Ыам ыйын 9 күнүгэр, Аҕа дойду Улуу сэриитигэр Кыайыы 77 сылын туолар – бу күн киһи аймаҕы бүтүннүү долгутар. Дойдубут устуоруйатыгар норуот хорсун быһыытынан Кыайыыны уһансыбыт уратылаах кэрдиис кэминэн биллэр. Төһөнөн биһиги оччотооҕу кэмтэн ыраатабыт даҕаны, соччонон кинилэр албан ааттара, оҥорбут хорсун быһыылара ырылыйан, өссө улуутуйан иһэллэр, ол курдук буолбут быһыыны-майгыны толорутук өйдүүбүт.
Россия улуу учуонайа М. В. Ломоносов: “Бэйэтин ааспыт устуоруйатын билбэт норуот – инникитэ суох норуот” – диэн эппитэ. Бэйэтин ытыктанар хас биирдии киһи дойдутун устуоруйатын билэр, онтун кэнчээри ыччатыгар тиэрдэр кэрэ дьулуурдаах буолуохтаах.
Күндү оҕолор! Кыайыы буолбута 75 сылыгар С. А. Новгородов аатынан «Бичик» национальнай кыһатыгар бэчээттэнэн тахсыбыт «75 кэпсээн: сэрии туһунан оҕолорго» уус-уран таһаарыы кинигэттэн билиһиннэрэбит. Кинигэҕэ сэрии ыар сылларыттан араас түгэннэри, сэрии чаастарын, байыаннай тиэхиньикэ, ханнык сэп-сэбиргэл туттуллубутун, ханнык улуу кыргыһыылар буолбуттарын, сэрии дьоруойдарын хорсун быһыыларын тустарынан киллэрбиттэр.
Ол тыйыс кэм кырдьыга маннык этэ ээ, биһиги эбээлэрбит эһээлэрбит олорбут олохторун, оччотооҕу кэмнэри бу кинигэнэн сиэттэрэн кэпсиибит. Улуу Кыайыыны уһансыбыттарга сүгүрүйүүбүт уонна ытыктабылбыт бэлиэтинэн буоллун.
∗75 кэпсээн : сэрии туһунан оҕолорго / хомуйан оҥордо Н. В. Андросова ; Е. А. Газизов, Н. Н. Рязанскай, А. К. Попов ойуулара туһанылынна ; бырайыак ааптара В. И. Попова. — Дьокуускай : Бичик, 2020. — 110, [1] с. : ил. – кинигэ матырыйаалларынан.
Бүлүүтээҕи оройуоннай оҕо бибилэтиэкэтэ
Видео-презентацию можно посмотреть здесь ⇑ или перейти по ссылке к каналу YouTube Вилюйской районной детской библиотеки: https://www.youtube.com/watch?v=_eBMcAs3I5A