Бүлүү улууһун, Тыымпы нэһилиэгин бибилэтиэкэрэ Анастасия Егорова «Ойор тэбэр оҕо саас» хоһооннорун хомуурунньугуттан дорҕоонноохтук ааҕыыга куйаар ситимин нөҥүө ыытыллыбыт өрөспүүбүлүкэтээҕи көрүү-күрэххэ 325 (3 саастарыттан 10 кылааска диэри) оҕо кыттыыны ылла.
Дьокуускай куораттан, Бүлүү, Үөһээ Бүлүү, Ньурба, Сунтаар, Хаҥалас, Таатта, Нам, Амма, Мэҥэ-Хаҥалас, Уус Алдан, Кэбээйи, Муома, Үөһээ Дьааҥы, Өлөөн улуустарыттан хоһоон аахтылар.
Кыттааччылар олуһун бэлэмнэммиттэрин сэргээтибит. Иитээччилэр, учууталлар, төрөппүттэр күрэххэ эппиэтинэстээхтик сыһыаннаһан оҕолорун дьаныардаахтык эрчийбиттэр, айымньылаахтык тэрийбиттэр. Хоһоон ааҕааччылар үксүлэрэ хоһооннорун ис хоһоонугар сөп түбэһэр мааска эбэтэр көстүүм кэппиттэр, атрибуттаммыттар. Сорохтор задник оҥостубуттар, экран туруоруммуттар.
Бөлөҕүнэн ааҕыыга 14 бөлөх кыттыыны ылла. Бөлөхтөр тылларын-өстөрүн чочуйан, доргуччу, артыыстаан аахтылар.
Манна Бүлүү улууһун 3 нүөмэрдээх оскуолатын 1 кылааһын оҕолоро (салайааччылар Сивцева Марина Васильевна, Петрова Акулина Николаевна), Муома алын сүһүөх оскуолатын 4 «а» кылааһын коллектива (салайааччы Местникова Майя Григорьевна), Бүлүү улууһун Кыргыдай орто оскуолатын 4 кылааһын үөрэнээччилэрин «Чолбон» бөлөҕө (салайааччы Окоемова Василиса Гаврильевна) таһыччы бэлэмнээхтэрин көрдөрдүлэр. Муома орто оскуолатын 6-7 кылааһын үөрэнээччилэрэ хоһооннорунан дьүһүйүү түһэрэн ыыппыттара олус кэрэхсэбиллээх (салайааччылар Данилова Татьяна Ивановна, Винокурова Саргылана Евгеньевна).
Уһуйаан бөлөхтөрүттэн Нам улууһун Аппааны нэһилиэгин «Сандаара» уһуйаан «Чуораанчык» бэлэмнэнии бөлөҕүн кыргыттарын хоһоон ааҕыыларын олус сэргээн көрдүбүт (салайааччылар Евстафьева Н. И., Павлова М. Д., Жиркова А. Н.).
Элбэхтии оҕолору бэлэмнээн кытыннарбыт иитээччилэр уонна учууталлар бааллар. Үөһээ Бүлүү спортивнай орто оскуолатын 3 «б” кылааһын оҕолоро (салайааччы Муксунова Ольга Ильинична) бары олус үчүгэйдик ааҕаннар сөхтөрдүлэр, Ньурба улууһун «Кэскил» уһуйаанын бэлэмнэнии бөлөҕүн иитээччилэрэ 23 оҕону кытыннаран үөртүлэр (салайааччылар Макарова Ксения Михайловна, Рожина Яна Семеновна). Сунтаар улууһун Маар Күөл үөрэнээччилэрин (1,2,3,9 кылаас оҕолоро) ааҕыылара көнньүөртэ, сүргэбитин көтөхтө. (салайааччылар Саввинова Е. С., Степанова А. В., Дорофеева С.В., Мыреева Е. Ю.)
Күрэххэ Дьокуускай куорат Саха сиринээҕи анал коррекционнай оскуола-интернат 3,4,7,9 кылааһын үөрэнээччилэрэ кыттыыны ыллылар (салайааччылар Иванова М.В., Протопопова Е. А., Протопопова Н. А.)
3-4 саастаах кырачааннар кыттаннар кинилэр чуопчаарар саҥаларын манньыйа иһиттибит, дуоһуйа көрдүбүт. Оҕолор бары үчүгэйдик эрчиллэн, кыһаллан аахтылар.
Кыттааччы элбэх буолан хоһоону ааҕыы оҕо сааһынан, кылааһынан көрөн бөлөхтөргө арааран сыаналанна. Ол бөлөх аайы туспа лауреаттар, дипломаннар ананнылар, туоһу суруктар сурулуннулар
«Ойор тэбэр оҕо саас» А. М. Егорова хоһооннорун дорҕоонноохтук ааҕыыга куйаар ситимин нөҥүө ыытыллыбыт өрөспүүбүлүкэтээҕи көрүү-күрэх муҥутуур кыайыылааҕынан Таатта лицейын 3 кылааһын үөрэнээччитэ Румянцева Валерия ааттанна (салайааччы Винокурова Валерия Георгиевна).
Күндү оҕолор, убаастабыллаах иитээччилэр, учууталлар, төрөппүттэр!
Хоһоону сэргээн-сэҥээрэн бу көрүү-күрэххэ көхтөөхтүк кыттыбыккытыгар ис сүрэхтэн махтанабыт! Хомоҕой хоһоону ааҕан биһиги оҕолорбут сахалыы саҥалара сайдыа, айар куттара арыллыа, кинилэри олохторун тухары хоһоон кута арыаллыа…
Бу күрэҕи ыытарбытыгар күүс-көмө буолбут дьоммутугар — Кычкина Екатерина Николаевнаҕа (СӨ Национальнай библиотекатын “Оҕо ааҕар, арыллар киинин” библиограбыгар), Скороходкина Сандаара Семеновнаҕа (Муома алын сүһүөх оскуолатын библиотекарыгар), Павлова Ирина Ивановнаҕа (Ньурбатааҕы кииннэммит библиотечнай ситимин оҕолору кытта үлэлиир методиһыгар) улахан махталбытын тиэрдэбит.
Дьүүллүүр сүбэ: Егорова Р.Е., Филиппова М.И., Егорова А.М., Бүлүү улууһа, Бастакы Тоҕус нэһилиэгэ
Махтал, бэртээхэй күрэх буолла. Мин бибилитиэкэр киһи Анастасия Егорова хоһооннорун кытта саҥа билистим уонна олус сэргээтим. Билигин саҥардан хомуурунньугун таһаарар киһи бэрт буолуо этэ. Уһуйаан, оскуола алын сүһүөх оҕолоро үөрэтиэ этилэр.
Утуе киэьэннэн
Анастасия Егорова хоьооннорун курэ5эр ситиьиилээхтик иитиллээччилэрбитин кытыннардыбыт. Анастасия Егорова хоьоонноро ис хоьооно о5о уерэтэригэр судургу, ейдемтуе,тургэнник ылыныллар,хоьооноро араас тема5а суруллубут буолан тематическай мероприятияларга хоьооннорун о5олорбутугар аахтарабыт. Анастасия Егорова5а хоьоон курэ5ин кытыннарбыккар улахан махтал🤗тус олоххор, улэ5эр урдук ситиьиилэри, ессе да элбэх ара хоьооннору суруйан таьааттар диэн ба5а санаабытын этэбит. Ньурба куорат.
Үтүө киэһэнэн, Анастасия Егорова хоһооннорун олуһун диэн сөбүлээтим, оҕо үргүүк кутун,чараас дууһатын олус билэр буолан, хоһоонноро чэпчэкилэр, өйдөнүмтүөлэр, судургулар. Ханнык баҕар тэрээһиннэргэ биирдиилээн да, бөлөҕүнэн да аахтарыахха сөп. Анастасия Егоровнаҕа айар үлэтигэр, тус олоҕор ситиһиилэри баҕарабын.