Муус устар 21 күнүгэр Бүлүү улууһун Бороҕон нэһилиэгэр Каратаев Дмитрий Афанасьевич төрөөбүтэ 100 сылыгар, Колтовской Прокопий Степанович төрөөбүтэ 85 сылыгар аналлаах, бастакы төрүччүнү үөрэппит, сурукка киллэрэн кинигэ таһаарбыт автордарбытыгар анаммыт «Дьиэ кэргэн төрүччүтэ» НПК ыытылынна.
Тэрээһини иилээн-саҕалаан ыыттылар Николай Иванович Афанасьев аатынан Бороҕон орто оскуолата уонна олохтоох модельнай библиотека
Олохтоох библиотека, аймахтара Дмитрий Афанасьевичка уонна Прокопий Степановичка аналлаах быыстапка тэрийдилэр: кинигэлэрин, дьиэтээҕи архивнай матырыйаалларын: грамоталары, мэтээллэри быыстапкаҕа туруордулар.
Дмитрий Афанасьевич кыыһа, Петрова Елена Афанасьевна, Үөһээ Бүлүүгэ олорор норуот маастара, «Сырдык ааттара ахтылыннын, кэрэ сэбэрэлэрэ үйэтийдин» кинигэ ааптара куйаар ситиминэн эҕэрдэ тылларын эттэ уонна аҕатын туһунан кылгастык кэпсээтэ, нэһилиэгэр оҥорбут үлэтин-хамнаһын сырдатта.
Прокопий Степанович кыргыттара: Колтовская Яна Прокопьевна, Борисова Варвара Прокопьевна Максим Кирович Аммосов аатынан Хотугулуу Илиҥҥи Федеральнай университет студентката, Константин Спиридонович Чиряев аатынан Кеданда алын кылааһын учуутала, Колтовской Прокопий Степанович, сиэн кыыһа, Колтовская Мария Иннокентьевна конференцияҕа кыттар оҕолорго ситииһини баҕардылар, эһэлэрин баҕа санаата олоххо киирэн эрэриттэн олус үөрбүттэрин, кини төрүччүнү билиигэ олук уурбут кинигэтэ инникитин туһалаах буолуоҕар эрэнэллэрин эттилэр.
«Дьиэ кэргэн төрүччүтэ» конференцияҕа барыта 23 үөрэнээччи кытынна.
Куонкурс түмүгэ:
Алын кылаастарга:
1 миэстэ – Егоров Эрчимэн (1 кыл.), Егоров Дьулустаан (4 кыл.)
1 миэстэ – Васильева Миранда (1 кыл.)
2 миэстэ – Кононов Петя (1 кыл.), Кононова Ванесса (3 кыл.)
2 миэстэ – Николаева Айсена (3 кыл.)
3 миэстэ – Каратаева Намыына (1 кыл.), Каратаев Дьулус (2 кыл.)
3 миэстэ – Белолюбский Байдам (1 кыл.).Орто сүһүөхтэргэ:
1 миэстэ — Каратаева Айгылаана (7 кыл.), Каратаев Дьулус (5 кыл.)
2 миэстэ – Гоголева Заринна (5 кыл.)
3 миэстэ – Егорова Сандаара (7кыл.)Үрдүкү кылаастарга:
1 миэстэ – Катя Каратаева (11 кыл.)
2 миэстэ – Виолетта Николаева (10 кыл.)
Бастакы кылаас үѳрэнээччитэ Васильева Миранда ийэтин кытта төрүччүтүн үөрэппитин, оҕолортон ыйытык оҥорбутун киллэрбит.
Катя, Айгылаана, Айхал Каратаевтар киһи сөҕүөх курдук эбэлэрин, эһэлэрин өттүнэн хас да үйэни хабан, сөҕүмэр үлэни оҥорбуттар.
Бырааттыы Дьулустаан уонна Эрчимэн Егоровтар эмиэ дириҥ силистээх улахан чинчийиини оҥорбуттар.
Оҕолор бары хаан-уруу аймахтарын туһунан тугу билбиттэрин, туох дьон буолалларын, биллиилээх дьоннорун киэн тутта кэпсээтилэр. Төрүччүлэри оҥорууга анал программаны, архыып матырыйаалларын туһаммыттара кэрэхсэбиллээх. Матырыйаалларын хантан ылбыттарын, хомуйбуттарын, туһаныллыбыт литератураларын көрдөрбүттэр.
Хас биирдии үлэҕэ аймаҕынан киэн туттуу санаата ырылыччы көстөр. Дмитрий Афанасьевич Каратаев, Прокопий Степанович Колтовской кэнчээри ыччаттарын кэскиллээх, үйэлээх үлэлэрэ инникилээх, дириҥ суолталаах. Оҕолор өссө да инникитин төрүттэрин дириҥэтэн үөрэтиэхтэрэ, элбэх матырыйаалы булуохтара чинчийэр үлэлэрин салгыы ыытыахтара диэн эрэнэбит, ситиһиилэри баҕарабыт!
Түгэнинэн туһанан, төрүччүнү үөрэтиигэ туохха да кэмнэммэт сүдү үлэни оҥорбут, Прокопий Степановичтыын үлэлэспит физико-математическай наука кандидатыгар Марк Петрович Григорьевка Бороҕон нэһилиэгин олохтоохторуттан барҕа махталбытын тиэрдэбит.
Матырыйаалы бэлэмнээтилэр: С. П. Каратаева, Бороҕон модельнай библиотекатын кыл. бибилэтиэкэрэ,
Н. Т. Прокопьева, Н. И. Афанасьев аатынан Бороҕон орто оскуолатын директоры иитэр үлэҕэ солбуйааччыта
