Бүлүүтээҕи киин бибилэтиэкэҕэ Иван Гоголев-Кындыл аатын иҥэрэргэ этии киллэрдилэр

Бүлүүтээҕи киин бибилэтиэкэҕэ саха норуодунай поэта Иван Михайлович Гоголев-Кындыл аатын иҥэрэр туһунан боппуруоһу туруоран, кэлэктиип мунньаҕар дьүүллэстилэр.
Ол курдук киин бибилэтиэкэ сүҥкэн талааннаах поэт, драматург, прозаик Иван Гоголев-Кындыл үтүө аатын үйэтитиигэ ахсаабат кыһамньытын уурар.

1995 сылтан улуустааҕы «Гоголев ааҕыылара» киин бибилитиэкэ тэрийиитинэн уонна улуус дьаһалтатын, култуура, үөрэх управлениеларын, Бүлүүтээҕи педколледж көхтөөх кыттыыларынан уонна көмөлөрүнэн сылын аайы ыытыллар улахан суолталаах тэрээһин буолар. Итиннэ эбии кэнники 4 сыл устата Иван Михайлович Гоголев төрөөбүт күнүгэр Бүлүү куоратын оскуолаларын бүтэрээччилэргэ «Аһаҕас уруоктар» ыытыллар буоллулар. Бу барыта кэнэҕэски көлүөнэ ыччакка улахан наадалаах.

Мунньаҕы киин бибилэтиэкэ дириэктэрин солбуйааччы Мария Егоровна Егорова салайан ыытта. Өр сылларга култуура оройуоннааҕы отделын салайбыт, СӨ култууратын үтүөлээх үлэһитэ Валентина Петровна Дашевская, С. М.  Аржаков аатынан Бүлүүтээҕи оҕо дьиэтин үлэһитэ Анна Николаевна Игнатьева, кыраайы үөрэтэр салаа бибилэтиэкэрэ Матрена Петровна Дмитриева, Н. И. Протопопова аатынан «Кэскил» ИТЦ наставник –методиһа, педагогическай үлэ бэтэрээнэ Наталья Дмитриевна Алексеева кэпсэтиигэ кыттан бэйэлэрин санааларын үллэһиннилэр. Ол курдук духуобунай култуураны чөлүнэн хаалларарга уонна инники сайдыытыгар анаан Бүлүү куоратыгар Иван Гоголев–Кындыл духуобунай нэһилиэстибэтин Дьиэтин тэрийэргэ уонна Бүлүүтээҕи киин бибилэтиэкэҕэ саха норуодунай поэта И.М.Гоголев–Кындыл аатын иҥэрэргэ диэн мунньах кыттыылаахтара биир санааҕа кэллилэр.

Түмүккэ бу боппуруоһу туһааннаах үрдүкү тэрилтэлэргэ, улуус дьаһалтатыгар, дьокутааттарга тириэрдэн туруорсарга, ити хайысханан үлэни саҕалыырга этии киллэрдилэр.

Николай Федоров,
Бүлүү улууһун «Олох суола» хаһыат официальнай инста­грам-сирэйиттэн https://www.instagram.com/p/CNJjVstAWll/




Навигация: Вернуться на главную страницу

Оставить комментарий

EnglishРусский

Мы используем cookie. Во время посещения сайта Муниципального казённого учреждения «Вилюйская межпоселенческая централизованная библиотечная система» муниципального района «Вилюйский улус (район)» Республики Саха (Якутия) вы соглашаетесь с тем, что мы обрабатываем ваши персональные данные с использованием метрических программ. Подробнее

Понятно, спасибо
Обратная связь