Сэтинньи ый 10 күнүгэр И.М.Гоголев-Кындыл Уйбаан аатынан улуустааҕы библиотека кииннэммит ситимин Киин библиотекатыгар киирэн икки дьоһун тэрээһиҥҥэ кыттыыны ыллыбыт.
Сарсыарда өттүгэр бибилэтиэкэ үбүлүөйдээх сылыгар аналлаах «Когда строку диктует чувство» диэн бэйэ айымньытын айааччылар күрэхтэрин түмүктүүр тэрээһинигэр биһиги нэһилиэктэн Дария Дмитриевна Тарасова, Антонина Дмитриевна Григорьева уонна Борис Николаевич Васильев кыттыыны ыллылар. Саҥа буруолуу сылдьар бибилэтиэкэ туһунан хоһооннорунан үһүөн номинацияҕа тиксэн наҕараадаланнылар.
Эбиэт кэнниттэн СӨ култууратын үтүөлээх үлэһитэ, ХИФУ саха литературатын кафедратын сэбиэдиссэйэ, филологическай наука дуоктара, алампавед-учуонай, биһиги биир дойдулаахпыт Валентина Григорьевна Семенованы кытта истиҥ көрсүһүүгэ кыттыыны ыллыбыт. Биир дойдулаахпыт сөҕүмэр үлэлэрин көрөн, билсэн астынныбыт, киэн тутуннубут.
Томпо улууһун Саһыл орто оскуолата ыыппыт, куйаар ситимин нөҥүө бастакы аһаҕас республиканскай научнай — практическай конференцияҕа, «Ааҕыы түһүлгэтигэр» биһиги нэһилиэктэн биэс ааҕааччы оҕо кыттыыны ылла. Төрдүс кылаас үөрэнээччитэ Захаров Эрсан үһүс степэннээх лауреат буолла. Атыттар сертификатынан наҕараадаланнылар.
Михаил Спиридонович Иванов-Багдарыын Сүлбэ төрөөбүтэ 95 сылын көрсө кинигэ быыстапката уонна куйаар ситиминэн тургутук ыытылынна.
Үлэ геройа В.П.Трофимова аатынан оскуолаҕа Былатыан Ойуунускай төрөөбүтэ 130 сааһыгар аналлаах «Мин ырыам ылланыа», мин аатым ааттаныа» диэн литературнай биэчэр буолан ааста.
Өкүндү нэһилиэгин бибилэтиэкэрэ Саргылана Петрова