Бүлүүтээҕи оҕо бибилэтиэкэтэ хаһыс да сылын «Добрая ромашка» бырайыагынан үлэлиир. Ахсынньы 21 күнүгэр доруобуйаларынан хааччахтаах дьон Аан дойдутааҕы күннэригэр аналлаах декада чэрчитинэн, 2023 сыл үбүлүөйдээх айымньыларын билиһиннэрэр сыаллаах «Остуоруйа дойдутугар» диэн саҥа дьыллааҕы тэрээһин ыытылынна.
Бу күн Оҕо бибилэтиэкэтигэр С. М. Аржаков аатынан дьиэ кэргэҥҥэ иитиини өйүүр киин иһинэн дьарыктанар доруобуйаларынан хааччахтаах оҕолор кэлэн ыалдьыттаатылар.
Элбэх араас оонньууларга, үҥкүүлэргэ, биктэриинэлэргэ остуоруйа тыыннаах дьоруойдарын кытта оҕолор көхтөөх кытыыны ыллылар. Оҕо суруйааччылара Николай Носов суруйбут 70 сылын туолбут «Приключения Незнайки» дьоруойа Билбэтчэй, 100 сылларын туолбут Самуил Маршак «О глупом мышонке» кутуйаҕа, Корней Чуковскай киртэн тэйэн, чэнчис буоларга ыҥырбыт Мойдодыра, доҕотторун тула муспут Муха-Цокотуха, А. Толстой 85 сылын туолбут, азбукатын кыбынан оскуолаҕа үөрэниэхтээх, араас мүччүргэннээх түгэннэргэ түбэспит Буратино, Лазарь Лагин 85 сылын туолбут «Старик Хоттабыч» дьоруойа ыалдьыттаатылар.
Үөрүүлээх тэрээһин Саҥа дьыл елкатын уотун уматыытынан, 117 сыл анараа өттүтүгэр Раиса Кудашева хоһоонугар, Леонид Бекман мелодиятыгар киэҥник биллибит «В лесу родилась елочка» ырыатын хороводунан түмүктэннэ, кырачаан ыалдьыттар олус астынан, хас биирдиилэрэ бириис тутуурдаах үөрэн-көтөн бардылар.
М. Е. Егорова, ВРДБ кыл. библиограба
