Саха биир уһулуччулаах учуонайа, саха суругун-бичигин төрүттээччи, сырдатааччы Семен Андреевич Новгородов төрөөбүт күнүгэр, ол эбэтэр Олунньу 13 күнүгэр, Бүлүүтээҕи оҕо библиотекатыгар, «Норуот баайа-төрөөбүт төрүт тыла» диэн Н. C. Степанов аатынан 3-с нүөмэрдээх оскуола 2-с “б” кылааһын оҕолоругар бэрт интэриэһинэй, сэргэх библиотечнай уруок буолан ааста.
Ханнык баҕарар норуот литературата аан бастаан үөдүйэн, сайдан барыытыгар кирилиэһин биир бастакы уонна бигэ үктэлинэн норуот тылын уус-уран айымньыта буоларын быһыытынан, уруок таабырын таайсыытынан саҕаланна.
Онтон өбүгэлэрбит төрүт үгэстэрин, олохторун-дьаһахтарын, сүрүн дьарыктарын, туттар малларын төһө билэллэрин билэр ыйытыктар, интириэһинэй ребустар, саха оҕото үчүгэйи, куһаҕаны араара үөрэнэригэр аналлаах үтүө уонна мөкү диэн таайтарыылаах оонньуу ыытылыннылар. Бу ооньуулар оҕолор дьону кытта алтыһалларыгар, тутта-хапта сылдьалларыгар, чэгиэн, чэбдик буолалларыгар сөптөөх үөрүйэхтэри иҥэриэхтэрэ, ситиһиилээх киһи буола улааталларыгар олук ууруохтара диэммит эрэнэбит.
Бу бэлиэ күн, оҕолор сахалыы мааны таҥастарын таҥнан-симэнэн кэлэн, саха төрүт остуол оонньууларын: хабылык, хаамыска, тырыыҥка оонньоон көхтөөхтүк кыттан, киирсэн үөрэн-көтөн тарҕастылар. Төрүт остуол оонньууларбыт эти-сиини, толкуйдуур дьоҕуру сайыннараллар, сымса-сылбырҕа буоларга эрчийэллэр.
Төрөөбүт тылбыт күүһэ-уоҕа, кылаана, араас өҥнөөх кырааската күн сардаҥатын кыырпахтара сиргэ күлүмүрдүү ыһыахтанарын курдук сайда, үүнэ, чэчирии, көҕөрө-наҕара, симэнэ турдун!
Сахалыы куту иҥэриммит оҕо талаана, дьоҕура муҥура суох. Өбүгэҕит үтүө үгэстэрин иҥэринэн улаатан, саха буолан сандаарыҥ, киһи буолан килбэйиҥ диэн тураммыт кыттыбыт оҕолорго барыларыгар уонна кылаас салайааччытыгар Марина Васильевна Сивцеваҕа махталбытын биллэрэбит.
Бүлүүтээҕи оройуоннай оҕо бибилэтиэкэтэ
Васильева Т. Ф., сүрүннүүр бибилэтиэкэр
Навигация: Вернуться на главную страницу