Оҕо суруйааччыта, тылбаасчыт, фольклорист, общественнай деятель Анна Денисовна Неустроева төрөөбүтэ 120 сылын бэлиэтиибит. Күндү ааҕааччыларбыт, саха литературатын сэҥээрээччилэр! Эһигини суруйааччы олоҕун, айар үлэтин уонна «Тиргэһиттэр» кэпсээнин туһунан Бүлүүтээҕи оройуоннай оҕо бибилэтиэкэтэ бэлэмнээбит буктрейлерын сэргээн көрөргүтүгэр ыҥырабыт…
Оҕо суруйааччыта, тылбаасчыт, фольклорист, общественнай деятель Анна Денисовна Неустроева 1903 сыл кулун тутар 3 күнүгэр Таатта улууһун II Байаҕантай нэһилиэгэр төрөөбүтэ.
Дьокуускайдааҕы педагогическай техникумҥа үөрэнэ киириэҕиттэн өрөспүүбүлүкэ общественнай олоҕор көхтөөхтүк кыттыбыта. Ааҕар балаҕаҥҥа, оскуолаҕа учууталынан, “Хотугу сулус” сурунаалга эппиэттиир сэкэрэтээринэн, Саха сиринээҕи кинигэ кыһатыгар уус-уран литератураҕа эрэдээктэринэн үлэлээбитэ.
Саха дьахталларыттан бастакыннан ССРС суруйааччыларын сойууһун чилиэнэ буолбута.
Анна Денисовна Неустроева оҕоҕо аналлаах элбэх кэпсээннэрдээх: ол курдук “Албын”, “Кэһии”, “Ороһукаан”, “Оҕонньордоох эмээхсин”, “Куттамсах куһаҕан” уо.д.а атыттар.
Олортон биирдэстэринэн саамай киэҥник биллибит “Тиргэһиттэр” кэпсээнэ буолар. Кэпсээн 1938 сыллаахха “ХОТУГУ СУЛУС” сурунаалга бэчээттэммитэ. Николай Мординов-Амма Аччыгыйа, Василий Протодьяконов-Кулантай бу айымньыга үрдүк сыанабылы биэрбиттэрэ, ааҕааччылар биһирэбиллэрин ылбыта.
Бу кэпсээн оҕону иитэр-үөрэтэр үлэҕэ олус табыгастаах. Айымньыга оҕолор барахсаттар өс киирбэхтэрэ, бэйэ-бэйэҕэ сыһыаннара, тобуллаҕас толкуйдара арыллар. Кэпсээн сүрүн геройа уонуттан тахсан эрэр саастаах Дырыдаал Дьаакыптаах улахан кыыстара Даайыс. Эһэтэ оҥорон биэрбит тиргэлэрин иитэн, туох иҥнибитин, салгыы туох-хайдах буолбуттарын, кэпсээни ааҕан билиэххит диэн эрэнэн, оҕо библиотекатыгар күүтэбит.
Оҕо бибилэтиэкэтин YouTube канала: https://www.youtube.com/@user-uo5px3zd3k
Буктрейлеры таҥан оҥордо Т. Ф. Васильева, тиэкиһи бэлэмнээтэ, аахта М. Е. Егорова,
Бүлүүтээҕи оройуоннай оҕо бибилэтиэкэтэ
∗ Страница тас көрүҥүн оҥорууга туһанылыннылар: М. Баишева ойуута (портрет), куйаар ситимиттэн хартыыналар.
Неустроева, А. Д. Кэпсээннэр : (кыра уонна отто саастаах оҕолорго) / Аана Ностуруойаба. – Йакуутскай : САССР государственнай изд-бата, 1939. – 51, [2] с. – URL: https://e.nlrs.ru/open/35975