Ыам ыйын 25 күнүгэр, Саха сиригэр аан бастаан Оһуохай күнэ ыытыллар. Мантан инньэ сылын аайы бу күнү бэлиэтиир буолуохпут. Күндү оҕолор! Эһигини Бүлүүтээҕи оройуоннай оҕо бибилэтиэкэтэ бу бэлиэ күҥҥэ бэлэмнээбит «Бүлүү оһуохайа» диэн тургутугар көхтөөхтүк кыттарга ыҥырар.
Саха Өрөспүүбүлүкэтин Ил Дархана Айсен Николаев балаҕан ыйын 7 күнүгэр 2023 сыллаахха Оһуохай күнүн төрүттүүр туһунан Ыйаахха илии баттаабыта. РФ норуоттарын материальнайа суох култуурунай нэһилиэстибэлэрин араҥаччылыыр, үйэтитэр, сайыннарар сыалтан бу Ыйаах тахсыбыта. Ол курдук Оһуохай күнүн ыытаары Саха сирин бары улуустарыгар бэлэмнэнэ сылдьаллар.
Оһуохай–саха национальнай культуратын, фольклорун күн бүгүнүгэр дылы тиийэн кэлбит үйэлээх биир сүрүн көрүҥэ, уус-уран тылы–өһү чочуйар, төрөөбүт тылга уҕараабат тапталы иҥэрэр, өйү-санааны сааһылыыр, күүһүрдэр кыһа.
Үөрэтэн көрүү түмүгүнэн, дьон илии-илиилэриттэн сиэттиһэн, күүстээх биоэнергия үтүө сабыдыалын ылаллар. Оһуохай эти-сиини эрчимирдэр, дьону-сэргэни иллиир кыахтаах буолан киһиэхэ айылҕа биэрбит дьоҕурун барытын дьүөрэлээн сайыннарар ньыма. Оһуохай дьону түмэр, чэбдигирдэр, сэргэхситэр, сайыннарар. Үҥкүү тылын этээччилэр кылыһахтаах кэрэ куоластарынан, уу сүүрүгүн курдук умсугутуулаах уран тойуктарынан саха дьонун кутун туталлар, уйулҕатын хамсаталлар.
Биһиги Бүлүүбүт улууһугар урут да, билигин да кылыгырас кылыһахтаах, ылбаҕай ыпсарыылаах ырыалаах, хомоҕой хоһоонноох үҥкүүһүттэрбитинэн биллэбит, кинилэринэн киэн туттабыт. Аҕа көлүөнэ үҥкүүһүттэри орто көлүөнэ уонна эдэр этээччилэр, оһуохайдьыт оҕолор утумнаан салгыыллар.
Оһуохай билигин киэҥник тарҕанан, ыһыахтарга эрэ буолбакка, түмсүүлэргэ, араас бырааһынньыктарга, юбилейдарга, көрсүһүүлэргэ, сыбаайбаларга, банкеттарга, биэчэрдэргэ, айылҕаҕа сынньанан көрү-нары көҕүлүттэн тутар үгүс түгэннэргэ үҥкүүлэнэр-ылланар.
Бүлүүтээҕи оройуоннай оҕо бибилэтиэкэтэ
∗в оформлении заставки страницы использована работа «Осуохай» , из серии Якутский праздник ысыах, якутского художника – графика, живописца Карамзина Владимира Семеновича (1930–2013) — заслуженного художника РСФСР, заслуженного деятеля искусств ЯАССР, члена Союза художников России.
