Бүлүү куоратыгар олорор Елена Дмитриевна Протопопова – Иэлли айар-тутар, кэрэни кэрэхсээн сурукка тиһэр, уруһуйдуур, иискэ тигэн, хаартыскаҕа түһэрэн үйэтитэр ураты дьоҕурдаах.
Туораттан омос көрдөххө, олус холку майгылаах, нарын-намчы туттунуулаах Далбар Хотун, дьыл араас кэмигэр ханна да сырыттар, тулалыыр эйгэтин хатыламмат кэрэтин уратытык көрөн айымньыга тиһэрин сөҕөҕүн эрэ.
Ол туоһутунан истиҥ иэйиилээх тылларынан суруйбут хоһоонноро 5 хомуурунньук кинигэ буолан бэчээккэ тахсыбыттара буолар.
Бэйэтин суруйууларыгар ордук төрөөбүт Бүлүүтүн, Сахатын сирин кэрэ айылҕатын, дьахтар сирдээҕи олоҕун хаамыытын дириҥник итэҕэтиилээхтик дьүһүйэр. Ону сэргэ дойдуну аймаабыт Аҕа дойду Улуу сэриитин, тыылга дьон Кыайыы туһугар геройдуу охсуһуутун тириэрдэр, дьоллоох олоҕу уруйдуур айымньылара ааҕааччы болҕомтотун тардаллар.
Бу күннэргэ уйан дууһалаах Ийэ, амарах санаалаах Эбээ эйэлээх олох туһугар анал байыаннай дьайыыга ыҥырыллан сулууспалыы сылдьар саха ньургун уолаттарыгар бэйэтин алгыһын анаан бэчээккэ таһаартарда. Алгыс тылларын бэйэтэ түһэрбит Бүлүү кэрэ айылҕатын өҥнөөх хаартыскаларыгар сыһыаран ыраах сылдьар биир дойдулаахтара харысхал гынан илдьэ сылдьалларыгар бэлэх уунна.
Елена Дмитриевна ис дууһатыттан анаабыт алгыстара ытыс саҕа бэлэх буолан уолаттарбытын харыстыы, арчылыы турдуннар!
Л. Я. Кононова, Ааҕааччыны кытта үлэлиир отдел кыраайы үөрэтиигэ кыл. бибилэтиэкэрэ
Толору дьоллоох олох иһин
Хоһууттар саалаахтан самнымаҥ,
Булгуруйбат бигэ санаанан
Эйэлээх кэмнэри чугаһатыҥ!
***
Ааһыа будулҕаннаах кэмнэргит!
Өйгүтүн, санааҕытын холбооҥ,
Алгыспыт тылларын иҥэрэн
Өркөн өйдөбүлү тутуһуҥ!
***
Көхсүттэн көнтөстөөх эрэттэр
Күнтэн күүс ылаҥҥыт эрдийиҥ,
Хоһууннук, уостубат санаанан
Хабараан хапсыһыыны хотуҥ!
***
Эр санааҕыт самныбатын,
Хорсун сүрэх уостубатын,
Куккут-сүргүт үргүбэтин,
Уруй-тускул аргыстаныҥ !
***
Күбэй айыыһыт көмүскэһэн
Эйэни эргиччи харыстааҥ,
Эдьэн Айыыһыт кыттыһан
Кыайыылаах-хотуулаах эргиллиҥ!
Елена Протопопова –Иэлли, Бүлүү куората