааҕыытын марафонун үөрүүлээх арыйыыга Москваттан, Санкт-Петербургтан, Сахабыт сириттэн биллэр учуонайдар, суруйааччылар эҕэрдэлэрин тиэртилэр уонна кинигэ бэлэхтэрин ууннулар.

Икки күн устата ыытыллыбыт олоҥхону ааҕыы араас саастаах, идэлээх, дьарыктаах, олоххо тус көрүүлээх дьону биир эйгэҕэ түмтэ. Манна куолас араас дэгэтин туһанан кэпсиир, чуордук ыллыыр-туойар маастардары сэргэ олоҥхону аан бастаан ааҕарга холонооччулар үгүспүт. Кыттыбыт дьон бука бары ытык ыһыах түһүлгэтигэр олоҥхо алыптаах эйгэтигэр киирэ түһэн ылбыппытыттан долгуйан, дуоһуйан тарҕастыбыт.

Үбүлүөйдээх Бүлүү куоратыттан кыттар чиэс миэхэ тиксибититтэн олус астынным. Тэрийээччилэргэ дириҥник махтанан туран, Бүлүүбүт улууһун уонна киэн туттар биир дойдулаахпыт Степан Максимович Аржаков туһунан сиһилии кэпсиир дьоһун кинигэлэри бэлэх ууннум. Эдэркээн Степан Аржаков гражданскай сэрии кэмигэр Амманы босхолооһуҥҥа сүҥкэн оруолун, суолтатын тоһоҕолоон бэлиэтээтим.

Түмүккэ Амма улууһун библиотекаларын ситимин директора Прокопий Евгеньевич Прокопьев олоҥхону уһун тыыннаах ааҕыы анал бэлиэтин эһиил ыытыллыахтаах Нерюнгри оройуонугар, чуолаан култуура салайааччытыгар Туяра Алексеевна Петроваҕа туттарда. Онон олоҥхобут суолтата, тылын күүһэ сылтан сыл үрдээн саҥаттан саҥа сэҥээрээччилэри үмүөрүтэн, дьону өссө да түмэ турарыгар саарбахтаабаппын.

Луиза Кононова, киин библиотека кыраайы үөрэтиигэ кылаабынай библиотекара



Дополнительно с информацией о III республиканском марафоне «Читаем Олонхо»  можете ознакомиться на сайте  Амгинской ЦБС:

Стручкова, Вероника. Бэс ыйын 20-21 күннэригэр Олоҥхо ыһыаҕын чэрчитинэн Амматааҕы киин библиотека Өрөспүүбүлүкэтэҕи Саха сирин улуустарыттан 100 киһи кыттыылаах Т.В. Захаров-Чээбий «Ала Булкун бухатыыр» олоҥхотун уһун тыыннаах ааҕыытын марафонун тэрийэн ыытта / Вероника Стручкова // Амматааҕы кииннэммит библиотечнай тиһик : [официальный сайт]: https://amgabiblioteka.ru/?p=20732 (дата обращения: 25.06.2024).

Оставить комментарий

Наш сайт использует файлы cookies, чтобы улучшить работу и повысить эффективность сайта. Продолжая работу с сайтом, вы соглашаетесь с использованием нами cookies и политикой конфиденциальности.

Принять
Обратная связь