Бүгүн, сэтинньи ый 7 күнүгэр, И.М.Гоголев — Кындыл аатынан Бүлүү улууһун киин бибилэтиэкэтигэр Улуу Өктөөп 105 сылын бэлиэтээтилэр. Билиҥҥи аҕа уонна орто саастарын ааспыт дьон Өктөөп бырааһынньыга дирбийэн-дарбыйан, урукку Сэбиэскэй Сойууһу бүтүннүү хабан, киэҥник, бар дьон сүргэтин көтөҕөрдүү өрө күүрүүлээхтик ыытылларын үчүгэйдик өйдүүллэр.
Аҕам саастаах ытык дьоммут мустаннар үөлээннээхтэрин кытта көрсүһэн, урукку ааспыт кэми ахтыһан, оонньоон, үҥкүүлээн, ыллаан аастылар.
Кэлбит ыалдьыттары, библиотека коллективын аатыттан уруккулуу илиинэн суруллубут открытка бэлэхтээн көрүстүлэр.
Бу «Ааспыт кэм ахтылҕана…» тэрээһини Софья Мартыновна Саввинова сатабыллаахтык иилээн-салайан ыытта.
Кэлбит дьону икки хамаандаҕа араартаан куоталаһыннаран, ааспыт сэбиэскэй кэмнээҕи история быыһын сэгэтэр боппуруостарга эппиэттээн үөрдүлэр-көттүлэр. Ол курдук бүтэһик боппуруоһа: «бырааһынньык саамай күндү аһылыга туох этэй?» — диэбитигэр бары биир киһи курдук «бэрэски» диэбиттэригэр библиотека үлэһиттэрэ буһарбыт бэрэскилэрин киллэрэн күндүлээн үөртүлэр.
Августина Платоновна Евсеева Октябрь тематыгар мунньубут значоктарын, ол кэминээҕи ырыанньыгы, Наталья Дмитриевна Алексеева урукку хаартыскалары аҕалан көрдөрүүгэ туруордулар.
«Бу күн биһиги көлүөнэҕэ сырдык, сылаас эрэ өйдөбүлү хаалларбыта, күргүөмнээх, өрө күүрээннээх, көхтөөх үлэни — хамнаһы, эдэр саас эрчимнээх сылларбытын санатар«, – диэн мустубут дьон бэлиэтээтилэр.
Комплексный отдел обслуживания Вилюйской центральной улусной библиотеки
Социальная сеть МКУ «Вилюйская МЦБС им. И. М. Гоголева-Кындыл» Вконтакте: https://vk.com/wall-216173312_7