Уус-уран айымньы көмөтүнэн оҕо сахалыы тыыҥҥа сыһыарыллар, төрөөбүт тылын билэргэ, ийэ тыл баайын өйдүүргэ дьулуһар, тылын саппааһа байар. Төрөөбүт тылын сүмэтин билэргэ талаһар, кэрэхсиир эрэ оҕо сайаҕас тыллаах-өстөөх, бары өттүнэн ураты көрүүлээх, бэйэтин санаатын чопчу сатаан этинэр буола улаатар.
Мин күүстээхпин ийэ тылбынан,
Аалы көтөҕөр алгыспынан,
ϴбүгэлэртэн силис тардынан
Тыыннаах кэлбит үгэспинэн!
В.И. Босиков-Босяк
Олунньу ый 14 күнүгэр – Арассыыйаҕа «Дьиэ – кэргэн», Саха Өрөспүүбүлүкэтигэр «Оҕо саас», Бүлүү улууһугар «С. М. Аржаков», Бүлүү куорат — 390, Бүлүүтээҕи оройуоннай оҕо библиотека – 75 сылларынан, Ийэ тыл уонна сурук-бичик күнүн чэрчитинэн Бүлүүтээҕи оройуоннай оҕо бибилэтиэкэтэ уонна Н. И. Ылахова аатынан «Алгыс» национальнай культурнай киин көҕүлээһиннэринэн «Уус-уран айымньыттан сомсобут ийэ тылбыт сүмэтин» диэн 5, 6, 7, 8, 10 кылаас оҕолоругар улуустааҕы уус-уран айымньыны дорҕоонноохтук, иэйиилээхтик ааҕыы күрэҕэ ыытылынна.
Кыттааччылар 3 бөлөххө арахсан, паараннан иккиэ буолан оскуола бырагыраамматыгар киирбит, биир уус – уран айымньыттан быһа тардыыны, тута талан ылан, дорҕоонноохтук ааҕыыга 32 оҕо холоннулар, күрэс былдьастылар.
Дьүүллүүр сүбэ састаабыгар (бэрэсэдээтэл) Ирина Васильевна Нифонова, Н. И. Ылахова аатынан «Алгыс» национальнай культурнай киин дириэктэрин солбуйааччыта, төрөөбүт төрүт тыл түмэр түһүлгэтин Өрөспүүбүлүкэтээҕи общественнай хамсааһын чилиэнэ; Екатерина Прокопьевна Михайлова, Хомус музейын түмэлин сэбиэдиссэйэ, Саха Өрөспүүбүлүкэтин культуратын туйгуна; Анна Ивановна Чемпорова, оройуоннай оҕо бибилэтиэкэтин кылаабынай бибилэтиэкэрэ, Саха Өрөспүүбүлүкэтин культуратын туйгуна кыттааччылар дорҕооноохтук ааҕар дьоҕурдарын сыаналаатылар.
Сыаналааһын ирдэбилэ: айымньыны иэйиилээхтик толоруу, хомоҕойдук уонна чуолкайдык ааҕыы, айымньы ис хоһоонун арыйыы, истээччигэ тиэрдии, сценическай культура.
Ол курдук 5 – 6 кылаастарга кыайыылаҕынан таҕыстылар:
Бастакы үрдэл – Кононова Айсена, Васильев Алик Г. И. Чиряев аатынан 1 №-ээх оскуола 5 “б” кылааһын үөрэнээччилэрэ;
Иккис үрдэл – Каратаева Сандаара, Протопопов Айсен И. Л. Кондаков аатынан Бүлүүтээҕи гимназия 5 “б” кылааһын үөрэнээччилэрэ;
Үһүс үрдэл – Эверстова Саша, Алексеев Альберт Н. С. Степанов аатынан 3 №-ээх оскуола 6 кылааһын үөрэнээччилэрэ;
7 – 8 кылаастарга кыайыылаҕынан таҕыстылар:
Бастакы үрдэл – Игнатьева Маша, Борисов Максим Г. С. Донской аатынан 2 №-ээх оскуола 8 “б” кылааһын үөрэнээччилэрэ;
Иккис үрдэл – Николаева Айсана, Аржаков Дима Н. С. Степанов аатынан 3 №-ээх оскуола 8 кылааһын үөрэнээччилэрэ;
Үһүс үрдэл – Михайлова Туйаара, Ефремов Владик Н. С. Степанов аатынан 3 №-ээх оскуола 7 “б” кылааһын үөрэнээччилэрэ;
10 кылаастарга кыайыылаҕынан таҕыстылар:
Бастакы үрдэл – Яковлева Нарыйаана, Федоров Иван Г. И. Чиряев аатынан 1 №-ээх оскуола 10 “б” кылааһын үөрэнээччилэрэ;
Иккис үрдэл – Иванова Владилена, Степанова Сандаара Г. С. Донской аатынан 2 №-ээх оскуола 10 кылааһын үөрэнээччилэрэ;
Кыайыылаахтарга 1,2,3 истиэпэннээх добун сурук, бары кыттааччыларга уонна салайааччыларга туоһу сурук туттарылынна.
Ийэ тылбытын харыстыырга, таптыырга үөрэтэр, уус-уран айымньы эйгэтигэр үүнэр көлүөнэ ыччаты сыһыарар, ааҕыыга угуйар кэскиллээх тэрээһиннэрбитигэр сэргэхтик кэлэн кытта туруҥ, киэҥ араҥаҕа сонун кынан тарҕата туруҥ диэн баҕа санаабытын этэбит. Бибилэтиэкэ аана өрүү аһаҕас, көрсүөххэ дылы.
Бүлүүтээҕи оройуоннай оҕо бибилэтиэкэтэ
