Россия норуотун үөрэҕириитин туйгуна, Саха Республикатын үтүөлээх учуутала, ССРС суруйааччыларын союһун чилиэнэ, Сунтаар улууһун бочуоттаах гражданина Иванов Иван Герасимович – Уйбаан Нуолур үбүлүөйдээх 90 сааһын көрсө, кулун тутар 12 күнүгэр «Оҕо саас оонньоммотох ыллыктарынан…» диэн ааттаан «САЛЛААТ ОҔОТО ЧООРУОНА» кэпсээн тула библиотечнай аһаҕас уруок, Герой Н. С. Степанов аатынан Бүлүүтээҕи үһүс нүөмэрдээх оскуола 2 «б» кылааһын үөрэнээччилэригэр (учуутал А. А. Доранова) буолан ааста.
Уйбаан Нуолур айымньыларын туһанан оскуола оҕолоругар үөрэтии, ырытыы, иитии өттүгэр көмөлөөх буолара саарбаҕа суох диэтэхпитинэ сыыспаппыт буолуо. Суруйааччы сэрии ыар сылларын кыһалҕатын этинэн–хаанынан билбит буолан, сэрии сылларынааҕы тыыл ыарахан олоҕун оҕо хараҕынан «Саллаат оҕото Чооруона» айымньытыгар бэрт итэҕэтиилээхтик ойуулуур. Кини бэйэтэ учуутал идэлээх буолан, оҕо ис туругун таба көрөр дьоҕурдааҕа, ол да иһин буолуо, оҕолорго суруйбут хас биирдии айымньылара оҕону умсугутар, тардар, чахчы бу баардыы итэҕэтэр алыптаахтар.
Библиотечнай аһаҕас уруокпутугар оҕолор олус көхтөөхтүк кытыннылар, аахпыт айымньыларын хайдах өйдөөбүттэринэн бэйэлэрин санааларын уруһуйга ойуулаан үллэһиннилэр, тургутук боппуруостарга бары чаҕылхайдык сөптөөх эппиэти биэрэн оройуоннааҕы оҕо библиотекатын үлэһиттэрин үөртүлэр. Ону таһынан оҕо библиотекатын үлэһиттэрэ слайд презентация нөҥүө суруйааччы олоҕун кэккэ кэрчиктэрин сырдаттылар, атын айымньыларын, кинигэлэрин кытары билиһиннэрдилэр. Оҕолор кинигэ быыстапкатын көрдүлэр, сэргээтилэр.
Бу күн барыбытыгар мээнэҕэ ааспата — хас биирдиибит саҥаны, туох эрэ уратыны биллибит-көрдүбүт, билиибитин хаҥаттыбыт.
Бүлүүтээҕи оҕо бибилэтиэкэтэ
Навигация: Вернуться на главную страницу