Бэс ыйын 28 күнүгэр Бүлүү куоратын сынньалаҥ пааркатыгар үгэс буолбут «Үрүҥ түүн үҥкүүтэ» — баян доҕуһуоллаах үҥкүү кэрэ киэһэтэ буолан ааста. Тэрээһин Бүлүү куорат төрүттэммитэ 385, Булуулэр киэн туттар чулуу киһибит, Саха Өрөспүүбүлүкэтин кэлэр кэскилин төрүттэспит судаарыстыбаннай, политическай деятэлэ – С. М. Аржаков төрөөбүтэ 120 сылыгар, Англия аһымал санаалаах сиэстэрэтэ Кэт Марсден 160 сылларыгар аналлаах Ытык Бүлүү “Өрөгөй Ыһыаҕын” чэрчитинэн ыытылынна.
«Үрүҥ түүн үҥкүүтүгэр» кытыннылар Бүлүү бастыҥ баянистара — олохторун айар үлэ абылаҥар анаабыт, көмүс тимэхтээх баяны доҕор оҥостубут: Н. П. Трофимов, А. И. Васильев, В. Н. Платонов, Е. Н., И.И. Туласыновтар, А. В. Иванов. Киһи иһиттэр — истиэх, ыллаатар — ыллыах, үҥкүүлээтэр – үҥкүүлүөх дьикти кэрэ дорҕооннору бэлэх ууннулар. Дьоро киэһэни өссө ордук киэргэттэ Таатта талыы курдаах талба мааны ыалдьыта — Петр Туласынов, Иван Туласынов аймаҕа. Маны таһынан М.Н. Жирков аатынан Бүлүүтээҕи оҕо искусствотын оскуолатын “Пассаж” вокально – инструментальнай ансаамбыла бэйэтин репертуарыттан ырыалары ыллаан дьон биһирэбилин ылла. Тэрээһини иилээн-саҕалаан ыыттылар Киин библиотека үлэһиттэрэ Туяра Васильева, Мария Егорова.
Бу дьоро киэһэҕэ кыттааччылар байаанынан музыкальнай айымньылары дьиэрэһитэ оонньоотулар. Манна мустубут дьон урукку – хойукку кэмнэри, эдэр саастарын санаан, байаан тыыннаах доҕуһуолугар уйдаран, ырыаны – үҥкүүнү көҕүлүттэн туттулар, музыка аптаах дорҕоонноругар куустаран, дуоһуйа үҥкүүлээн тарҕастылар.
Т. Васильева, Оройуоннааҕы оҕо библиотекатын сүрүннүүр бибилэтиэкэрэ
Навигация: Вернуться на главную страницу